ୟେଞ୍ଚିଅନ୍ (ଦକ୍ଷିଣ କୋରିଆ) : ଚଳିତ ୨୦ ବର୍ଷରୁ କମ୍ ଏସୀୟ ଦୌଡ଼କୁଦ ପ୍ରତିଯୋଗିତାର ମଙ୍ଗଳବାର ଭାରତକୁ ୧ ସ୍ବର୍ଣ୍ଣ, ୨ ରୌପ୍ୟ ଓ ୧ କାଂସ୍ୟ ସହ ମୋଟ ୪ ପଦକ ମିଳିଛି। ଫଳରେ ଭାରତର ପଦକ ସଂଖ୍ୟା ୧୩ (୪ ସ୍ବର୍ଣ୍ଣ, ୫ ରୌପ୍ୟ, ୪ କାଂସ୍ୟ)ରେ ପହଞ୍ଚିଛି। ଏକମାତ୍ର ସ୍ବର୍ଣ୍ଣଟି ଡେକାଥଲନ୍ରେ ସୁନିଲ କୁମାର ଜିତିଥିଲେ। ୧୦ ଇଭେଣ୍ଟ ଯୁକ୍ତ ଏହି ଡେକାଥଲନରେ ସୁନିଲ ୭୦୦୩ ପଏଣ୍ଟ କରାୟତ କରି ଏହି ପଦକ ଜିତିଥିଲେ। ଏହା ତାଙ୍କର ବ୍ୟକ୍ତିଗତ ଶ୍ରେଷ୍ଠ ଥିଲା।
Sambad is now on WhatsApp
Join and get latest news updates delivered to you via WhatsApp
ମହିଳା ଉଚ୍ଚ ଡିଆଁଳି ପୂଜା ଓ ଧାବିକା ବୁଶ୍ରା ଖାନ ରୌପ୍ୟ ଜିତିଥିଲା ବେଳେ ଭାରତୀୟ ମହିଳା ୪ ଗୁଣା ୧୦୦ ମିଟର ରିଲେ ଦଳ କାଂସ୍ୟ ପଦକ ଜିତିଥିଲେ। ପୂଜା ୧.୮୨ ମିଟର ଡେଇଁ ଏହି ପଦକ ଜିତିଥିଲା ବେଳେ ବୁଶ୍ରା ୩୦୦୦ ମିଟର ରେସ୍କୁ ୯:୪୧.୪୭ ସେକେଣ୍ଡ ସମୟରେ ଶେଷ କରି ଦ୍ବିତୀୟ ସ୍ଥାନ ଅଧିକାର କରିଥିଲେ। ଅଭିନୟା, ଅକ୍ଷୟା, ତମନ୍ନା ଓ ନୟନାଙ୍କୁ ନେଇ ଗଠିତ ମହିଳା ୪ ଗୁଣା ୧୦୦ ମିଟର ରିଲେ ଦଳ ୪୫.୩୬ ସେକେଣ୍ଡରେ ରେସ୍ ଶେଷ କରି ତୃତୀୟରେ ରହିଥିଲେ। ମହିଳା ୨୦୦ ମିଟର ଦୌଡ଼ର ଫାଇନାଲ୍ରେ ନୟନା କୋକାରେ (୨୪.୬୮ ସେକେଣ୍ଡ) ଓ ଉନ୍ନତି ଆଇପ୍ପା (୨୪.୯୦ ସେକେଣ୍ଡ) ପହଞ୍ଚି ପଦକ ଆଶା ବଢ଼ାଇଛନ୍ତି।