ପ୍ରଥମ ଟି-୨୦: ବାଂଲାଦେଶ ୧୨୭ ରନରେ ଅଲଆଉଟ୍, ଭାରତ ଆଗରେ ୧୨୮ ରନର ଲକ୍ଷ୍ୟ

ଗ୍ବାଲିୟର : ଗ୍ବାଲିୟରର ମାଧବ ରାଓ ସିନ୍ଧିଆ କ୍ରିକେଟ ଷ୍ଟାଡିୟମଠାରେ ଖେଳାଯାଉଥିବା ପ୍ରଥମ ଟି-୨୦ରେ ବାଂଲାଦେଶ ୧୨୭ ରନରେ ଅଲଆଉଟ୍ ହୋଇଯାଇଛି । ଫଳରେ ଭାରତ ଆଗରେ ୧୨୮ ରନର ଲକ୍ଷ୍ୟ ରହିଛି । 

ଏହି ମ୍ୟାଚରେ ଭାରତ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ଆରମ୍ଭରୁ ବାଂଲାଦେଶ ୧୪ ରନରେ ୨ଟି ଓ୍ବିକେଟ ହରାଇ ସଂକଟରେ ପଡ଼ିଥିଲା । ତେବେ ନଜମୁଲ ହୁସେନ ସାଣ୍ଟୋ ପାଳିକୁ ସମ୍ଭାଳିବାକୁ ଚେଷ୍ଟା କରିଥିଲେ । ମାତ୍ର ସେ ମାତ୍ର ୨୭ ରନ କରି ଆଉଟ ହୋଇଯାଇଥିଲେ । ଦଳର ମଧ୍ୟକ୍ରମ ବ୍ୟାଟରମାନେ ବିଶେଷ ଯୋଗଦାନ ଦେଇପାରିନଥିଲେ ଓ ଦଳ ନିୟମିତ ବ୍ୟବଧାନରେ ଓ୍ବିକେଟ ହରାଇଚାଲିଥିଲା । ତେବେ ମେହେଦି ହାସାନ ମିରାଜ କିଛି ସମୟ ଭାରତୀୟ ବୋଲରଙ୍କ ସହ ଲଢେଇ କରିଥିଲେ । ସେ ଅପରାଜିତ ୩୫ ରନ କରିଥିଲେ । ତସ୍କିନ ଅହମ୍ମଦ ଓ ତାହିଦ୍ ହ୍ରିଦୟ ୧୨ ରନ ଲେଖାଏଁ କରିଥିଲେ । ଦଳ ୧୯.୫ ଓଭରରେ ୧୨୭ ରନ କରି ଅଲଆଉଟ ହୋଇଯାଇଥିଲା । 

ଭାରତ ପକ୍ଷରୁ ଅର୍ଶଦୀପ ସିଂ ଓ ବରୁଣ ଚକ୍ରବର୍ତ୍ତି ୩ଟି ଲେଖାଏଁ ଓ୍ବିକେଟ ନେଇଥିଲେ । ଓ୍ବାସିଂଟନ ସୁନ୍ଦର, ହାର୍ଦ୍ଦିକ ପାଣ୍ଡ୍ୟା ଓ ମୟଙ୍କ ୟାଦବ ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।