ଅଷ୍ଟ୍ରେଲିଆ ୧୫ ବର୍ଷ ପରେ କୌଣସି ଆଇସିସି ଟ୍ରଫି ଫାଇନାଲ୍ରେ ପରାଜିତ ହୋଇଛି। ଗତ ଦେଢ଼ ଦଶନ୍ଧି ହେବ କ୍ରିକେଟ୍ର ତିନିଟି ଯାକ ଫର୍ମାଟ୍ ଯଥା ଟ୍ବେଣ୍ଟି-୨୦, ଦିନିକିଆ ଓ ଟେଷ୍ଟ୍ର ଅପ୍ରତିଦ୍ବନ୍ଦ୍ବୀ ଦଳ ପାଲଟିଥିବା ଅଷ୍ଟ୍ରେଲିଆ ଶେଷ ଥର ପାଇଁ ୨୦୧୦ରେ ଆଇସିସି ଟ୍ରଫି ଫାଇନାଲ୍ ହାରିଥିଲା। ୧୫ ବର୍ଷ ତଳେ ବାର୍ବାଡସ୍ଠାରେ ଅନ୍ତିମ ଥର ପାଇଁ ଇଂଲଣ୍ଡ ଟ୍ବେଣ୍ଟି-୨୦ ବିଶ୍ବକପ୍ ଫାଇନାଲ୍ରେ ଅଷ୍ଟ୍ରେଲିଆକୁ ହରାଇଥିଲା। ଏହା ପରଠାରୁ ଅଷ୍ଟ୍ରେଲିଆ ୨୦୧୫ ଓ ୨୦୨୩ ଏକଦିବସୀୟ ବିଶ୍ବକପ୍, ୨୦୨୧ ଟ୍ବେଣ୍ଟି-୨୦ ବିଶ୍ବକପ୍ ଏବଂ ୨୦୨୩ର ଭାରତ ବିପକ୍ଷ ବିଶ୍ବ ଟେଷ୍ଟ୍ ଚାମ୍ପିଅନସିପ୍ ଫାଇନାଲ ଭଳି ପ୍ରତିଯୋଗିତାରେ ବିଜୟୀ ହୋଇଥିଲା।
ଏହା ମଧ୍ୟ ୫୦ ବର୍ଷ ମଧ୍ୟରେ କଙ୍ଗାରୁ ଦଳ ଖେଳିଥିବା ଚର୍ତୁଦଶ ଆଇସିସି ଫାଇନାଲ୍ରୁ ମାତ୍ର ଚତୁର୍ଥ ପରାଜୟ ହୋଇଥିଲା। ଅଷ୍ଟ୍ରେଲିଆକୁ ଏକଦିବସୀୟ ବିଶ୍ବକପ୍ ସହ ବିଶ୍ବ ଟେଷ୍ଟ୍ ଚାମ୍ପିଅନସିପ୍ରେ ବିଜେତା କରାଇଥିବା ପ୍ୟାଟ୍ କମିନ୍ସଙ୍କର ଅଧିନାୟକ ଭାବେ ମଧ୍ୟ ଏହା ପ୍ରଥମ ଆଇସିସି ଟ୍ରଫି ଫାଇନାଲ୍ ପରାଜୟ ହୋଇଛି। ସେହିଭଳି ଦୁଇଟି ଆଇସିସି ଟ୍ରଫି ଫାଇନାଲ୍ ହାରିବାରେ ଷ୍ଟିଭ ସ୍ମିଥ୍ (୨୦୧୦ ଟ୍ବେଣ୍ଟି-୨୦ ବିଶ୍ବକପ୍, ୨୦୨୫ ବିଶ୍ବ ଟେଷ୍ଟ୍ ଚାମ୍ପିଅନସିପ୍ ଫାଇନାଲ୍) ପ୍ରଥମ ଓ ଏକମାତ୍ର ଅଷ୍ଟ୍ରେଲୀୟ ଖେଳାଳି ହୋଇଛନ୍ତି।