ନୂଆଦିଲ୍ଲୀ : ଭବିଷ୍ୟତରେ କ୍ରିକେଟ୍ ଖେଳାଳିମାନେ କ’ଣ କେବଳ ଆଇପିଏଲ୍, ବିବିଏଲ ପରି ଫ୍ରାଞ୍ଚାଇଜି ଲିଗ୍ ଖେଳିବେ ? କ’ଣ ଆଗକୁ ଟେଷ୍ଟ ଓ ଦିନିକିଆ କ୍ରିକେଟ ଲୋପପାଇଯିବ ? ଏପରି ପ୍ରଶ୍ନ ପଚାରିଛନ୍ତି ଭାରତର କିମ୍ବଦନ୍ତି କ୍ରିକେଟିୟର କପିଳ ଦେବ ।
Sambad is now on WhatsApp
Join and get latest news updates delivered to you via WhatsApp
ଟି୨୦ ଲିଗ୍ କ୍ରିକେଟ ଯେପରି ଅନ୍ତର୍ଜାତୀୟ କ୍ରିକେଟକୁ ବୁଡ଼ାଇନଦିଏ ତାହା ନିଶ୍ଚିତ କରିବାକୁ ସେ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)କୁ ନିବେଦନ କରିଛନ୍ତି । ଅନ୍ତର୍ଜାତୀୟ କ୍ରିକେଟର ଭବିଷ୍ୟତକୁ ନେଇ ସେ ଚିନ୍ତା ପ୍ରକଟ କରି କହିଛନ୍ତି ଯେ ଫୁଟବଲର ଅବସ୍ଥା ଭୋଗିବାକୁ ଯାଉଛି କ୍ରିକେଟ । ୟୁରୋପୀୟ ଲିଗ୍ ଫୁଟବଲ ଯୋଗୁଁ ଅନ୍ତର୍ଜାତୀୟ ସ୍ତରରେ ଫୁଟବଲ ମ୍ୟାଚ ଅଧିକ ସଂଖ୍ୟକ ଖେଳାଯାଏ ନାହିଁ । କେବଳ ୪ ବର୍ଷରେ ଥରେ ଦେଶମାନେ ପରସ୍ପର ବିରୋଧରେ ଫୁଟବଲ ଖେଳିଥାନ୍ତି । କ୍ରିକେଟ ସମାନ ଦିଗରେ ଦୌଡୁଛି ବୋଲି ସେ କହିଛନ୍ତି । ଦ୍ବିପାକ୍ଷିକ କ୍ରିକେଟ ବିଶେଷକରି ଦିନିକିଆ କ୍ରିକେଟର ଭବିଷ୍ୟତ କଥା ଭାବିଲେ ଚିନ୍ତା ହେବାକୁ ପଡ଼େ ବୋଲି ସେ କହିଛନ୍ତି ।
ଇଂଲଣ୍ଡର ବେନ ଷ୍ଟୋକ୍ସ ଦିନିକିଆ କ୍ରିକେଟରୁ ଅବସର ନେଇଛନ୍ତି । କିନ୍ତୁ ସେ ଅନ୍ୟ ଦୁଇଟି ଫର୍ମାଟରେ ଖେଳିବେ । ସେହିପରି ନ୍ୟୁଜିଲାଣ୍ଡର ଟ୍ରେଣ୍ଟ ବୋଲ୍ଟ ନିଜ ଦେଶର କେନ୍ଦ୍ରୀୟ କଣ୍ଟ୍ରାକ୍ଟରୁ ଓହରିଯାଇଛନ୍ତି ।
ଆସନ୍ତା ବର୍ଷଠାରୁ ଆଇପିଏଲ ଆହୁରି ଅଧିକ ଦିନ ପାଇଁ ଖେଳାଯିବ । ସେହିପରି ଅଷ୍ଟ୍ରେଲିଆର ବିବିଏଲ ମଧ୍ୟ ଅଧିକ ଦିନ ପାଇଁ ଖେଳାଯିବ । ଏହି ସମୟରେ ଅନ୍ତର୍ଜାତୀୟ କ୍ରିକେଟ୍ କ୍ୟାଲେଣ୍ଡରରେ ସ୍ବତନ୍ତ୍ର ଝରକା ରହିବ । ଏହାକୁ ଦେଖିଲେ ଜଣାପଡ଼ୁଛି ଫୁଟବଲ ଦଶା ଭୋଗିବାକୁ ଯାଉଛି କ୍ରିକେଟ୍ ।