ବିଶ୍ବ ଲୋକସମ୍ପର୍କ ଦିବସ ୨୦୨୪: ସମ୍ପର୍କର ବିନ୍ଧା‌ଣି

ପ୍ରତିବର୍ଷ ଜୁଲାଇ ୧୬କୁ ବିଶ୍ବ ଲୋକ ସମ୍ପର୍କ ଦିବସ ଭାବେ ପାଳନ କରାଯାଉଛି। ଲୋକସମ୍ପର୍କ ଏବଂ ଯୋଗାଯୋଗକୁ ଏକ ବୃତ୍ତି ଭାବରେ ସ୍ୱୀକୃତି ଏବଂ ପାଳନ କରିବା ଏବଂ ସାରା ବିଶ୍ବରେ ଲୋକ ସମ୍ପର୍କକୁ ଏକ ଦକ୍ଷ ଏବଂ ପ୍ରଭାବଶାଳୀ ଉପାୟରେ ବୁଝିବା ଏବଂ ବ୍ୟବହାର କରିବା ଦିଗରେ କାର୍ଯ୍ୟ କରୁଥିବା ସମ୍ପର୍କର ବିନ୍ଧାଣିମାନଙ୍କ ପାଇଁ ଏହି ଦିବସକୁ ସମର୍ପିତ କରାଯାଇଛି

ଅଂଶୀଦାରଙ୍କ ଆବଶ୍ୟକତା ଓ ଆକାଂକ୍ଷା ବୁଝିବାକୁ ହେବ
କର୍ପୋରେଟ୍ ଜଗତରେ ସଂପ୍ରତି ଦ୍ରୁତ ପରିବର୍ତ୍ତନ ଘଟୁଛି। ଏଭଳି ପରିସ୍ଥିତିରେ ଲୋକସଂପର୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି। ଏଥିପାଇଁ ଦକ୍ଷ ଯୋଗାଯୋଗ ସ୍ଥାପନକାରୀ, ସଂକଟ ପରିଚାଳକ ଓ ପ୍ରସିଦ୍ଧି ନିର୍ମାତାଭାବେ ଲୋକସଂପର୍କ ଅଧିକାରୀମାନଙ୍କୁ କାର୍ଯ୍ୟ କରିବାକୁ ହେବ। ସମସ୍ତ ଅଂଶୀଦାରଙ୍କ ଆବଶ୍ୟକତା ଏବଂ ଆକାଂକ୍ଷାକୁ ବୁଝି ସର୍ବଦା ନିଜକୁ ପରିସ୍ଥିତି ସହ ଖାପ ଖୁଆଇ ସକ୍ରିୟତାର ସହ କାର୍ଯ୍ୟ କରିବାକୁ ପଡ଼ିବ। ସାମ୍ବାଦିକ ଏବଂ ଗଣମାଧ୍ୟମ ସଂସ୍ଥା ସହିତ ଭଲ ସଂପର୍କ ସ୍ଥାପନ କରିବା ଏବଂ ତାହାକୁ ବଜାୟ ରଖିବା ହେଉଛି ଲୋକସଂପର୍କ ପେସାରେ ଥିବା ବ୍ୟକ୍ତିଙ୍କ ପାଇଁ ଅତ୍ୟନ୍ତ ଗୁରୁତ୍ବପୂର୍ଣ୍ଣ। ତେଣୁ ସେମାନଙ୍କ ସହିତ ଯୋଗାଯୋଗକୁ ଆମେ ଉନ୍ମୁକ୍ତ ରଖିଥାଉ। ଠିକ୍‌ ସମୟରେ ସଠିକ୍‌ ସୂଚନା ଦେଇଥାଉ। ଭୁଲ୍‌ ସୂଚନାର ପ୍ରସାରକୁ ରୋକିବା ଏବଂ ଠିକ୍‌ ସୂଚନା ଲୋକଙ୍କ ପାଖରେ ପହଞ୍ଚାଇବା ପାଇଁ ଆମେ ସକ୍ରିୟତାର ସହ କାର୍ଯ୍ୟ କରିଥାଉ। କମ୍ପାନିର ମୂଲ୍ୟବୋଧ ଏବଂ ମିସନକୁ ଦୃଷ୍ଟିରେ ରଖି ସଂସ୍ଥାର ଭାବମୂର୍ତ୍ତିକୁ ଉଚ୍ଚରୁ ଉଚ୍ଚକୁ ନେବା ପାଇଁ ଲୋକସଂପର୍କ ପେସାର ବ୍ୟକ୍ତିମାନେ ଗୁରୁତ୍ବପୂର୍ଣ୍ଣ ଭୂମିକା ନିଭାଇଥାନ୍ତି। ମାର୍କେଟିଂ ଏବଂ ବ୍ରାଣ୍ଡିଂ ଟିମ୍‌ ସହିତ ନିବିଡ଼ ସଂପର୍କ ରଖି କାର୍ଯ୍ୟ କରିବାକୁ ପଡ଼ିଥାଏ। ତେଣୁ ସେମାନଙ୍କ ସହ ନିୟମିତ ବୈଠକ ଏହାକୁ ସୁଗମ କରିଥାଏ। ଏଥିସହିତ ଅନେକ ନୂଆ ଓ ଅଭିନବ କାର୍ଯ୍ୟ ମଧ୍ୟ କରିବାକୁ ପଡ଼ିଥାଏ। ସାଧାରଣରେ ‌କମ୍ପାନିକୁ ଲୋକମାନେ କିଭଳି ବିବେଚନା କରୁଛନ୍ତି ତାହାର ଅନୁଧ୍ୟାନ କରିବା ଗୁରୁତ୍ବପୂର୍ଣ୍ଣ। ଏହା ମଧ୍ୟ ଏକ ନିରନ୍ତର କାର୍ଯ୍ୟ। ନିୟମିତ ଭାବେ ବିଭିନ୍ନ ବର୍ଗ ସହିତ ମତ ବିନିମୟ ଓ ଅନ୍ୟାନ୍ୟ ମାଧ୍ୟମର ଉପଯୋଗ କରି ଯେଉଁଠି ଉନ୍ନତିର ଆବଶ୍ୟକତା ରହିଥାଏ ତାହାକୁ କାର୍ଯ୍ୟକାରୀ କରିଥାଉ। କମ୍ପାନି କରୁଥିବା ଭଲ କାର୍ଯ୍ୟ ସଂପର୍କରେ ଲୋକଙ୍କୁ ବିଭିନ୍ନ ମାଧ୍ୟମରେ ସୂଚନା ଦେବାକୁ ହୋଇଥାଏ।
-ପ୍ରଶାନ୍ତ କୁମାର ହୋତା, ସଭାପତି ତଥା ଗ୍ରୁପ୍‌ ମୁଖ୍ୟ (ସିଏସ୍‌ଆର୍‌, ଶିକ୍ଷା ଏବଂ ନିରନ୍ତରତା ମୁଖ୍ୟ-କର୍ପୋରେଟ ଯୋଗାଯୋଗ), ଜିନ୍ଦଲ୍‌ ଷ୍ଟିଲ୍‌ ଆଣ୍ଡ୍‌ ପାୱାର ଲିମିଟେଡ୍‌

ମୋର ଲକ୍ଷ୍ୟ ଦାୟିତ୍ବ ନେବା
ଲୋକ ସମ୍ପର୍କ ଦିବସରେ ଆମେ ବ୍ୟବଧାନକୁ ଦୂର କରି, ବିଶ୍ୱାସ ବୃଦ୍ଧି କରି ଏବଂ ଶକ୍ତିଶାଳୀ ସମୁଦାୟ ଗଠନରେ ଯୋଗାଯୋଗର ଅମୂଲ୍ୟ ଭୂମିକାକୁ ପାଳନ କରିବା। ପୂର୍ବତଟ ରେଳପଥର ବରିଷ୍ଠ ଲୋକସମ୍ପର୍କ ଅଧିକାରୀ ଭାବରେ, ମୁଁ ପ୍ରଭାବଶାଳୀ ଯୋଗାଯୋଗର ପରିବର୍ତ୍ତନଶୀଳ ଶକ୍ତିକୁ ପ୍ରତ୍ୟକ୍ଷ ଭାବରେ ଦେଖିବାର ସୌଭାଗ୍ୟ ଲାଭ କରିଛି । ଜଣେ ଜନସମ୍ପର୍କ ଅଧିକାରୀ ଭାବେ ମୋର ଲକ୍ଷ୍ୟ କେବଳ ଟ୍ରାକ୍ ଓ ଷ୍ଟେସନରେ ସୀମିତ ନୁହେଁ ବରଂ ଦାୟିତ୍ବ ନେବା ଏବଂ ହୃଦୟକୁ ଯୋଡ଼ିବା, ଯାତ୍ରୀଙ୍କ ସମସ୍ୟାର ସମାଧାନ କରିବା ଏବଂ ପ୍ରତ୍ୟେକ ସ୍ୱର ଶୁଣିବା ସୁନିଶ୍ଚିତ କରିବାର ଦକ୍ଷତା ବିକାଶ କରିବା। ଆଜି ଆସନ୍ତୁ ଜନ ସମ୍ପର୍କକୁ ଆହୁରି ସୁଦୃଢ଼ କରିବା ପାଇଁ ଆମର ପ୍ରତିବଦ୍ଧତାକୁ ନବୀକରଣ କରିବା। ଆଜି ବିଶ୍ୱ ଲୋକ ସମ୍ପର୍କ ଦିବସର ଶୁଭେଚ୍ଛା। ଆମେ ମିଳିମିଶି ଏକ ପରିବର୍ତ୍ତନର ଦୁନିଆ ତିଆରି କରିପରିବା।
ନିହାର ରଞ୍ଜନ ମହାନ୍ତି, ବରିଷ୍ଠ ଲୋକ ସମ୍ପର୍କ ଅଧିକାରୀ,
ପୂର୍ବତଟ ରେଳପଥ

ଲୋକ ସମ୍ପର୍କ ହେଉଛି ବିଶ୍ବାସକୁ ସୁଦୃଢ଼ କରିବା
ସାରା ଦୁନିଆରେ ବ୍ରାଣ୍ଡ୍‌ର ଏକ ସକାରାତ୍ମକ ଓ ଦୃଢ଼ ଭାବମୂର୍ତ୍ତି ଗଠନ କରିବାରେ ଲୋକ ସମ୍ପର୍କ ଅଧିକାରୀମାନେ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିଥାନ୍ତି। ନାଲ୍‌କୋରେ ଆମେ ସ୍ପଷ୍ଟ, ନୈତିକ ମୂଲ୍ୟବୋଧ ଭିତ୍ତିକ ଯୋଗାଯୋଗ ଓ ସମସ୍ତ ଅଂଶୀଦାରଙ୍କ ସହ ସମ୍ପୃକ୍ତି ଉପରେ ଗୁରୁତ୍ବ ଦେବାକୁ ପ୍ରତିବଦ୍ଧ ରହିଛି। ଏହି ମୂଳଦୁଆ ଉପରେ କମ୍ପାନିର ଯୋଗାଯୋଗ ରଣନୀତି କାର୍ଯ୍ୟ କରୁଛି। ଏକ ସଂସ୍ଥା ଓ ସାଧାରଣ ଜନତାଙ୍କ ମଧ୍ୟରେ ରହିଥିବା ଅନ୍ତରକୁ ଦୂର କରିବାରେ ଲୋକ ସମ୍ପର୍କ ଅଧିକାରୀ ଗୁରୁତ୍ବପୂର୍ଣ୍ଣ କାର୍ଯ୍ୟ କରିଥାନ୍ତି। କଠିନ ପରିଶ୍ରମ ଓ ସମର୍ପଣ ଭାବ ଜରିଆରେ ସେମାନେ ନିଷ୍ଠାର ସହ ଏହି କାର୍ଯ୍ୟକୁ ସମ୍ପାଦନ କରୁଥିବାରୁ ଲୋକଙ୍କ ଭିତରେ ବ୍ରାଣ୍ଡ୍‌କୁ ନେଇ ଏକ ସକାରାତ୍ମକ ଭାବମୂର୍ତ୍ତି ସୃଷ୍ଟି ହୋଇଥାଏ। ଲୋକ ସମ୍ପର୍କ ହେଉଛି ବିଶ୍ବାସକୁ ସୁଦୃଢ଼ କରିବା, ସମ୍ପର୍କ ଗଠନ କରିବା ଏବଂ କମ୍ପାନିର ମୂଲ୍ୟବୋଧ ଓ ଲକ୍ଷ୍ୟ ଅନୁସାରେ ଭାବମୂତ୍ତି ଉପସ୍ଥାପନ କରିବାକୁ ସୁନିଶ୍ଚିତ କରିବା। ବିଗତ କିଛି ବର୍ଷ ମଧ୍ୟରେ ନାଲ୍‌କୋ ଉତ୍କର୍ଷ କ୍ଷେତ୍ରରେ ଗୁରୁତ୍ବପୂର୍ଣ୍ଣ ମାଇଲଖୁଣ୍ଟ ହାସଲ କରିଛି। ଏହା ହେଉଛି ଆମ ମିଳିତ ପ୍ରୟାସ ଓ ଆମ ଟିମ୍‌ର ସମର୍ପଣ ଭାବର ପ୍ରମାଣ। ଆମେ ଆଗକୁ ବଢ଼ିବା ଜାରି ରଖିଥିବା ବେଳେ ଆମର ଲୋକ ସମ୍ପର୍କ ଖୋଲା ଯୋଗାଯୋଗ, ଅଭିନବ ରଣନୀତି ଓ ଗୋଷ୍ଠୀ ସମ୍ପୃକ୍ତି ଉପରେ ପର୍ଯ୍ୟବସିତ ରହିବ।
-ଆଶୁତୋଷ ରଥ,
ଗ୍ରୁପ୍‌ ମହାପ୍ରବନ୍ଧକ, (ପ୍ରଶାସନ, କର୍ପୋରେଟ୍ ଯୋଗାଯୋଗ, ପିଆର୍‌ ଓ ସିଏସ୍‌ଆର୍‌), ନାଲ୍‌କୋ

‘ସମନ୍ବିତ ଯୋଗାଯୋଗ’କୁ ଗୁରୁତ୍ବ ଦେଉଛୁ
ପରିବର୍ତ୍ତିତ ବ୍ୟବସାୟିକ ପରିସ୍ଥିତିରେ, ପୂର୍ବର ଲୋକସଂପର୍କ (ପିଆର)ର ଉଦ୍ଦେଶ୍ୟ ଏବଂ ପରିସରରେ ଗତ କିଛି ଦଶନ୍ଧି ମଧ୍ୟରେ ବଡ଼ ପରିବର୍ତ୍ତନ ଘଟିଛି। ଯାହା ଫଳରେ ଆମେ ‘କର୍ପୋରେଟ୍ ଯୋଗାଯୋଗ’, ‘ଅଂଶୀଦାର ଯୋଗାଯୋଗ’ ଆଦିକୁ ଅଗ୍ରସର ହୋଇଛୁ । ଯଦିଓ ଏହାର ମୂଳ ଉଦ୍ଦେଶ୍ୟ ଏବେ ବି ବିଭିନ୍ନ ଜନସାଧାରଣ କିମ୍ବା ଅଂଶୀଦାରଙ୍କ ସହିତ ସମ୍ପର୍କ ବିକଶିତ କରିବା ଏବଂ ବଜାୟ ରଖିବାରେ ରହିଛି, କିନ୍ତୁ ଆଜିକାଲି ଆମେ ‘ସମନ୍ବିତ ଯୋଗାଯୋଗ’କୁ ଗୁରୁତ୍ବ ଦେଉଛୁ ଯେଉଁଥିରେ କେବଳ କର୍ପୋରେଟ୍ ଦୃଷ୍ଟିକୋଣରୁ ଜନସାଧାରଣ କିମ୍ବା ଅଂଶୀଦାରମାନଙ୍କୁ ଅନ୍ତର୍ଭୁକ୍ତ କରାଯାଇନାହିଁ, ବରଂ ଆମର ଉତ୍ପାଦ ଏବଂ ସେବାର ଗ୍ରାହକ, କର୍ମଚାରୀ, ନିବେଶକ, ନିୟାମକ ସଂସ୍ଥା ଆଦିଙ୍କୁ ମଧ୍ୟ ଅନ୍ତର୍ଭୁକ୍ତ କରାଯାଇଛି। ଏଥିପାଇଁ ଆମକୁ ଏବେ ନିବେଶକ ସମ୍ପର୍କ, ମାନବ ସମ୍ବଳ, ମାର୍କେଟିଂ ଓ ବିକ୍ରୟ ଇତ୍ୟାଦି କାର୍ଯ୍ୟ ସହିତ ନିବିଡ଼ ଭାବେ କାର୍ଯ୍ୟ କରିବାକୁ ପଡ଼ୁଛି। କର୍ପୋରେଟ ଏବଂ ଏହାର ଅଂଶୀଦାରଙ୍କ ମଧ୍ୟରେ ଥିବା ବ୍ୟବଧାନକୁ ଦୂର କରିବାରେ ଯୋଗାଯୋଗ ପେସାଦାରଙ୍କ ଭୂମିକା ଗୁରୁତ୍ୱପୂର୍ଣ୍ଣ।
-ସୌମିତ୍ର ପଟ୍ଟନାୟକ, କର୍ପୋରେଟ ଯୋଗାଯୋଗ ମୁଖ୍ୟ,
ଓଡ଼ିଶା, ଆର୍ସେଲର ମିତ୍ତଲ ନିପ୍ପନ ଷ୍ଟିଲ୍‌ ଇଣ୍ଡିଆ

ସର୍ବୋଚ୍ଚ ନୈତିକ ମାନଦଣ୍ଡକୁ ବଜାୟ ରଖିଥାଉ
ଆଜିର ପରିସ୍ଥିତିକୁ ପରିଚାଳନା କରିବାରେ ଲୋକସଂପର୍କ ଅଧିକାରୀଙ୍କ ଭୂମିକା ଗୁରୁତ୍ୱପୂର୍ଣ୍ଣ। ମୋର ଉନ୍ନତ ଯୋଗାଯୋଗ ଦକ୍ଷତା ମୋତେ କମ୍ପାନିର ଲକ୍ଷ୍ୟ ଓ ବାର୍ତ୍ତା ପ୍ରେରଣକୁ ସଂଯୋଜିତ କରିବାରେ ସହାୟକ ହୋଇଥାଏ। ପ୍ରେସ୍‌ ଇସ୍ତାହାର, ସୂଚନା ଏବଂ ଅନ୍ୟାନ୍ୟ କାର୍ଯ୍ୟକ୍ରମ ଜରିଆରେ ମୁଁ ସକ୍ରିୟତାର ସହିତ ଗଣମାଧ୍ୟମ ସହ ଯୋଗାଯୋଗ ରଖିଥାଏ। ସର୍ବୋଚ୍ଚ ନୈତିକ ମାନଦଣ୍ଡକୁ ବଜାୟ ରଖିବା ଏବଂ ସ୍ୱଚ୍ଛ ଯୋଗାଯୋଗକୁ ମୁଁ ସୁନିଶ୍ଚିତ କରିଥାଏ। ସଂକଟ ପରବର୍ତ୍ତୀ ବିଶ୍ଳେଷଣ ମଧ୍ୟ ଆମେ କରିଥାଉ। କମ୍ପାନିର ସଫଳତା, ମୂଲ୍ୟବୋଧ ଏବଂ ପ୍ରଭାବ ଆଦିକୁ ପ୍ରଚାର ପ୍ରସାର କରି ଦୃଢ଼ ଭାବମୂର୍ତ୍ତି ସୃଷ୍ଟି କରିବା ପାଇଁ ମୁଁ କାର୍ଯ୍ୟ କରିଥାଏ। ଲୋକଙ୍କ ସହିତ ସାମିଲ ହେବା ଏବଂ କର୍ମଚାରୀଙ୍କୁ ବ୍ରାଣ୍ଡ୍‌ ଆମ୍ବାସଡର ଭାବେ ସଶକ୍ତ କରିବା ଆମ ରଣନୀତିର ଅଂଶବିଶେଷ।
-ମାନ୍‌ସୀ ଚୌହାନ, ଲୋକସଂପର୍କ ଓ କର୍ପୋରେଟ୍‌ ଯୋଗଯୋଗ ମୁଖ୍ୟ,
ବେଦାନ୍ତ, ଝାରସୁଗୁଡ଼ା

ବ୍ରାଣ୍ଡ୍‌କୁ ଲୋକମାନେ ମନେ ପକାଇପାରିବା ଜରୁରୀ
ଜଳବାୟୁ ପରିବର୍ତ୍ତନର ମୁକାବିଲା ଦୃଷ୍ଟିରୁ ସ୍ଥାୟିତ୍ବ ଏବେ ସାରା ବିଶ୍ବରେ ଏକ ଚର୍ଚ୍ଚିତ ଶବ୍ଦରେ ପରିଣତ ହୋଇଛି। ୨୪ ବିଲିଅନ୍ ଡଲାରର ଜେଏସ୍‌ଡବ୍ଲୁ ଗ୍ରୁପ୍‌ର ଅଂଶ ହୋଇ ଆମେ ଦୃଢ଼ ଅଭିବୃଦ୍ଧି ପଥରେ ରହିଛୁ। ଭାରତର ଅଭିବୃଦ୍ଧି ସହ ଜେଏସ୍‌ଡବ୍ଲୁର ଅଭିବୃଦ୍ଧି ସମାନ୍ତରାଳ ଭାବେ ଆଗକୁ ବଢ଼ୁଛି। ଗତ ତିନି ଦଶନ୍ଧି ମଧ୍ୟରେ ଭାରତ ଏକ ଅର୍ଥନୈତିକ ମହାଶକ୍ତି ଭାବେ ଉଭା ହୋଇଥିବା ବେଳେ ଜେଏସ୍‌ଡବ୍ଲୁ ଷ୍ଟିଲ୍‌ ମଧ୍ୟ ଭାରତ ଓ ଆମେରିକାରେ ୨୯.୭ ଏମ୍‌ଟିପିଏ କ୍ଷମତାର ଏକ ଅଗ୍ରଣୀ ସମନ୍ବିତ ଇସ୍ପାତ କମ୍ପାନିରେ ପରିଣତ ହୋଇଛି। ଭାରତର ପରବର୍ତ୍ତୀ ପର୍ଯ୍ୟାୟ ଅଭିବୃଦ୍ଧିରେ ଏହାର ମୋଟ କ୍ଷମତା ୨୦୨୪-୨୫ ସୁଦ୍ଧା ୩୮.୫ ନିୟୁତ ଟନ୍‌‌ରେ ପହଞ୍ଚିବା ଆଶା କରାଯାଉଛି। ଭାରତରେ ପ୍ରକୃତି ମାତାଙ୍କୁ ପୂଜା କରିବାର ଏକ ପରମ୍ପରା ରହିଛି ଏବଂ ବ୍ୟବସାୟ ‌ନେତୃତ୍ବ ମଣ୍ଡଳୀ ଜଳବାୟୁ ପରିବର୍ତ୍ତନର ପ୍ରଭାବକୁ ନେଇ ସଚେତନ ରହିଛନ୍ତି। ଏହି ସଂସ୍କୃତିର ପ୍ରଭାବ ଲୋକ ସମ୍ପର୍କ ସମେତ ସବୁ ବିଭାଗରେ ପ୍ରତିଫଳିତ ହୋଇଛି। ମାର୍କେଟିଂ ଓ ଲୋକ ସମ୍ପର୍କ ଅଭିଯାନ ଯେତେ ଚକଚକିଆ ହୋଇଥିଲେ ସୁଦ୍ଧା, ଶେଷରେ ବ୍ରାଣ୍ଡ୍‌କୁ ଲୋକମାନେ ମନେ ପକାଇପାରିବା ଲକ୍ଷ୍ୟ ହାସଲ କରିବା ଜରୁରୀ। ଏଥିପାଇଁ ପ୍ରତିଶ୍ରୁତିକୁ ପାଳନ କରିବାକୁ ହେବ।
-ରୁପାଲୀ କର, ଲିଡ୍-ପିଆର୍‌ ଆଣ୍ଡ୍ କର୍ପୋରେଟ୍ କମ୍ୟୁନିକେସନ, ଜେଏସ୍‌ଡବ୍ଲୁ ଓଡ଼ିଶା

ଲୋକଙ୍କ ନିକଟକୁ ଠିକ୍ ବାର୍ତ୍ତା ଯିବା ଦରକାର
ପରିବର୍ତ୍ତିତ ପରିସ୍ଥିତିକୁ ସଫଳତାର ସହ ପରିଚାଳନା ପାଇଁ ନିରନ୍ତର ଶିକ୍ଷାଲାଭ କରିବାର ଆବଶ୍ୟକତା ରହିଛି। ଉଦ୍ୟୋଗ ଜଗତରେ ହେଉଥିବା ପରିବର୍ତ୍ତନ ଏବଂ ସର୍ବୋତ୍କୃଷ୍ଟ ଅଭ୍ୟାସ ସଂପର୍କରେ ଅବଗତ ରହିବାକୁ ପଡ଼ିଥାଏ। ସାମ୍ବାଦିକ, ଗଣମାଧ୍ୟମ ସଂସ୍ଥା ଠାରୁ ଆରମ୍ଭ କରି ସମସ୍ତ ଅଂଶୀଦାରଙ୍କ ସହିତ ଉପଯୁକ୍ତ ଯୋଗାଯୋଗ ରଖିବାକୁ ହୋଇଥାଏ। ସାମ୍ବାଦିକମାନେ ପଚାରୁଥିବା ପ୍ରଶ୍ନ ବା କରୁଥିବା ଅନୁସନ୍ଧାନ ସଂପର୍କରେ ସଠିକ୍ ମତାମତ ଓ ଉତ୍ତର ‌ପ୍ରଦାନ କରାଗଲେ ଲୋକଙ୍କ ନିକଟକୁ ଠିକ୍‌ ବାର୍ତ୍ତା ଯାଇଥାଏ। କମ୍ପାନିର ସୁଖ୍ୟାତିକୁ ପ୍ରଭାବିତ କରୁଥିବା କିମ୍ବା ପ୍ରଭାବିତ କରିବାର ଆଶଙ୍କା ଥିବା ବିଷୟକୁ ସଫଳତାର ସହିତ ଜନସଂପର୍କ ଅଧିକାରୀମାନେ ପରିଚାଳନା କରିବା ଆବଶ୍ୟକ। ଗଣମାଧ୍ୟମ ପ୍ରତିନିଧିଙ୍କ ସହିତ ଉତ୍ତମ ସଂପର୍କ ରକ୍ଷାଠାରୁ ଆରମ୍ଭ କରି ନୂଆ ଘଟଣାର ପ୍ରଚାରପ୍ରସାର କରାଯିବାର ଆବଶ୍ୟକତା ରହିଛି। ମାର୍କେଟିଂ ଟିମ୍‌ ସହିତ କାର୍ଯ୍ୟ କରିଲେ ତାହା ବ୍ରାଣ୍ଡ୍‌ର ଭାବମୂର୍ତ୍ତି ନିର୍ମାଣରେ ସହାୟକ ହୋଇଥାଏ।
-ନଳିନୀକାନ୍ତ ମିଶ୍ର, ବିଭାଗୀୟ ମୁଖ୍ୟ-ଲୋକସଂପର୍କ,
ମହାନଦୀ କୋଲ୍‌ଫିଲ୍‌ଡ୍ସ ଲିମିଟେଡ

ସଙ୍କଟ ସମୟ ପାଇଁ ପ୍ରସ୍ତୁତ ରହିବା ଆବଶ୍ୟକ
ସମୟ ସହିତ ନିଜକୁ ପରିବର୍ତ୍ତନ କରିବା ହେଉଛି ବର୍ତ୍ତମାନ ସମୟର ଆହ୍ୱାନ। ପରିବର୍ତ୍ତନ ସହିତ ଖାପ ଖୁଆଇ ଆଗକୁ ବଢ଼ିବା ଜଣେ ପିଆର୍‌ ପେସାର ବ୍ୟକ୍ତିଙ୍କୁ ସାହାଯ୍ୟ କରେ। ପିଆର୍‌ ପେସାର ବ୍ୟକ୍ତିମାନେ ବର୍ତ୍ତମାନ ସମୟର ଗୁରୁତ୍ୱପୂର୍ଣ୍ଣ ଘଟଣା ବିଷୟରେ ଅବଗତ ହେବା ପାଇଁ ନିରନ୍ତର ଚେଷ୍ଟା କରିବା ଉଚିତ, ଯାହା ସେମାନଙ୍କୁ ଆଗରେ ରଖିବ ଏବଂ ଗଣମାଧ୍ୟମ ଜଗତ ସହିତ ଉତ୍ତମ ସମ୍ପର୍କ ସ୍ଥାପନ କରିବାରେ ସାହାଯ୍ୟ କରିବ। ସଙ୍କଟ ସମସ୍ତଙ୍କ ପାଇଁ ଏବଂ ପ୍ରତ୍ୟେକ କମ୍ପାନି ପାଇଁ ଆସିଥାଏ । ଏଥିପାଇଁ ପିଆରଓମାନେ ପ୍ରସ୍ତୁତ ରହିବା ଦରକାର। ସଙ୍କଟ ସମୟରେ ଭୁଲ ସୂଚନା ଓ ଗୁଜବକୁ ଏଡ଼ାଇବା ନିମନ୍ତେ ସେମାନେ ତଥ୍ୟ ସହିତ ପ୍ରସ୍ତୁତ ରହିବା ଉଚିତ ଏବଂ ଯଦି କୌଣସି ସଙ୍କଟ ଦେଖାଦିଏ ତେବେ ଏହାର ମୁକାବିଲା ପାଇଁ ସଂଗଠନ ଦ୍ୱାରା ନିଆଯାଇଥିବା ପଦକ୍ଷେପ ବିଷୟରେ ବିସ୍ତୃତ ବିବରଣୀ ପ୍ରଦାନ କରିବା ଉଚିତ।
-ସନ୍ଦୀପ କୁମାର ସେଠୀ, ଡିଜିଏମ୍‌-କର୍ପୋରେଟ୍ ଯୋଗାଯୋଗ,
ଓଡ଼ିଶା ଖଣି ନିଗମ

ଦ୍ରୁତ ଓ ସ୍ବଚ୍ଛ ଯୋଗାଯୋଗ ସୁନିଶ୍ଚିତ କରିବା ଆବଶ୍ୟକ
ଲୋକ ସମ୍ପର୍କ ଅଧିକାରୀମାନେ ବ୍ରାଣ୍ଡର ଐତିହ୍ୟ, କାରିଗରୀ ଏବଂ ମୂଲ୍ୟବୋଧ ବିଷୟରେ ଆକର୍ଷଣୀୟ କାହାଣୀ ପ୍ରସ୍ତୁତ କରିବା ଏବଂ ଅଂଶୀଦାର କରିବାରେ ଦକ୍ଷତା ହାସଲ କରିବା ଆବଶ୍ୟକ। ବ୍ୟାପକ ଦର୍ଶକଙ୍କ ନିକଟରେ ପହଞ୍ଚିବା ଏବଂ ବ୍ରାଣ୍ଡ ପ୍ରତିଷ୍ଠା ବୃଦ୍ଧି କରିବା ପାଇଁ ପ୍ରଭାବଶାଳୀ ଏବଂ ସେଲିବ୍ରିଟିମାନଙ୍କ ସହ ସହଯୋଗ କରିବା ଉଚିତ୍। ଗୁରୁତ୍ୱପୂର୍ଣ୍ଣ ସାମୂହିକ କାର୍ଯ୍ୟକ୍ରମ ଏବଂ ସ୍ଥାୟୀତ୍ବ ପ୍ରକଳ୍ପଗୁଡିକରେ ଅଂଶଗ୍ରହଣ ଏବଂ ସମର୍ଥନ କରିବା ଜରୁରୀ ଅଟେ। ଏହାବ୍ୟତୀତ ବିଶ୍ୱସନୀୟତା ଏବଂ ବିଶ୍ୱାସ ସୃଷ୍ଟି କରିବା ପାଇଁ ଆମକୁ ଗ୍ରାହକଙ୍କ ପ୍ରଶଂସାପତ୍ର ଏବଂ ସଫଳତାର କାହାଣୀ ଉପରେ ଆଲୋକପାତ କରିବା ଆବଶ୍ୟକ। ଏଥିରେ ଯୋଗାଯୋଗ ରଣନୀତି, ମୁଖପାତ୍ର ଏବଂ ପ୍ରତିକ୍ରିୟା ପ୍ରୋଟୋକଲ୍ ସହିତ ଜଡିତ ଏକ ବିସ୍ତୃତ ସଙ୍କଟ ପରିଚାଳନା ଯୋଜନା ବିକଶିତ କରିବା ଅନ୍ତର୍ଭୁକ୍ତ । ସଙ୍କଟ ସମୟରେ ଦ୍ରୁତ ଏବଂ ସ୍ୱଚ୍ଛ ଯୋଗାଯୋଗ ସୁନିଶ୍ଚିତ କରାଯିବା ଉଚିତ୍ । କର୍ମଚାରୀଙ୍କୁ କମ୍ପାନିର ସଙ୍କଟ ବିଷୟରେ ଅବଗତ କରାଯିବା ଉଚିତ ଏବଂ ସମସ୍ତ ପ୍ରତିକୂଳ ପରିସ୍ଥିତି ରେ ଏକଜୁଟ ହେବା ଉଚିତ୍।
-ଅଂଶୁମାନ ହଂସ, ଉପସଭାପତି, ଗଣ ମାଧ୍ୟମ ଓ ଲୋକ ସମ୍ପର୍କ,
ଲାଲଚନ୍ଦ୍‌ ଜୁଏଲର୍ସ

ଭାବମୂର୍ତ୍ତି ବଢ଼ାଇବାରେ ଲୋକ ସମ୍ପର୍କର ଭୂମିକା ଗୁରୁତ୍ବପୂର୍ଣ୍ଣ
ଶିଳ୍ପ ଓ ଗଣମାଧ୍ୟମ ଜଗତରେ ଦ୍ରୁତ ଗତି‌ରେ ପରିବର୍ତ୍ତନ ଘଟୁଛି। ଜଣେ ଲୋକ ସମ୍ପର୍କ ଅଧିକାରୀ ଭାବେ ସେହି ପରିବର୍ତ୍ତନଗୁଡ଼ିକୁ ଜାଣିବା ଜରୁରୀ ଯାହା ଦ୍ବାରା ପ୍ରଭାବଶାଳୀ ଯୋଗାଯୋଗ ରଣନୀତି ପ୍ରସ୍ତୁତ କରାଯାଇପାରିବ। ଡିଜିଟାଲ୍ ଟୁଲ୍, ସୋସିଆଲ୍‌ ମିଡିଆ, ଡାଟା ଆନାଲିଟିକ୍ସ ଆଦିକୁ ବ୍ୟବହାର କରି କର୍ପୋରେଟ୍ ସଂସ୍ଥାର ଲୋକପ୍ରିୟତା ଓ ଅଂଶୀଦାରଙ୍କ ସହ ସମ୍ପର୍କକୁ ପ୍ରଭାବଶାଳୀ ଢଙ୍ଗରେ ବଜାୟ ରଖାଯାଇପାରିବ। ବିଶ୍ବାସର ଏକ ବାତାବରଣ ସୃଷ୍ଟି କରିବା ଲାଗି ଲୋକ ସମ୍ପର୍କ ଅଧିକାରୀଙ୍କୁ ସର୍ବଦା ସଠିକ ଓ ଠିକ୍ ସମୟରେ ସୂଚନା ଦେବାକୁ ହେବ। ମିଥ୍ୟା ଖବରର ମୁକାବିଲାରେ ତାହା ସୁଦୂର ପ୍ରସାରୀ ସାବ୍ୟସ୍ତ ହେବ। କିସ୍ ଓ କିଟ୍‌ର ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ନେତୃତ୍ବରେ କାର୍ଯ୍ୟ କରିବା ମୋ ପାଇଁ ସୌଭାଗ୍ୟର ବିଷୟ। ସେ ଗଣତନ୍ତ୍ର ଚତୁର୍ଥ ସ୍ତମ୍ଭ ଗଣମାଧ୍ୟମକୁ ସମ୍ମାନ କରନ୍ତି। ତାଙ୍କ ଦୂରଦୃଷ୍ଟିରେ ଅନୁପ୍ରାଣିତ ହୋଇ ଆମେ ସାମ୍ବାଦିକ ଓ ଗଣମାଧ୍ୟମ ସଂସ୍ଥାଗୁଡ଼ିକ ସହ ଗଠନମୂଳକ ସମ୍ପର୍କ ସ୍ଥାପନ କରିବା ଉପରେ ଗୁରୁତ୍ବାରୋପ କରୁଛୁ। ସଂସ୍ଥାର ଭାବମୂର୍ତ୍ତିକୁ ବଢ଼ାଇବାରେ ଲୋକ ସମ୍ପର୍କ ଅଧିକାରୀଙ୍କ ଗୁରୁତ୍ବପୂର୍ଣ୍ଣ ଭୂମିକା ରହିଛି।
-ଶ୍ରଦ୍ଧାଞ୍ଜଳି ନାୟକ, ନିର୍ଦ୍ଦେଶକ-ଲୋକସମ୍ପର୍କ, କିଟ୍

ଆଖି ଓ କାନ ଖୋଲା ରଖିବାକୁ ପଡ଼ିବ
ଯେକୌଣସି ସଂସ୍ଥା ପାଇଁ ଲୋକ ସମ୍ପର୍କ ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକଳାପ ଏବଂ ଲୋକ ସମ୍ପର୍କ ଅଧିକାରୀ ହେଉଛନ୍ତି କୌଣସି ସଂଗଠନର ଚେହେରା। ସେ ହେଉଛନ୍ତି ସେହି ବ୍ୟକ୍ତି ଯିଏ ତାଙ୍କ ନେଟ୍‌ୱାର୍କ ଏବଂ ଜ୍ଞାନ ମାଧ୍ୟମରେ ସମାଜରେ ସଂଗଠନକୁ ପ୍ରତିଷ୍ଠିତ ଛବି ପ୍ରଦାନ କରିଥାନ୍ତି। ଯଦି କୌଣସି କମ୍ପାନିର ମୂଳଦୁଆ ସୁପରିଚାଳିତ ଲୋକ ସମ୍ପର୍କ ଉପରେ ଠିଆ ହୋଇଥାଏ, ତେବେ ତାହା ଏହାର ଗ୍ରାହକ ଏବଂ ଅଂଶୀଦାରମାନଙ୍କୁ ସେବା କରିବାର ପ୍ରୟାସରେ ବିଫଳ ହୁଏ ନାହିଁ । ଆଜିର ତୀବ୍ର ପ୍ରତିଦ୍ବନ୍ଦ୍ବିତାପୂର୍ଣ୍ଣ ଓ ଏବଂ ସୋସିଆଲ ମିଡିଆ ଯୁଗରେ ଜଣେ ଲୋକ ସମ୍ପର୍କ ଅଧିକାରୀ ଭାବେ କାମ ବହୁତ କଷ୍ଟକର ଏବଂ ତାଙ୍କୁ ନିୟମିତ ଭାବରେ ନିଜର ଦକ୍ଷତା ଉନ୍ନତ କରିବାକୁ ପଡିବ। ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ଦ୍ୱାରା ନିୟନ୍ତ୍ରିତ ଫେକ୍ ନ୍ୟୁଜ୍ (ମିଥ୍ୟା ଖବର) ମିଡିଆ ସଂଗଠନ ପାଇଁ ଏକ ବିପଦ, ତେଣୁ ଜଣେ ଲୋକ ସମ୍ପର୍କ ଅଧିକାରୀଙ୍କୁ ନିଜ କାନ ଓ ଆଖି ଖୋଲା ରଖିବାକୁ ପଡିବ ଏବଂ ପରିସ୍ଥିତିର ସଠିକ ବିଶ୍ଳେଷଣ କରିବାକୁ ପଡିବ।
ସୁଧୀ ରଞ୍ଜନ ମିଶ୍ର, ମୁଖ୍ୟ-କର୍ପୋରେଟ୍ ବ୍ୟାପାର, ପାରାଦୀପ ଫସ‌୍‌ଫେଟ୍‌ସ ଲିମିଟେଡ୍‌

ପିଆର୍‌ ପେସାଦାରଙ୍କ କାର୍ଯ୍ୟକୁ ସ୍ବୀକୃତି ଆବଶ୍ୟକ
ଗବେଷଣା ଅନୁଯାୟୀ, ଓଡ଼ିଶାରେ ଲୋକସଂପର୍କ କ୍ଷେତ୍ର ଗତ କିଛିବର୍ଷ ମଧ୍ୟରେ ବଡ଼ ରୂପାନ୍ତର ଦେଇ ଗତିକରିଛି। ରାଜ୍ୟରେ ଶିଳ୍ପ ଅଭିବୃଦ୍ଧି ଏବଂ ଗଣମାଧ୍ୟମ ସଂଖ୍ୟା ବୃଦ୍ଧି କାରଣରୁ ଏହି ପେସା ପ୍ରତି ଆଗ୍ରହୀ ବ୍ୟକ୍ତିଙ୍କ ପାଇଁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହୋଇଛି। ଏହା ସତ୍ତ୍ବେ ରାଜ୍ୟରେ ଲୋକସଂପର୍କ କ୍ଷେତ୍ର ଅନେକ ସମସ୍ୟା ଦେଇ ଗତି କରୁଛି। ସେଗୁଡ଼ିକ ମଧ୍ୟରେ ଏକ ପ୍ରମୁଖ ସମସ୍ୟା ହେଲା ବିଭିନ୍ନ ସଂସ୍ଥାରେ କାର୍ଯ୍ୟ କରୁଥିବା ଏହି ପେସାର ବ୍ୟକ୍ତିମାନେ ନିର୍ଦ୍ଦିଷ୍ଟଭାବେ କି କାର୍ଯ୍ୟ କରିବେ ତାହା ନିର୍ଦ୍ଧାରିତ ହୋଇନାହିଁ। ଅନ୍ୟ ଏକ ବି‌ଷୟ ହେଲା ଏ କ୍ଷେତ୍ରରେ କାର୍ଯ୍ୟ କରୁଥିବା ବ୍ୟକ୍ତିମାନଙ୍କ କାର୍ଯ୍ୟର ଯୋଗ‌ଦାନକୁ ସେତେଟା ଗୁରୁତ୍ବ କିମ୍ବା ଅଧିକାରୀମାନଙ୍କୁ ଆବଶ୍ୟକ ସ୍ବୀକୃତି ମିଳି ନଥାଏ। ତେଣୁ ଏ କ୍ଷେତ୍ରରେ କାର୍ଯ୍ୟ କରୁଥିବା ଅନେକ ବ୍ୟକ୍ତିଙ୍କ ଚାକିରି କ୍ୟାରିୟରେ ଯେଭଳି ଅଗ୍ରଗତି ହେବା କଥା ତାହା ବହୁ ସମୟରେ ହୋଇ ନଥାଏ। ଲୋକସଂପର୍କ ପେସାରେ ଥିବା ବ୍ୟକ୍ତିମାନଙ୍କୁ ଗୁରୁତ୍ବପୂର୍ଣ୍ଣ ସହଯୋଗୀ ଭାବେ ବିଚାର କରାଗଲେ ଅନୁଷ୍ଠାନଗୁଡ଼ିକ ସେମାନଙ୍କ ସାମର୍ଥ୍ୟର ସଂପୂର୍ଣ୍ଣ ଉପଯୋଗ କରିପାରିବେ, ଯାହା ଅନୁଷ୍ଠାନର ଖ୍ୟାତିକୁ ବଢ଼ାଇବ।
-ସଞ୍ଜୟ କୁମାର ସାହୁ, ଡିଜିଏମ୍‌, କର୍ପୋରେଟ୍ କମ୍ୟୁନିକେସନ୍ସ, ଜେଏସ୍‌ପିଏଲ୍‌

ସର୍ବୋଚ୍ଚ ମାନଦଣ୍ଡ ବଜାୟ ରଖିବାକୁ ପ୍ରତିବଦ୍ଧ
ଚଳିତ ବର୍ଷ ଏମ୍‌ଜିଏମ୍‌ ମିନେରାଲ୍‌ସ ନୂତନ ଉଚ୍ଚତାରେ ପହଞ୍ଚିଛି। କମ୍ପାନି ଉଲ୍ଲେଖନୀୟ ମାଇଲଖୁଣ୍ଟ ହାସଲ କରିଛି ଯାହା ଆମର ଉତ୍ସାହ, ଉଦ୍ଭାବନ ଏବଂ ସମର୍ପଣକୁ ପ୍ରତିଫଳିତ କରୁଛି। ଅବିଶ୍ୱସନୀୟ ଦଳ ଏବଂ ବିଶ୍ୱସ୍ତ ଗ୍ରାହକଙ୍କ ସହଯୋଗ ଏବଂ ସମର୍ଥନ ବିନା ଏହି ସଫଳତା ସମ୍ଭବ ହୋଇନଥାନ୍ତା। ଆମେ ଆଗକୁ ବଢ଼ୁଥିବା ବେଳେ ଆମର ଲୋକ ସମ୍ପର୍କ ଟିମ୍‌ ଯୋଗାଯୋଗ ରଣନୀତିକୁ ଆଗକୁ ବଢ଼ାଇବା, ଆମ ସମୁଦାୟ ସହିତ ଜଡ଼ିତ ହେବା ଏବଂ କମ୍ପାନିର ପରମ୍ପରାକୁ ବଜାୟ ରଖିବାକୁ ଆମେ ପ୍ରତିଶ୍ରୁତିବଦ୍ଧ। ଏହି ସ୍ୱତନ୍ତ୍ର ଦିନରେ ଆସନ୍ତୁ ଲୋକ ସମ୍ପର୍କର ସର୍ବୋଚ୍ଚ ମାନଦଣ୍ଡ ବଜାୟ ରଖିବା ପାଇଁ ଆମର ପ୍ରତିବଦ୍ଧତାକୁ ନବୀକରଣ କରିବା। ଆସନ୍ତୁ ଏମ୍‌ଜିଏମ୍‌ ମିନେରାଲ୍‌ସ ଏବଂ ଆମେ ସେବା କରୁଥିବା ସମସ୍ତଙ୍କ ଉଜ୍ଜ୍ୱଳ ଭବିଷ୍ୟତ ଗଠନରେ କାହାଣୀ ଏବଂ ପ୍ରଭାବଶାଳୀ ଯୋଗାଯୋଗର ଶକ୍ତିକୁ ପାଳନ କରିବା।
ଉତ୍ତମ କୁମାର ନାୟକ, କର୍ପୋରେଟ୍ ଯୋଗାଯୋଗ,
ଏମ୍‌ଜିଏମ୍ ମିନେରାଲ୍‌ସ

ସଙ୍କଟ ପରିଚାଳନା ବେଳେ ଶୀଘ୍ର କାମ କରିବା ଆବଶ୍ୟକ
ଜଣେ ଲୋକ ସମ୍ପର୍କ ଅଧିକାରୀ ଭାବେ ଆଜିର ଦ୍ରୁ୍ତ ପରିବର୍ତ୍ତନଶୀଳ କର୍ପୋରେଟ୍ ଦୁନିଆରେ ଆମେ ଦୈନନ୍ଦୀନ ଜୀବନରେ ଆଧୁନିକ ଲୋକ ସମ୍ପର୍କ ପଦ୍ଧତି ଓ ଟୁଲ୍‌କୁ ବ୍ୟବହାର କରୁଛୁ। କାମକୁ ସହଜରେ କରିବା ଏବଂ କର୍ମ-ଜୀବନ ସନ୍ତୁଳନକୁ ବଜାୟ ରଖିବାକୁ ଏହା ସହଜ କରୁଛି। ଗଣମାଧ୍ୟମର ବ୍ୟକ୍ତିବିଶେଷଙ୍କ ସମେତ ସମସ୍ତ ଅଂଶୀଦାରମାନଙ୍କ ସହ ସମ୍ପର୍କକୁ ବଜାୟ ରଖିବା ଲାଗି ଅନ୍ୟ କୌଣସି ବିଜ୍ଞାନ ନାହିଁ। ଜଣେ ଲୋକ ସମ୍ପର୍କ ପେସାର ବ୍ୟକ୍ତି ନିଜର ସବୁଠୁ ଉପଯୁକ୍ତ ଟୁଲ୍‌କୁ ବ୍ୟବହାର କରି ସେମାନଙ୍କ ସହତ ପରିଚିତ ହୋଇଥାନ୍ତି। ଜଣେ ଲୋକ ସମ୍ପର୍କ ଅଧିକାରୀଙ୍କୁ ସଙ୍କଟ ପରିଚାଳନା କରିବା ବେଳେ ଶୀଘ୍ର, ସ୍ପଷ୍ଟ ଏବଂ ଦୟାପୂର୍ବକ କାର୍ଯ୍ୟ କରିବା ଆବଶ୍ୟକ। ଏକ ସୁସ୍ପଷ୍ଟ ବାର୍ତ୍ତା ସୃଷ୍ଟି କରି ତାହାକୁ ବିଭିନ୍ନ ମାଧ୍ୟମରେ ପ୍ରସାର କରିବା ସହ ଏକ ସମସ୍ୟା ସମ୍ପର୍କରେ ଖୋଲାଖୋଲି ଭାବେ ଆଲୋଚନା କରିବାକୁ ପଡ଼ିବ। ସଙ୍କଟ ସମୟ ପାଇଁ ଏକ ଯୋଗାଯୋଗ ଦଳ ଗଠନ କରିବା ସହ ସୋସିଆଲ ମିଡିଆ ଉପରେ ନଜର ରଖିବା ଏବଂ ରଣନୀତିକୁ ବଦଳାଇବା ଜରୁରୀ। ଏକ କମ୍ପାନିର ଭାବମୂର୍ତ୍ତି ଗଠ‌ନରେ ଲୋକ ସମ୍ପର୍କ ଅଧିକାରୀ ବଡ଼ ଭୂମିକା ନିର୍ବାହ କରିଥାନ୍ତି।
ପ୍ରଦୀପ କୁମାର ବେହେରା, ଅଧିକାରୀ-ଲୋକସମ୍ପର୍କ, ଇମ୍ଫା

ଭୁଲ ସୂଚନା ଉପରେ ନଜର ରଖିବାକୁ ହେବ
ଲୋକସଂପର୍କ କ୍ଷେତ୍ରରେ ହେଉଥିବା ପରିବର୍ତ୍ତନକୁ ଆମେ ସର୍ବଦା ନଜର ରଖୁ। ଗଣମାଧ୍ୟମ ସହିତ ଉତ୍ତମ ସଂପର୍କ ରଖି ଏବଂ ସେମାନଙ୍କ ମନୋଭାବକୁ ବୁଝି ରଣନୀତି ପ୍ରସ୍ତୁତ କରୁ। କମ୍ପାନିର ବ୍ରାଣ୍ଡ୍‌କୁ ସୁଦୃଢ଼ କରିବା ପାଇଁ ସିଏସ୍‌ଆର୍‌ କାର୍ଯ୍ୟକ୍ରମ ଉପରେ ବି ଗୁରୁତ୍ବ ଦେଇଥାଉ। ସାମ୍ବାଦିକ ଏବଂ ଗଣମାଧ୍ୟମ ସଂସ୍ଥାର ପ୍ରତିନିଧିଙ୍କ ସହିତ ବ୍ୟକ୍ତିଗତ ଭାବେ ସଂପର୍କ ସ୍ଥାପନ କରି କମ୍ପାନି ପାଇଁ କାର୍ଯ୍ୟ କରିଥାଉ। ଗଣମାଧ୍ୟମରେ ଆମ ସଂସ୍ଥା ସଂପର୍କରେ ପ୍ରକାଶ ପାଉଥିବା ଖବର ଉପରେ ନଜର ରଖେ ଏବଂ ଭୁଲ ସୂଚନା ଯେଭଳି ନଆସେ ତାହା ଉପରେ ସ୍ବତନ୍ତ୍ର ଧ୍ୟାନ ଦେଇଥାଏ। ସାଧାରଣରେ କମ୍ପାନିର ଭାବମୂର୍ତ୍ତିକୁ ଅତୁଟ ରଖିବା ହେଉଛି ଲୋକସଂପର୍କ ଅଧିକାରୀମାନଙ୍କର ଏକ ବଡ଼ କାର୍ଯ୍ୟ। ସେଥିପାଇଁ ସମସ୍ତ ପ୍ରକାର ପ୍ରଚେଷ୍ଟା କରିଥାଏ। ଲୋକଙ୍କ ମତାମତ ଜାଣିବା ପାଇଁ ଆମେ ଉଭୟ ଅଫଲାଇନ ଓ ଅନଲାଇନରେ ପ୍ରକାଶ ପାଉଥିବା ଖବର ବା ସୂଚନାକୁ ଉପଯୋଗ କରିଥାଉ। ଯେଉଁଠି ଉନ୍ନତି ଆଣିବାର ଆବଶ୍ୟକତା ଥାଏ ତାହାକୁ କାର୍ଯ୍ୟକାରୀ କରୁ।
-ମେଜର ଜୟନ୍ତ କୁମାର ଦାସ, ଲୋକସଂପର୍କ ଓ କର୍ପୋରେଟ ଯୋଗାଯୋଗ ମୁଖ୍ୟ, ଫାକର

ଦୃଢ଼ ସମ୍ପର୍କ ସ୍ଥାପନ ଓ ବଜାୟ ରଖିବା ଗୁରୁତ୍ୱପୂର୍ଣ୍ଣ
ପ୍ରଭାବଶାଳୀ ଯୋଗାଯୋଗ ଏବଂ ପ୍ରତିଷ୍ଠା ପରିଚାଳନା ପାଇଁ ସାମ୍ବାଦିକ ଏବଂ ମିଡିଆ ହାଉସ୍ ସମେତ ବିଭିନ୍ନ ଅଂଶୀଦାରଙ୍କ ସହିତ ଦୃଢ଼ ସମ୍ପର୍କ ସ୍ଥାପନ ଏବଂ ବଜାୟ ରଖିବା ଗୁରୁତ୍ୱପୂର୍ଣ୍ଣ। ବିଭିନ୍ନ ଅଂଶୀଦାରଙ୍କ ସହ ଜଡ଼ିତ ହେବା ପାଇଁ ଏକ ସୂକ୍ଷ୍ମ ଆଭିମୁଖ୍ୟ ଆବଶ୍ୟକ। ଗଣମାଧ୍ୟମ ସହିତ ସୁଦୃଢ଼ ସମ୍ପର୍କ ସ୍ଥାପନ ଏବଂ ବଜାୟ ରଖିବା ଜରୁରୀ ଏବଂ ସର୍ବଦା ମୋର ପ୍ରାଥମିକତା । ଏଥିରେ ନିୟମିତ ଭାବେ ସାମ୍ବାଦିକମାନଙ୍କ ସହ ଯୋଗାଯୋଗ କରିବା, ଆମର ଭଲ କାମର ପ୍ରେସ୍ ରିଲିଜ୍ ଜାରି କରିବା, ସିଏସ୍ଆର୍ ପଦକ୍ଷେପ ଏବଂ ଆମ କମ୍ପାନି ଦ୍ୱାରା କରାଯାଇଥିବା ଅନ୍ୟାନ୍ୟ ଉନ୍ନୟନମୂଳକ କାର୍ଯ୍ୟ ଆଦି ସାମିଲ ରହିଛି। କମ୍ପାନିର ସାର୍ବଜନୀନ ଭାବମୂର୍ତ୍ତି ବଢ଼ାଇବାରେ ମୋର ଭୂମିକାରେ ଏକ ବହୁମୁଖୀ ଆଭିମୁଖ୍ୟ ଅନ୍ତର୍ଭୁକ୍ତ ରହିଛି ଯାହା ରଣନୈତିକ ଯୋଗାଯୋଗ, ସମ୍ପର୍କ ଗଠନ ଏବଂ ପ୍ରତିଷ୍ଠା ପରିଚାଳନାକୁ ସମନ୍ୱିତ କରୁଛି। ମୁଁ ଗଣମାଧ୍ୟମ ଖବର ଉପରେ ନଜର ରଖେ ଏବଂ କୌଣସି ସମ୍ଭାବ୍ୟ ସମସ୍ୟାକୁ ବୃଦ୍ଧି କରିବା ପୂର୍ବରୁ ତାହାର ସମାଧାନ କରିବାକୁ ପ୍ରୟାସ କରିଥାଏ। ସକ୍ରିୟ ପ୍ରତିଷ୍ଠା ପରିଚାଳନାରେ ନିୟମିତ ମୂଲ୍ୟାଙ୍କନ ଏବଂ କୌଣସି ନକାରାତ୍ମକ ଧାରା କିମ୍ବା ମତାମତ ପ୍ରତି ଠିକ୍ ସମୟରେ ପ୍ରତିକ୍ରିୟା ଦେବାକୁ ହେବ ।
-ବିଘ୍ନେଶ୍ବର ପଣ୍ଡା, କର୍ପୋରେଟ୍ ବ୍ୟାପାର, ଯୋଗାଯୋଗ ଓ ସିଏସ୍‌ଆର୍‌ ମୁଖ୍ୟ, ହିଣ୍ଡାଲ୍‌କୋ

ସକ୍ରିୟ ରଣନୀତି ଉପରେ କାର୍ଯ୍ୟ କରିବା ଆବଶ୍ୟକ
ଆଜିର ଚଳଚଞ୍ଚଳ କର୍ପୋରେଟ୍ ଜଗତରେ ଜନସମ୍ପର୍କ ଅଧିକାରୀମାନେ ଅତ୍ୟନ୍ତ ଫୂର୍ତ୍ତିଶୀଳ ଏବଂ ସର୍ବଦା ସତର୍କ ରହିବା ଉଚିତ। ବିଶ୍ୱାସ ଏବଂ ପାରସ୍ପରିକ ସମ୍ମାନ ଉପରେ ନିର୍ମିତ ଦୃଢ଼, ସ୍ୱଚ୍ଛ ସମ୍ପର୍କକୁ ପ୍ରୋତ୍ସାହିତ କରି ଏହି ଅଧିକାରୀମାନେ ବିଭିନ୍ନ ଅଂଶୀଦାରଙ୍କ ସହିତ ସକ୍ରିୟ ଭାବରେ ଜଡ଼ିତ ରହିବା ଉଚିତ୍। କଂପାନିର ପ୍ରତିଷ୍ଠାକୁ ପ୍ରଭାବିତ କରିବା ଆଶଙ୍କା ଥିବା ସଙ୍କଟଗୁଡ଼ିକୁ ପରିଚାଳନା ଓ ହ୍ରାସ ପାଇଁ, ଲୋକସଂପର୍କ ଅଧିକାରୀଙ୍କୁ ନିରନ୍ତର ତଦାରଖ, ଦ୍ରୁତ ଓ ସଠିକ୍ ଯୋଗାଯୋଗ ସମେତ ସକ୍ରିୟ ରଣନୀତି ଉପରେ କାର୍ଯ୍ୟ କରିବା ଆବଶ୍ୟକ। କମ୍ପାନିର ସାର୍ବଜନୀନ ଭାବମୂର୍ତ୍ତିକୁ ବଢ଼ାଇବା ଲାଗି ମାର୍କେଟିଂ ଏବଂ ବ୍ରାଣ୍ଡିଂ ଟିମ୍ ସହିତ ଘନିଷ୍ଠ ସହଯୋଗ ରଖି କାର୍ଯ୍ୟ କରିବାକୁ ହେବ। ଏଥିସହିତ ଯୋଗାଯୋଗର ସମସ୍ତ ମାଧ୍ୟମରେ କମ୍ପାନି ସଂପର୍କରେ ସକାରାତ୍ମକ ଏବଂ ନିରନ୍ତର ବାର୍ତ୍ତା ପ୍ରସାରକୁ ନିଶ୍ଚିତ କରିବାକୁ ହେବ। ନିୟମିତ ବିଶ୍ଳେଷଣ ଏବଂ ମତାମତ ମାଧ୍ୟମରେ ଜନସାଧାରଣଙ୍କ ଧାରଣା ସହିତ ଯୋଡ଼ି ହୋଇ ରହିଲେ ଜନସଂପର୍କ ଅଧିକାରୀମାନେ ଯେକୌଣସି ସମସ୍ୟାର ତୁରନ୍ତ ସମାଧାନ କରିପାରିବେ।
-ଶୁଭ୍ରାଂଶୁ ଶେଖର ପଣ୍ଡା, କର୍ପୋରେଟ ଯୋଗାଯୋଗ ମୁଖ୍ୟ, ଟାଟା ଷ୍ଟିଲ

ବୁଝି ହେଉଥିବା ଲକ୍ଷ୍ୟ ଧାର୍ଯ୍ୟ କରିବା ଦରକାର
ଲୋକ ସମ୍ପର୍କ ପେସାରେ ଥିବା ବ୍ୟକ୍ତି ସାଧାରଣତଃ ନିଜ କ୍ଲାଏଣ୍ଟ, ଗଣମାଧ୍ୟମ ଓ ସହକର୍ମୀଙ୍କ ସହ ନେଟ୍‌ୱର୍କିଂ ଓ ସାମାଜିକ ଭାବ ଜରିଆରେ ଏକ ସମ୍ପର୍କ ଗଠନ ଓ ବଜାୟ ରଖିବାକୁ କାର୍ଯ୍ୟ କରିଥାନ୍ତି। ସେମାନେ ସର୍ବସାଧାରଣ ନିଜ ସଂସ୍ଥାର ଏକ ସକାରାତ୍ମକ ଓ ବିଶ୍ବସନୀୟ ଚିତ୍ରର ପ୍ରସାର କରୁଥିବା ବେଳେ ଯୋଜନାବଦ୍ଧ ଅଭିଯାନ ଜରିଆରେ ମଧ୍ୟ ସଂସ୍ଥାକୁ ସାହାଯ୍ୟ କରିଥାନ୍ତି। ସାଧାରଣ ଜନତାଙ୍କଠାରୁ ଆରମ୍ଭ କରି କ୍ଲାଏଣ୍ଟ, ଗ୍ରାହକ, ନିବେଶକ ଓ ଅନ୍ୟ ଅଂଶୀଦାରମାନଙ୍କ ସହ ସେମାନେ ସଂସ୍ଥାକୁ ନେଇ ଏକ ସକାରାତ୍ମକ ଧାରଣା ସୃଷ୍ଟି କରନ୍ତି ଓ ତାହାକୁ ବଜାୟ ରଖିଥାନ୍ତି। ଜଣେ ଲୋକ ସମ୍ପର୍କ ପେସାଦାର ଭଲ ଭାବେ ବୁଝି ହେଉଥିବା ଲକ୍ଷ୍ୟ ଧାର୍ଯ୍ୟ କରିବା ଦରକାର ଯାହା ସଂସ୍ଥାର ରଣନୀତି ଓ ଉଦ୍ଦେଶ୍ୟ ସହ ସମନ୍ବିତ ରହିଥିବ। ମିଳିତ ଭାବେ କାର୍ଯ୍ୟ କରିବା ଓ ଦଳର ସବୁ ସଦସ୍ୟଙ୍କୁ ଗୋଟିଏ ପାର୍ଶ୍ବରେ ରଖିବା ଲାଗି ତାହା କରିବା ଜରୁରୀ। ଦଳର ସବୁ ସଦସ୍ୟ ନିର୍ଧାରଣ କରାଯାଇଥିବା ଲକ୍ଷ୍ୟକୁ ହାସଲ କରିବା ଦିଗରେ କାର୍ଯ୍ୟ କରିବା ଦରକାର। ସମସ୍ତଙ୍କୁ ନିଜ ନିଜ ଭୂମିକା ନିର୍ବାହ କରିବାକୁ ପଡ଼ିବ। ସର୍ବେକ୍ଷଣ, ପ୍ରଶ୍ନୋତ୍ତର, ସୋସିଆଲ ମିଡିଆ ଆନାଲିଟିକ୍ସ, ଫୋକସ୍ ଗ୍ରୁପ୍ ଓ ସାକ୍ଷାତକାର ଆଦି ଜରିଆରେ ‌ସଂସ୍ଥା ସମ୍ପର୍କରେ ମତାମତ ସଂଗ୍ରହ କରି ରଣନୀତି ପ୍ରସ୍ତୁତ କରାଯାଇପାରିବ।
-ରତିକାନ୍ତ ନାୟକ, ମୁଖ୍ୟ ପ୍ରବନ୍ଧକ, ପାରାଦୀପ ପୋର୍ଟ ଟ୍ରଷ୍ଟ