ଆଇପିଏଲ୍‌: ରାଜସ୍ଥାନ ରୟାଲ୍ସ ଆଗରେ ୧୯୩ ରନ୍‌ର ବିଜୟ ଲକ୍ଷ୍ୟ ରଖିଲା ଗୁଜରାଟ୍‌

ମୁମ୍ବାଇ: ଇଣ୍ଡିଆନ୍‌ ପ୍ରିମିୟର ଲିଗ୍‌ (ଆଇପିଏଲ୍‌) ୨୦୨୨ର ୨୪ତମ ମ୍ୟାଚ୍‌ ଗୁରୁବାର ରାଜସ୍ଥାନ୍‌ ରୟାଲ୍ସ ଓ ଗୁଜରାଟ ଟାଇଟନ୍‌ସ ମଧ୍ୟରେ ଖେଳାଯାଉଛି। ସ୍ଥାନୀୟ ଡା ଡିଓ୍ଵାଇ ପାଟିଲ୍‌ ସ୍ପୋଟ୍‌ର୍ସ ଏକାଡେମୀରେ୍‌ରେ ରାଜସ୍ଥାନର ଅଧିନାୟକ ସଂଜୁ ସାମ୍‌ସନ୍‌ ଟସ୍‌ ଜିଣି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲେ। ସେ ଗୁଜରାଟ୍‌କୁ ବ୍ୟାଟିଂ ପାଇଁ ଆମନ୍ତ୍ରିତ କରିଥିଲେ। ଗୁଜରାଟ ୨୦ ଓଭରରେ ୪ଟି ଓ୍ଵିକେଟ୍‌ ହରାଇ ୧୯୨ ରନ୍‌ ସଂଗ୍ରହ କରିଛି। ଫଳରେ ରାଜସ୍ଥାନକୁ ଏହି ମ୍ୟାଚ୍‌ ବିଜୟ ପାଇଁ ୧୯୩ରନ୍‌ର ଲକ୍ଷ୍ୟ ମିଳିଛି।

ଇନିଂସ ଆରମ୍ଭରୁ ଗୁଜରାଟ୍‌ ବ୍ୟାଟିଂ ବିପର୍ଯ୍ୟୟର ସାମ୍ନା କରିଥିଲା। ଦଳର ଖେଳାଳିମାନେ ରାଜସ୍ଥାନର ବୋଲରମାନଙ୍କୁ ମୁକାବିଲା କରିପାରି ନଥିଲେ। ପାଳିର ୨ୟ ଓଭରରେ ଓପନର ମ୍ୟାଥୁ ଓ୍ଵାଡେ (୧୨ ରନ୍‌) ଆଉଟ୍‌ ହୋଇଥିଲା ବେଳେ ୨ୟ ଓଭରରେ ବିଜୟ ଶଙ୍କର (୨ ରନ୍‌) ପାଭ୍‌ଲିଅନ୍‌କୁ ଫେରି ଆସିଥିଲେ। ଗୁଜରାଟ ସ୍କୋର୍‌ ୧୨ ରନ୍‌ରେ ପ୍ରଥମ ଓ ୧୫ ରନ୍‌ରେ ଦ୍ୱିତୀୟ ଓ୍ଵିକେଟ୍‌ ହରାଇଥିଲା। ୩ୟ ଓ୍ଵିକେଟ୍‌ ଭାବେ ଶୁଭମନ୍‌ ଗିଲ୍‌ (୧୩) ଆଉଟ ହୋଇଥିଲେ। ଶୁଭମନ୍‌ ଆଉଟ୍‌ ହେବା ବେଳକୁ ଗୁଜରାଟ୍‌ର ସ୍କୋର୍‌ ୫୩ ରନ୍‌ରେ ପହଞ୍ଚିଥିଲା। କିନ୍ତୁ ଚତୁର୍ଥ ୱିକେଟ୍‌ରେ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଓ ଅଭିନବ ମନୋହର ଭଲ ଭାଗିଦାରୀ ହୋଇପାରିଥିଲେ।

ହାର୍ଦ୍ଦିକ ପାଣ୍ଡ୍ୟା ( ଅପରାଜିତ ୮୭ ରନ୍‌) ନିଜ ଟିମ୍‌ ପାଇଁ ଆଶା ସଂଚାର କରିଥିଲେ। ସେ ୩୩ଟି ବଲ୍‌ ଖେଳି ଅର୍ଦ୍ଧଶତକ ହାସଲ କରିଥିଲେ। ଏଥିରେ ୬ଟି ଚୌକା ଓ ଗୋଟିଏ ଛକା ସାମିଲ ଥିଲା। ଅଭିନବ ମନୋହର ୪୩ ରନ୍‌ ଓ ଡେଭିଡ୍‌ ମିଲର ଅପରାଜିତ ୩୧ ରନ୍‌ କରିଥିଲେ।