ନୂଆଦିଲ୍ଲୀ: ବ୍ରାଜିଲ୍‌ରେ ଚାଲିଥିବା ବିଶ୍ବ ବକ୍ସିଂ କପ୍‌ର ଫାଇନାଲ୍‌ରେ ପହଞ୍ଚି ଜାତୀୟ ବିଜେତା ହିତେଶ ଇତିହାସ ରଚିଛନ୍ତି। ପ୍ରଥମ ଭାରତୀୟ ଭା‌ବେ ସେ ଏହି ଗୌରବ ପାଇଛନ୍ତି। ଶୁକ୍ରବାର ୭୦ କେଜି ସେମିଫାଇନାଲ୍‌ରେ ହିତେଶ ୫-୦ରେ ଫ୍ରାନ୍ସର ମାକନ ତ୍ରାଓରେଙ୍କୁ ହରାଇ ଦେଇଛନ୍ତି। ଫାଇନାଲ୍‌ରେ ସେ ଇଂଲଣ୍ଡର ଓଡେଲ କାମାରାଙ୍କୁ ଭେଟିବେ। ତେବେ ସେମିଫାଇନାଲ୍‌ରେ ପହଞ୍ଚିଥିବା ଯଦୁମଣି ସିଂହ ମଣ୍ଡେଙ୍ଗବାମ (୫୦ କେଜି) କଡ଼ା ସଂଘର୍ଷ କରି ୨-୩ରେ ପୂର୍ବତନ ୨୨ ବର୍ଷରୁ କମ୍‌ ଏସୀୟ ବିଜେତା ଉଜବେକିସ୍ତାନର ଆସିଲବେକ୍‌ ଜାଲିଲୋଭଙ୍କଠୁ ହାରିଯାଇଥିଲେ। ସେହିଭଳି ବିଶାଳ (୯୦ କେଜି) ୦-୫ରେ ଉଜବେକିସ୍ତାନର ତୁରାବେକ ଖାବିବୁଲ୍ଲାଏଭ ଓ ସଚିନ (୬୦‌ କେଜି) ପୋଲାଣ୍ଡର ପାୱେଲ ବ୍ରାକ୍‌ଙ୍କଠୁ ହାରିଯାଇଛନ୍ତି।