ମାଳଦ୍ବୀପରେ ଅଟକିବେ ଅଷ୍ଟ୍ରେଲିଆ ଖେଳାଳି
କରୋନାର ଭୟଙ୍କର ସୁନାମି ଲହର ପାଇଁ ଭାରତରୁ ସିଧା ବିମାନସେବାକୁ ବାତିଲ କରିବା ସହ ନିକଟରେ ଭାରତ ଆସିଥିବା ଅଷ୍ଟ୍ରେଲିଆ ନାଗରିକଙ୍କ ସ୍ବଦେଶ ପ୍ରବେଶ ଉପରେ ସଂପୂର୍ଣ୍ଣ ବାସନ୍ଦାଦେଶ ଜାରି କରିଛନ୍ତି ଅଷ୍ଟ୍ରେଲିଆ ସରକାର। ସେଥିପାଇଁ ଏବର୍ଷର ଆଇପିଏଲ୍ରେ ସାମିଲ ଥିବା ଅଷ୍ଟ୍ରେଲୀୟ କ୍ରିକେଟର, ଭାଷ୍ୟକାର, ସହାକାରୀ ଅଧିକାରୀ, ବୈଷୟିକ ବିଶେଷଜ୍ଞ ନିଜ ଦେଶକୁ ଯିବା ପୂର୍ବରୁ ମାଳଦ୍ବୀପରେ କିଛି ଦିନ ଅଟକିବେ। ସେଠାରେ ସେମାନେ ସଙ୍ଗରୋଧରେ ରହିପାରନ୍ତି।
Sambad is now on WhatsApp
Join and get latest news updates delivered to you via WhatsApp
ଗ୍ଲେନ୍ ମ୍ୟାକ୍ସୱେଲ୍, ଡେଭିଡ୍ ୱାର୍ନର, ଷ୍ଟିଭେନ୍ ସ୍ମିଥ୍, ରିକି ପଣ୍ଟିଂ, ସାଇମନ୍ କାଟିଚ୍ (ପ୍ରଶିକ୍ଷକ), ମାଇକେଲ୍ ସ୍ଲେଟର (ଭାଷ୍ୟକାର)ଙ୍କ ଭଳି ଅଷ୍ଟ୍ରେଲୀୟ ନିଜ ଦେଶ ଭିତରକୁ ଏବେ ପ୍ରବେଶ କରି ପାରିବେନାହିଁ। ଏଣୁ ସେମାନଙ୍କ ରହିବା ପାଇଁ ବିସିସିଆଇ ମାଳଦ୍ବୀପରେ ବ୍ୟବସ୍ଥା କରୁଥିବା ଜଣାପଡ଼ିଛି। ସେପଟେ କ୍ରିକେଟ୍ ଅଷ୍ଟ୍ରେଲିଆ ଓ ଅଷ୍ଟ୍ରେଲିଆ କ୍ରିକେଟର୍ ସଂଘ ବିଜ୍ଞପ୍ତି ଜାରି କରି ବିସିସିଆଇକୁ ସମବେଦନା ଜ୍ଞାପନ କରିଛନ୍ତି। ସେହିଭଳି କିଭଳି ଓ କେଉଁ ପରିସ୍ଥିତିରେ ବିସିସିଆଇ ଏଭଳି ନିଷ୍ପତ୍ତି ନେବାକୁ ବାଧ୍ୟ ହେଲା, ତାହା ବୁଝି ପାରୁଛନ୍ତି ବୋଲି କହିଛନ୍ତି। ଉଭୟ କହିଛନ୍ତି ‘‘ବିସିସିଆଇ ସହ ଆମେ ସିଧା ସଂପର୍କରେ ଅଛୁ। ବିସିସିଆଇ ଆମ ଖେଳାଳି, ପ୍ରଶିକ୍ଷକ, ଅଧିକାରୀ, ବୈଷୟିକ ବିଶେଷଜ୍ଞଙ୍କ ସୁରକ୍ଷା ଲାଗି ସବୁ ପ୍ରକାର ପ୍ରଚେଷ୍ଟା କରିବ ବୋଲି ଆମର ଆଶା ଓ ବିଶ୍ବାସ ରହିଛି।’’