୯୦୦ ତମ ଗୋଲ୍‌ ପରେ ଭାବବିହ୍ବଳ ରୋନାଲ୍ଡୋ

ନୂଆଦିଲ୍ଲୀ: ଫୁଟ୍‌ବଲ୍‌ ତାରକା କ୍ରିଷ୍ଟିଆନୋ ରୋନାଲ୍ଡୋ ତାଙ୍କ କ୍ୟାରିୟରର ୯୦୦ତମ ଗୋଲ୍‌ ସ୍କୋର କରିବା ପରେ ଭାବବିହ୍ବଳ ହୋଇପଡ଼ିଛନ୍ତି। ପର୍ତ୍ତୁଗାଲ୍‌ ପାଇଁ ୟୁଇଏଫ୍‌ଏ ନେସନ୍ସ ଲିଗ୍‌ରେ କ୍ରୋଏସିଆ ବିପକ୍ଷରେ ଖେଳୁଥିବା ବେଳେ ସେ ଏହି ମାଇଲ୍‌ଖୁଣ୍ଟରେ ପହଞ୍ଚିଛନ୍ତି। ଏହି ମ୍ୟାଚ୍‌ରେ ପର୍ତ୍ତୁଗାଲ୍‌ ୨-୧ ଗୋଲ୍‌ରେ ବିଜୟୀ ହୋଇଛି। ପର୍ତ୍ତୁଗାଲ୍‌ର ୫ ୟୁରୋ କପ୍‌ ମ୍ୟାଚ୍‌ରେ କୌଣସି ଗୋଲ୍‌ ଦେଇପାରି ନଥିଲେ। କିନ୍ତୁ ଶୁକ୍ରବାର ମ୍ୟାଚ୍‌ରେ ନ୍ୟୁନୋ ମେଣ୍ଡେସ୍‌ଙ୍କଠୁ ପାସ୍‌ ପାଇବା ପରେ ପୋଷ୍ଟ୍‌ର ଅତି ନିକଟରୁ ରୋନାଲ୍ଡୋ ଗୋଲ୍‌ ଦେଇଥିଲେ।

ଫଳରେ ୩୪ତମ ମିନିଟ୍‌ରେ ପର୍ତ୍ତୁଗାଲ୍‌ ପ୍ରାରମ୍ଭିକ ଅଗ୍ରଣୀ ପାଇଯାଇଥିଲା। ତେବେ ଏହି ଗୋଲ୍‌ ପରେ ରୋନାଲ୍ଡୋ ଭାବବିହ୍ବଳ ହେବା ସହ ଖୁସିରେ ଆତ୍ମହରା ହୋଇଯାଇଥିଲେ। ରୋନାଲ୍ଡୋଙ୍କ କ୍ୟାରିୟରର ସଫଳତମ ସମୟ ରିୟଲ୍‌ ମାଦ୍ରିଦ ସହିତ ରହିଥିଲା। ଏହି ଦଳ ପକ୍ଷରୁ ସେ ୪୩୮ ମ୍ୟାଚ୍‌ ଖେଳିଥିଲା ବେଳେ ୪୫୦ ଗୋଲ୍‌ ସ୍କୋର କରିଥିଲେ। ପର୍ତ୍ତୁଗାଲ୍‌ ପାଇଁ ସେ ୧୩୧ ଗୋଲ୍‌ ସ୍କୋର କରିଛନ୍ତି। ଏବେ ରୋନାଲ୍ଡୋ ସାଉଦି ଆରବର ଅଲ୍‌ ନାସେର ପକ୍ଷରୁ କ୍ଲବ୍‌ସ୍ତରୀୟ ପ୍ରତିଯୋଗିତା ଖେଳୁଛନ୍ତି।