କୋଲ୍କାତା: ଅଲ୍ରାଉଣ୍ଡ୍ ପ୍ରଦର୍ଶନ ବଳରେ ବେଙ୍ଗଲ ଚଳିତ ଋତୁର ରଣଜୀ ଟ୍ରଫି ଫାଇନାଲ୍ରେ ପହଞ୍ଚିଯାଇଛି। ଶେଷଥର ପାଇଁ ୨୦୦୬-୦୭ରେ ଫାଇନାଲ୍ ପ୍ରବେଶ କରିଥିବା ବେଙ୍ଗଲ ଏଥି ସହିତ ୧୩ ବର୍ଷ ପରେ ପ୍ରଥମ ଥର ଲାଗି ଟ୍ରଫି ମୁକାବିଲାରେ ଅବତୀର୍ଣ୍ଣ ହୋଇଛି। ସ୍ଥାନୀୟ ଇଡେନ୍ ଗାର୍ଡେନ୍ରେ ଅନୁଷ୍ଠିତ କର୍ଣ୍ଣାଟକ ବିପକ୍ଷ ସେମିଫାଇନାଲ୍ ମ୍ୟାଚ୍କୁ ୪ ଦିନ ମଧ୍ୟରେ ଶେଷକରି ବେଙ୍ଗଲ ଫାଇନାଲ୍ରେ ସ୍ଥାନ ସୁରକ୍ଷିତ କରିନେଇଛି। ଦ୍ବିତୀୟ ପାଳିରେ ମୁକେଶ କୁମାରଙ୍କ ୬ ୱିକେଟ୍ ଦଖଲ ବଳରେ ବେଙ୍ଗଲ ଏହି ମ୍ୟାଚ୍ରେ କର୍ଣ୍ଣାଟକକୁ ୧୭୪ ରନ୍ର ବଡ଼ ବ୍ୟବଧାନରେ ପରାସ୍ତ କରିଦେଇଛି।
Sambad is now on WhatsApp
Join and get latest news updates delivered to you via WhatsApp
ପ୍ରଥମ ପାଳିରେ ଅନୁଷ୍ଟୁପ ମଜୁମଦାର (୧୪୯*)ଙ୍କ ଅପରାଜିତ ଶତକ ବଳରେ ୩୧୨ ରନ୍ କରିଥିବା ବେଙ୍ଗଲ ଦ୍ବିତୀୟ ପାଳିରେ ୧୬୧ ରନ୍ କରିପାରିଥିଲା। ଫଳରେ ଇଶାନ ପୋରେଲ (୫/୩୯), ଆକାଶ ଦୀପ (୩/୩୦) ଓ ମୁକେଶ କୁମାର (୨/୪୬)ଙ୍କ ଘାତକ ବୋଲିଂର ସାମ୍ନା କରିନପାରି ପ୍ରଥମ ପାଳିରେ ମାତ୍ର ୧୨୨ ରନ୍ କରିଥିବା କର୍ଣ୍ଣାଟକ ସମ୍ମୁଖରେ ୩୫୨ ରନ୍ର ବିଜୟ ଲକ୍ଷ୍ୟ ରହିଥିଲା। ଏହାର ପିଛା କରିଥିବା କର୍ଣ୍ଣାଟକକୁ କିନ୍ତୁ ମୁକେଶ କୁମାର (୬/୬୧), ଇଶାନ ପୋରେଲ (୨/୫୮) ଓ ଆକାଶ ଦୀପ (୨/୪୪) ଘାଇଲା କରିଥିଲେ। ଦେବଦତ୍ତ ପାଡିକଲ (୬୨)ଙ୍କ ଅର୍ଧଶତକ ସାଙ୍ଗକୁ ଅଭିମନ୍ୟୁ ମିଥୁନ (୩୮), ରବିକୁମାର ସମର୍ଥ (୨୭) ଓ କୃଷ୍ଣପ୍ପା ଗୌତମ (୨୨)ଙ୍କ ଲଢ଼େଇ ସତ୍ତ୍ବେ କର୍ଣ୍ଣାଟକ ଦ୍ବିତୀୟ ପାଳି ୧୭୭ରେ ସଫା ହୋଇଯାଇଥିଲା। ଅନୁଷ୍ଟୁପ ମଜୁମଦାର (୧୪୯* ଓ ୪୧ ରନ୍) ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ।