ଅଶୋକ ଦାସ ସ୍ମାରକୀ ସର୍ବଭାରତୀୟ କ୍ରିକେଟ୍: ଫାଇନାଲ୍ରେ ରାଞ୍ଚି ରେଲୱେ
ଯାଜପୁରଟାଉନ/ସଦର: ଯାଜପୁର ସହରର ବାଳାଶ୍ରମ ପଡ଼ିଆରେ ଚାଲିଥିବା ଅଶୋକ ଦାସ ସ୍ମାରକୀ ସର୍ବଭାରତୀୟ କ୍ରିକେଟ୍ ପ୍ରତିଯୋଗିତାରେ ବୁଧବାର ରାଞ୍ଚି ରେଳବାଇ ଦଳ ୫ ୱିକେଟ୍ରେ କଟକର ୟୁନିଅନ୍ ସ୍ପୋର୍ଟିଂକୁ ପରାସ୍ତ କରି ଫାଇନାଲରେ ପ୍ରବେଶ କରିଛି। ଟସ୍ ଜିତି ବ୍ୟାଟିଂ ନେଇଥିବା ୟୁନିଅନ୍ ସ୍ପୋର୍ଟିଂ ୨୮.୧ ଓଭରରେ ସମସ୍ତ ୱିକେଟ୍ ହରାଇ ୧୨୪ ରନ୍ କରିଥିଲା।
Sambad is now on WhatsApp
Join and get latest news updates delivered to you via WhatsApp
ଏମ୍ ଡ଼ି ଆକ୍ରମ ୨୯ ଓ ଲିଳାଧର ପ୍ରଧାନ ୨୭ ରନ୍ କରିଥିଲେ। ରାଞ୍ଚି ଦଳର ତନୟ ଖଣ୍ଡେଲୱାଲ୍ ଓ ରିଷଭ ରାଜ ୩ ଲେଖାଏଁ ୱିକେଟ୍ ଅକ୍ତିଆର କରିଥିଲେ। ଜବାବରେ ରାଞ୍ଚି ଦଳ ୨୬.୨ ଓଭରରେ ୫ ୱିକେଟ୍ ହରାଇ ବିଜୟଲକ୍ଷ୍ୟ ୧୨୫ରେ ପହଞ୍ଚି ଯାଇଥିଲା। ଶରତ ମିଞ୍ଜ ୩୧ ଓ ବିଶାଲ୍ କମଲ ୩୦ ରନ୍ କରିଥିଲେ। ଅଲ୍ରାଉଣ୍ଡ ପ୍ରଦର୍ଶନ (୨ ୱିକେଟ୍ ଓ ୨୨ ରନ୍) ପାଇଁ ସୁପ୍ରିୟ ଚକବର୍ତ୍ତୀଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ମିଳିଥିଲା। ଯୁବନେତା ମନୋଜ କୁମାର ସାହୁ ଏହି ପୁରସ୍କାର ପ୍ରଦାନ କରିଥିଲେ। ଲଲାଟ କେଶରୀ ନନ୍ଦ ଓ ରଞ୍ଜନ ମହାନ୍ତି ମ୍ୟାଚ୍ ପରିଚାଳନା କରିଥିଲା ବେଳେ ସ୍କୋରର ଭାବେ ଯଯାତି କେଶରୀ ସାମଲ ଓ ବିକାଶ ଧଳ ଥିଲେ। ଜ୍ଞାନ ରଂଜନ ଘଡ଼ାଇ, ଏସ୍.କେ. ଇମରାନ୍ ଓ କାହ୍ନୁ ସେଠୀ ଭାଷ୍ୟକାର ଥିଲେ। ଆସନ୍ତାକାଲି ଦ୍ୱିତୀୟ ସେମିଫାଇନାଲ୍ ୟୁନିକ୍ ଇଲେଭେନ୍ ଭଦ୍ରକ ଓ ଷ୍ଟାର ଇଲେଭେନ୍ ବୋକାରେ ମଧ୍ୟରେ ଖେଳାଯିବ।