୩୦ ହଜାର ଟଙ୍କା ପାଇଁ ହେବ ମୁକାବିଲା, ଭାଗ ନେବେ ବାବର ଆଜମ
ଲାହୋର: ପାକିସ୍ତାନ ଜାତୀୟ ଦଳର ଅଧିନାୟକ ବାବର ଆଜମଙ୍କ ସମେତ ପାକିସ୍ତାନର କ୍ରିକେଟରମାନେ ଲାହୋରରେ ହେବାକୁ ଥିବା ଏକ ମ୍ୟାଚ ପାଇଁ ପ୍ରସ୍ତୁତି ଚଳାଇଛନ୍ତି | ବାସ୍ତବରେ ଲାହୋରରେ ଖେଳାଯିବାକୁ ଥିବା ‘ରମଜାନ ଟୁର୍ନାମେଣ୍ଟ’ରେ ଆଜମଙ୍କ ବ୍ୟତୀତ ଶାଦବ ଖାନ, ଇହସାନୁଲ୍ଲା, ଉସାମା ମିର, ଆଜମ ଖାନ, ଉସମାନ କାଦିର, ଉମର ଆକମଲ, ଅହସାନ ଅଲି ଏବଂ ଅବିଦ ଅଲିଙ୍କ ଭଳି ଅନ୍ୟ କ୍ରିକେଟର ମଧ୍ୟ ଏଥିରେ ଅଂଶଗ୍ରହଣ କରିବେ। ଏକ ଘରୋଇ କ୍ରିକେଟ୍ ପ୍ରତିଷ୍ଠାନ ଦ୍ୱାରା ଆୟୋଜିତ ଏହି ଟୁର୍ନାମେଣ୍ଟରେ ଆଠଟି ଦଳ ଅଂଶଗ୍ରହଣ କରିବେ | ପ୍ରତ୍ୟେକ ଦଳରେ ଦୁଇଜଣ ଅନ୍ତର୍ଜାତୀୟ ଖେଳାଳି ରହିବେ |
Sambad is now on WhatsApp
Join and get latest news updates delivered to you via WhatsApp
ଏହି ଟୁର୍ନାମେଣ୍ଟର ମୁଖ୍ୟ ଆୟୋଜକ ହେଉଛନ୍ତି ପାକିସ୍ତାନର ପୂର୍ବତନ ଅଧିନାୟକ ସଲମାନ ବଟ | ସଲମାନ କହିଛନ୍ତି ଯେ ଲାହୋରରେ ଏହି ପ୍ରକାର ଟୁର୍ନାମେଣ୍ଟ ପ୍ରଥମ ଥର ପାଇଁ ଅନୁଷ୍ଠିତ ହେଉଛି। ଏହି ଟୁର୍ଣ୍ଣାମେଣ୍ଟ ମାଧ୍ୟମରେ ନୂତନ ପ୍ରତିଭାଙ୍କ ବାବଦରେ ମଧ୍ୟ ଜଣାପଡିବ | ବିଶେଷ କଥା ହେଉଛି ଆୟୋଜକମାନେ ପ୍ରତ୍ୟେକ ମ୍ୟାଚର ପ୍ଲେୟାର ଅଫ ଦି ମ୍ୟାଚ ପାଇଁ ଖେଳାଳିଙ୍କୁ ୩୦୦୦୦ ଟଙ୍କା ପୁରସ୍କାର ଦେବାକୁ ନିଷ୍ପତ୍ତି ନେଇଛନ୍ତି। ଏହି ଟୁର୍ନାମେଣ୍ଟର କାର୍ଯ୍ୟସୂଚୀ ଖୁବ ଶୀଘ୍ର ପ୍ରକାଶ ପାଇବ। ପାକିସ୍ତାନ ଦଳ ବର୍ତ୍ତମାନ ଶାରଜାଠାରେ ଆଫଗାନିସ୍ତାନ ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଟି-ଟ୍ୱେଣ୍ଟି ସିରିଜ୍ ଖେଳୁଛି। ବାବରଙ୍କ ଅନୁପସ୍ଥିତିରେ ଶାଦବ ଦଳର ନେତୃତ୍ୱ ନେଉଛନ୍ତି। ଉଲ୍ଲେଖନୀୟ କଥା ହେଉଛି, ଗୁରୁବାର ଦିନ ବାବରଙ୍କୁ ଦେଶର ତୃତୀୟ ସର୍ବୋଚ୍ଚ ନାଗରିକ ସମ୍ମାନ ସୀତାରା-ଏ-ଇମତିଆଜ ସମ୍ମାନରେ ସମ୍ମାନିତ କରାଯାଇଥିଲା।