ଇଂଲଣ୍ଡକୁ ୭୧ ରନ୍‌ରେ ପରାସ୍ତ କରି ମହିଳା ବିଶ୍ୱକପ ଫାଇନାଲ ଜିତିଲା ଅଷ୍ଟ୍ରେଲିଆ

ଖ୍ରୀଷ୍ଟଚର୍ଚ୍ଚ: ଇଂଲଣ୍ଡକୁ ୭୧ ରନରେ ପରାସ୍ତ କରି ଅଷ୍ଟ୍ରେଲିଆର ମହିଳା କ୍ରିକେଟ୍ ଦଳ ବିଶ୍ୱକପ୍ ଟ୍ରଫି ଜିତିଛି। ଖ୍ରୀଷ୍ଟଚର୍ଚ୍ଚସ୍ଥିତ ହଙ୍ଗେଲି ଓଭାଲରେ ରବିବାର ଅନୁଷ୍ଠିତ ଫାଇନାଲ ମ୍ୟାଚରେ ଅଷ୍ଟ୍ରେଲିଆ ଏହି ମ୍ୟାଚକୁ ୭୧ ରନରେ ଜିତିଥିବାବେଳେ ୱିକେଟ୍ କିପର ବ୍ୟାଟ୍ସମ୍ୟାନ ଏଲିସା ହିଲି 'ପ୍ଲେୟାର ଅଫ୍ ଦି ମ୍ୟାଚ୍' ହୋଇଥିଲେ। ସେ ୧୩୮ ବଲରୁ ୧୭୦ ରନ ସଂଗ୍ରହ କରିଥିବାବେଳେ ଏଲିସା ହେଉଛନ୍ତି ଅଷ୍ଟ୍ରେଲୀୟ ପୁରୁଷ କ୍ରିକେଟ୍ ଦଳର ଖେଳାଳି ମିଚେଲ ଷ୍ଟାର୍କଙ୍କ ପତ୍ନୀ।

ଏହି ମ୍ୟାଚରେ ଇଂଲଣ୍ଡ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ତେବେ ଇଂଲଣ୍ଡ ଅଧିନାୟକଙ୍କ ଏହି ନିଷ୍ପତ୍ତି ଭୁଲ ପ୍ରମାଣିତ ହୋଇଥିଲା ଏବଂ ଅଷ୍ଟ୍ରେଲିଆ ୩୫୬ ରନର ଏକ ବିଶାଳ ସ୍କୋର ସଂଗ୍ରହ କରିଥିଲା ​​| ୩୫୭ ରନର ଲକ୍ଷ୍ୟ ନେଇ ପଡିଆକୁ ଓହ୍ଲାଇଥିବା ଇଂଲଣ୍ଡ ମାତ୍ର ୩୮ ରନରେ ପ୍ରଥମ ଦୁଇଟି ୱିକେଟ୍ ହରାଇଥିଲା | ତୃତୀୟ ୱିକେଟ୍ ପାଇଁ ଅଧିନାୟିକା ହିଥର ନାଇଟ୍ (୨୬)ଙ୍କ ସହ ନଟ୍ ଶିଭର (୧୪୮) ୪୮ ରନ୍ ଯୋଡିଥିଲେ।

ଏହା ପରେ କ୍ୟାପଟେନ ନାଇଟ୍ ଆଉଟ ହୋଇ ପ୍ୟାଭିଲିୟନକୁ ଫେରିଥିଲେ | ନଟ୍ ଶିଭର୍ ବ୍ୟାଟିଂ କରୁଥିଲେ ବି ଇଂଲଣ୍ଡର ଅନ୍ୟ ଖେଳାଳିମାନେ ଅଷ୍ଟ୍ରେଲିଆର ବୋଲରଙ୍କ ଆଗରେ ଅଧିକ ସମୟ ତିଷ୍ଠି ପାରିନଥିଲେ | ୪୩.୪ ଓଭରରେ ୨୮୫ ରନ୍ ସ୍କୋର କରିବା ପରେ ଇଂଲଣ୍ଡ ଅଲଆଉଟ୍ ହୋଇଯାଇଥିଲା। ଯାହାଫଳରେ ଇଂଲଣ୍ଡ ଏହି ମ୍ୟାଚକୁ ୭୧ ରନରେ ହାରିଯାଇଛି |