ନିଖିଳ ଓଡ଼ିଶା ଓପନ୍ ସ୍ନକର: ଫାଇନାଲରେ ସୁବ୍ରତ-ସିଦ୍ଧାର୍ଥ
ଭୁବନେଶ୍ୱର: ନୟାପଲ୍ଲୀସ୍ଥିତ ଭିଣ୍ଟେଜ୍ କ୍ଲବ୍ ପରିସରରେ ଚାଲିଥିବା ସପ୍ତମ ଏମ୍ଆଇଇଟି ନିଖିଳ ଓଡ଼ିଶା ଓପନ୍ ସ୍ନକର ପ୍ରତିଯୋଗିତାର ଫାଇନାଲରେ ଓଡ଼ିଶା କ୍ୟୁ ସ୍ପୋର୍ଟସ ଦୁନିଆର ଦୁଇ ପୁରୁଣା ପ୍ରତିଦ୍ୱନ୍ଦ୍ୱୀ ସୁବ୍ରତ ଦାସ ଏବଂ ସିଦ୍ଧାର୍ଥ ସେନ ମୁହାଁମୁହିଁ ହେବେ। ସୋମବାର ସକାଳେ ଅନୁଷ୍ଠିତ ତୀବ୍ର ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ପ୍ରଥମ ସେମିଫାଇନାଲରେ ସୁବ୍ରତ ରାଜ୍ୟ ବରିଷ୍ଠ ବିଜେତା ନିଶାନ୍ତ ବିଶ୍ୱାଳଙ୍କୁ ୫-୩ରେ ପରାସ୍ତ କରି ଫାଇନାଲରେ ସ୍ଥାନ ପକ୍କା କରି ନେଇଥିଲେ। ସେହିଭଳି ସଂଘର୍ଷପୂର୍ଣ୍ଣ ଦ୍ୱିତୀୟ ସେମିଫାଇନାଲରେ ସିଦ୍ଧାର୍ଥ ଉତ୍କଣ୍ଠପୂର୍ଣ୍ଣ ଭାବେ ୫-୪ରେ ଆକାଶ ମହାପାତ୍ରଙ୍କୁ ହରାଇ ଟ୍ରଫି ଲଢ଼େଇରେ ଅବତୀର୍ଣ୍ଣ ହେବା ଲାଗି ଟକେଟ ହାସଲ କରି ନେଇଥିଲେ। ଏହି ରୋମାଞ୍ଚଭରା ମୁକାବିଲାରେ ସିଦ୍ଧାର୍ଥ ପ୍ରଥମେ ୧-୪ରେ ପଛୁଆ ଥିଲେ। ହେଲେ ପରେ ନାଟକୀୟ ପ୍ରତ୍ୟାବର୍ତନ ସହ ୫-୪ରେ ବିଜୟୀ ହୋଇ ଆକାଶଙ୍କୁ ବିଦାୟର ପଥ ଦେଖାଇ ଦେଇଥିଲେ। ଫାଇନାଲ୍ ମଙ୍ଗଳବାର ଅନୁଷ୍ଠିତ ହେବ। ବିଜୟୀ ଖେଳାଳି ସପ୍ତମ ଏମ୍ଆଇଇଟି ଟ୍ରଫି ଜିତିବେ।