ଯୁବ ଏସିଆ କପ୍ ସେମିରେ ଭାରତ: ଶେଷ ଲିଗ୍ରେ ଆଫ୍ଗାନିସ୍ତାନକୁ ୩ ୱିକେଟ୍ରେ ହରାଇଲା
ମୋରାତୁୱା: ଯୁବ (୧୯ ବର୍ଷରୁ କମ୍) ଏସିଆ କପ୍ କ୍ରିକେଟ୍ ପ୍ରତିଯୋଗିତାର ସେମିଫାଇନାଲ୍ରେ ୬ ଥର ବିଜେତା ଭାରତ ସ୍ଥାନ ପକ୍କା କରିଛି। ଗ୍ରୁପ୍-ଏରେ ସ୍ଥାନ ପାଇଥିବା ଭାରତ ପ୍ରଥମ ମ୍ୟାଚ୍ରେ କୁଏତକୁ ଏବଂ ଦ୍ବିତୀୟରେ ପାରମ୍ପରିକ ପ୍ରତିଦ୍ବନ୍ଦ୍ବୀ ପାକିସ୍ତାନକୁ ହରାଇଥିଲା। ସୋମବାର ଶେଷ ଲିଗ୍ ମ୍ୟାଚ୍ରେ ଆଫଗାନିସ୍ତାନକୁ ୩ ୱିକେଟ୍ରେ ପରାସ୍ତ କରି ୩ ମ୍ୟାଚ୍ରୁ ୬ ପଏଣ୍ଟ୍ ସହ ଶୀର୍ଷରେ ରହି ସେମିଫାଇନାଲ୍ ଯାଇଛି। ପରାଜୟ ସତ୍ତ୍ବେ ଆଫ୍ଗାନିସ୍ତାନ ଗ୍ରୁପ୍-ଏର ଦ୍ବିତୀୟ ଦଳ ଭାବେ ସେମିଫାଇନାରେ ପହଞ୍ଚିଛି। ପୂର୍ବରୁ ପାକିସ୍ତାନ ଓ କୁଏତ୍କୁ ଆଫଗାନିସ୍ତାନ ହରାଇଥିଲା। ସୋମବାର ଖେଳାଯାଇଥିବା ଅନ୍ୟ ଏକ ମ୍ୟାଚ୍ରେ ପାକିସ୍ତାନ ୧୬୩ ରନ୍ରେ କୁଏତ୍କୁ ହରାଇଛି। ତେବେ ଏହି ଏକମାତ୍ର ବିଜୟ ସହ ପାକିସ୍ତାନ ଗ୍ରୁପ୍-ଏ ପଏଣ୍ଟ୍ ତାଲିକାରେ ତୃତୀୟ ସ୍ଥାନରେ ରହି ପ୍ରତିଯୋଗିତାରୁ ବିଦାୟ ନେଇଛି।
Sambad is now on WhatsApp
Join and get latest news updates delivered to you via WhatsApp
ଆଫ୍ଗାନିସ୍ତାନ ସୋମବାର ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ହେଲେ ସୁଶାନ୍ତ ମିଶ୍ରା (୫/୨୦), ଅଥର୍ବ ଆଙ୍କୋଲକର (୪/୧୬)ଙ୍କ ବୋଲିଂକୁ ସାମ୍ନା କରି ନ ପାରି ୪୦.୧ ଓଭରରେ ସମସ୍ତ ୱିକେଟ୍ ହରାଇ ୧୨୪ ରନ୍ କରିବାକୁ ସକ୍ଷମ ହୋଇଥିଲା। ଅବ୍ଦୁଲ ତାତିୱାଲ ୩୯, ଫରାନ ଜାଖିଲ ୨୯, ସେଦିକୁଲ୍ଲା ଅଟଲ ୨୫ ରନ୍ ଓ ମହମ୍ମଦ ଇସାକ୍ ୧୪ଙ୍କ ଛଡ଼ା ଅନ୍ୟ କୌଣସି ବ୍ୟାଟ୍ସମ୍ୟାନ୍ ଦୁଇ ଅଙ୍କ ଛୁଇଁବାକୁ ସମର୍ଥ ହୋଇନଥିଲେ। ଜବାବରେ ଭାରତ ୩୮.୪ ଓଭରରେ ୭ ୱିକେଟ୍ ହରାଇ ମ୍ୟାଚ୍ ଜିତି ନେଇଥିଲା। ଶାଶ୍ବତ ରାୱତ ୨୯, ସଲିଲ ଅରୋରା ୨୯ ଓ ଅର୍ଜୁନ ଯାଦବ ୨୧ ରନ୍ କରିଥିଲା ବେଳେ କରଣ ଲାଲ (୧୩) ଓ ପୂର୍ଣ୍ଣକ ତ୍ୟାଗୀ (୧୧) ଅପରାଜିତ ରହି ଭାରତକୁ ବିଜୟ ଭେଟି ଦେଇଥିଲେ। ଆଫ୍ଗାନିସ୍ତାନ ପକ୍ଷରୁ ନୁର ଅହମ୍ମଦ ୪ ଓ ସାଫିକୁଲ୍ଲା ଘଫାରି ୨ ୱିକେଟ୍ ପାଇଥିଲେ। ସୁଶାନ୍ତ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।