ସର୍ବଭାରତୀୟ ପୁଲିସ ହକି: କର୍ଣ୍ଣାଟକ ୨୦-୧, ସିଆର୍‌ପିଏଫ୍‌ ୨୧-୧ରେ ବିଜୟୀ

ଭୁବନେଶ୍ବର: କଳିଙ୍ଗ ଷ୍ଟାଡିୟମ୍‌ ହକି ଷ୍ଟାଡିୟମ୍‌ରେ ଚାଲିଥିବା ୭୩ତମ ସର୍ବଭାରତୀୟ ପୁଲିସ ହକି ପ୍ରତିଯୋଗିତାରେ ମଙ୍ଗଳବାର ମୋଟ ୭ ମ୍ୟାଚ୍‌ ଖେଳାଯାଇଛି। ସେଥିମଧ୍ୟରେ ରହିଛି ପୁରୁଷ ବର୍ଗର ୬ ଏବଂ ମହିଳା ବର୍ଗର ଗୋଟିଏ ମ୍ୟାଚ୍। 

ପ୍ରଥମ ମ୍ୟାଚ୍‌ରେ ଉତ୍ତରପ୍ରଦେଶ ପୁଲିସ ୯-୦ ଗୋଲ୍‌ରେ ମହାରାଷ୍ଟ୍ର ପୁଲିସ୍‌କୁ ପରାସ୍ତ କରିଥିବାବେଳେ ଦ୍ବିତୀୟ ମ୍ୟାଚ୍‌ରେ କର୍ଣ୍ଣାଟକ ପୁଲିସ ୨୦-୧ରେ ଗୁଜରାଟ ପୁଲିସକୁ ହରାଇଛି। ତୃତୀୟ ମ୍ୟାଚ୍‌ରେ ‌ତେଲେଙ୍ଗାନା ପୁଲିସ ୯-୧ ଗୋଲ୍‌ରେ କେରଳ ପୁଲିସକୁ ଏବଂ ଚତୁର୍ଥ ମ୍ୟାଚ୍‌ରେ ସିଆର୍‌ପିଏଫ୍‌ ଦଳ ୨୧-୧ରେ ପୁଡୁଚେରୀ ପୁଲିସକୁ ହରାଇଛି। ପଞ୍ଚମ ମୁକାବିଲାରେ ଉତ୍ତରପ୍ରଦେଶ ମହିଳା ପୁଲିସ ୬-୧ ଗୋଲ୍‌ରେ ତାମିଲନାଡୁ ମହିଳା ପୁଲିସକୁ ହରାଇ ଅଭିଯାନ ଆରମ୍ଭ କରିଛି। ସେହିଭଳି ପଞ୍ଜାବ ଓ ମଧ୍ୟପ୍ରଦେଶ ମଧ୍ୟରେ ଖେଳାଯାଇଥିବା ଷଷ୍ଠ ମ୍ୟାଚ୍‌ରେ ପଞ୍ଜାବ ୭-୧ରେ ଏବଂ ଏସ୍‌ଏସ୍‌ବି ଓ ହରିୟାଣା ପୁଲିସ ମଧ୍ୟ‌ରେ ଖେଳଯାଇଥିବା ସପ୍ତମ ମ୍ୟାଚ୍‌କୁ ହରିୟାଣା ଏକତରଫା ଭାବେ ୧୮-୦ ଗୋଲ୍‌ରେ ଜିତି ନେଇଥିଲା। ମଙ୍ଗଳବାର ଦିନରେ ୪ ଏବଂ ସଂଧ୍ୟାରେ ୩ଟି ମ୍ୟାଚ୍ ଖେଳାଯାଇଥିଲା। 

ମଙ୍ଗଳବାର କ୍ରୀଡ଼ା ବିଭାଗର ପ୍ରମୁଖ‌ ସଚିବ ଭାସ୍କର ଜ୍ୟୋତି ଶର୍ମା, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ଆଧୁନିକୀକରଣ) ସୌମେନ୍ଦ୍ର ପ୍ରିୟଦର୍ଶୀ,ଏସ୍‌ସିଆର୍‌ବି ନିର୍ଦ୍ଦେଶକ ଡ. ସନ୍ତୋଷ ବାଲା, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ରେଳବାଇ ଓ ଉପକୂଳ ସୁରକ୍ଷା ବିଭାଗ) ଅରୁଣ ବୋଥ୍ରା ଏବଂ ଖୋର୍ଦ୍ଧା ଏସପି ସାଗରିକା ନାଥ, ଆୟୋଜନ କମିଟିର ଉପାଧ୍ୟକ୍ଷ ଦୟାଲ ଗଙ୍ଗୱାର, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ସଶସ୍ତ୍ର) ତଥା ଆୟୋଜନ କମିଟିର ଉପାଧ୍ୟକ୍ଷ ରାଜେଶ କୁମାର, ଆଇଜି (ତାଲିମ) ତଥା ଆୟୋଜନ କମିଟିର ସମ୍ପାଦକ ଅନୁପ କୁମାର ସାହୁ ପ୍ରମୁଖ ଅତିଥିଭାବେ ଯୋଗଦେଇଥିଲେ।