ଏସୀୟ ଦଳଗତ ଚେସ୍, ଭାରତୀୟ ପୁରୁଷ ଓ ମହିଳା ଫାଇନାଲରେ
ଚେନ୍ନାଇ: ଚଳିତ ଏସିଆନ୍ ନେସନ୍ସ (ରେଜିଅନ) ଅନ୍ ଲାଇନ୍ କପ୍ ଚେସ୍ ପ୍ରତିଯୋଗିତାରେ ଶୀର୍ଷମାନ୍ୟତା ପ୍ରାପ୍ତ ଉଭୟ ଭାରତୀୟ ପୁରୁଷ ଓ ମହିଳା ଦଳ ଫାଇନାଲରେ ପ୍ରବେଶ କରିଛନ୍ତି। ବି ଅଧିବନ ଏବଂ ଆର୍ ବୈଶାଳୀଙ୍କ ପ୍ରଦର୍ଶନ ବଳରେ ଶନିବାର ଭାରତ ଯଥାକ୍ରମେ କାଜାକସ୍ତାନ ଓ ମଙ୍ଗୋଲିଆକୁ ପରାସ୍ତ କରିଥିଲା। ପୁରୁଷ ଦଳ କାଜାକସ୍ତାନକୁ ୨.୫-୧.୫ ଓ ୩-୧ରେ ପରାସ୍ତ କରିଥିଲା। ମହିଳା ଦଳ ୩.୫-୦.୫ ଓ ୪-୦ରେ ମଙ୍ଗୋଲିଆକୁ ହରାଇ ଦେଇଥିଲା। ପୁରୁଷଙ୍କ ପ୍ରଥମ ମୁକାବିଲାରେ କେବଳ ଅଧିବନ ବିଜୟୀ ହୋଇଥିଲେ। ନିହାଲ ସରିନ୍, ଏସପି ସେଥୁରମଣ, କେ ଶଶୀକିରଣ ଗେମ୍ ଡ୍ର ରଖିଥିଲେ। ଦ୍ବିତୀୟ ମୁକାବିଲାରେ କିନ୍ତୁ ଅଧିବନ, ସରିନ ଓ ସେଥୁରମଣ ବିଜୟୀ ହୋଇ ଫାଇନାଲରେ ସ୍ଥାନ ପକ୍କା କରିଥିଲେ। ମହିଳା ସେମିଫାଇନାଲରେ ଭାରତୀୟ ଖେଳାଳି ପ୍ରାଧାନ୍ୟ ବିସ୍ତାର କରିଥିଲେ। ଉଭୟ ମୁକାବିଲାରେ ଆର୍ ବୈଶାଳୀ, ପଦ୍ମିନୀ ରାଉତ, ବିଭି ନନ୍ଧିଦ୍ଧା ବିଜୟୀ ହୋଇଥିବାବେଳେ ଭକ୍ତି କୁଲକର୍ଣ୍ଣି କେବଳ ଦ୍ବିତୀୟ ମ୍ୟାଚ୍ଟି ଜିତିଥିଲେ।