ବାବରଙ୍କ ବିଦ୍ରୋହ, ପାକିସ୍ତାନ‌ରେ ହଇଚଇ

ଲାହୋର: ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ବିରୋଧରେ ପୂର୍ବତନ ଅଧିନାୟକ ବାବର ଆଜମ ଖୋଲା ବିଦ୍ରୋହ କରିଛନ୍ତି। ଟ୍ବେଣ୍ଟି-୨୦ରେ ତାଙ୍କୁ ତୃତୀୟ ସ୍ଥାନରେ ବ୍ୟାଟିଂ କରିବାକୁ କୁହାଯାଇଥିବାରୁ ଏଥି‌ନେଇ ସାମ୍ବାଦିକ ସମ୍ମିଳନୀରେ ତୀବ୍ର ଅସନ୍ତୋଷ ଜାହିର କରିଛନ୍ତି। ଫଳରେ ପାକିସ୍ତାନ କ୍ରିକେଟ୍‌ରେ ହଇଚଇ ସୃଷ୍ଟି ‌ହୋଇଛି। ଗଣମାଧ୍ୟମ ସହ ଆଲୋଚନା ବେଳେ ବାବର କହିଛନ୍ତି, ନ୍ୟୁଜିଲାଣ୍ଡ ଶୃଙ୍ଖଳାରେ ମୋତେ ତୃତୀୟ ସ୍ଥାନରେ ବ୍ୟାଟିଂ କରିବାକୁ ବାଧ୍ୟ କରାଯାଇଥିଲା। ଏହି ନିଷ୍ପତ୍ତିରେ ମୁଁ ଆଦୌ ଖୁସି ନଥିଲି। ତଥାପି ଦଳର ହିତ ଦୃଷ୍ଟିରୁ ଏହି ସ୍ଥାନରେ ଖେଳିଥିଲି। ଯଦି ବ୍ୟକ୍ତିଗତ ଭାବେ ମୋତେ ଏହି ବିଷୟ ପଚରାଯାଇଥା’ନ୍ତା, ତାହେଲେ ମୁଁ ଏଥିରେ ଅମଙ୍ଗ ହୋଇଥା’ନ୍ତି। କାରଣ ଓପନିଂ ଛାଡ଼ି ତୃତୀୟ ସ୍ଥାନରେ ବ୍ୟାଟିଂ କରିବା ମୋତେ ଆତ୍ମସନ୍ତୋଷ ଦେଇନି।
ଜାନୁଆରିରେ ଖେଳାଯାଇଥିବା ଏହି ଶୃଙ୍ଖଳାରେ ମହମ୍ମଦ ରିଜୱାନଙ୍କ ସହ ସୈମ ଆୟୁବ ଓପନିଂ କରିଥିଲେ। ରିଜୱାନ ଓ ତାଙ୍କ ଯୋଡ଼ିକୁ ଭାଙ୍ଗିବା ପାକିସ୍ତାନ ପାଇଁ ଅତ୍ୟନ୍ତ ମହଙ୍ଗା ସାବ୍ୟସ୍ତ ହୋଇଥିଲା।

କାରଣ ୫ ଟିକିଆ ଶୃଙ୍ଖଳାକୁ ପାକିସ୍ତାନ ୧-୪ରେ ହାରିଯାଇଥିଲା। ବାବର ମଧ୍ୟ ଓପନିଂ କରିବା ନେଇ ତାଙ୍କ ଉପରେ ଚାପ ସୃଷ୍ଟି ହେଉଥିବା‌ ଖବରକୁ ଏହି ଅବସରରେ ଖଣ୍ଡନ କରିଥିଲେ। ସେ କହିଥିଲେ, ଟ୍ବେଣ୍ଟି-୨୦ରେ ଓପନିଂ କଲେ ମୋ ଉପରେ ଅତିରିକ୍ତ ଚାପ ପଡ଼େନି। ବରଂ ଏହାକୁ ମୁଁ ମନଭରି ଉପଭୋଗ କରେ। ସେହିଭଳି ବ୍ୟାଟିଂକ୍ରମରେ ଅଦଳ ବଦଳକୁ ତୀବ୍ର ସମାଲୋଚନା କରିଥିଲେ ସେ। ରିଜୱାନ ମଧ୍ୟ ବାବରଙ୍କୁ ସମର୍ଥନ କରିଛନ୍ତି। ଓପନିଂ ଯୋଡ଼ି ଭାଙ୍ଗିବା ପରେ ପାକିସ୍ତାନର କ୍ଷତି ହୋଇଥିଲା। ବାବର ଭାଇ ବଡ଼ ହୃଦୟର ବ୍ୟକ୍ତି ବୋଲି ମୁଁ କହିପାରିବି। କାରଣ ସେ ଖୁସି ଖୁସି ଦଳୀୟ ନିଷ୍ପତ୍ତିକୁ ଗ୍ରହଣ କରି ନେଇଥିଲେ। ଅବଶ୍ୟ ଆମେ ଦୁଇଜଣ ଯାକ ସେମାନେ ଯାହା ଚାହିବେ କରିପାରିବେ ବୋଲି ଚୟନକର୍ତ୍ତାମାନଙ୍କୁ କହିଥିଲୁ ବୋଲି ଖୁଲାସା କରିଛନ୍ତି ରିଜୱାନ। ସୂଚନା‌ଯୋଗ୍ୟ ଯେ ପାକିସ୍ତାନ କ୍ରିକେଟ୍ ଦଳର ତତ୍କାଳୀନ ନିର୍ଦ୍ଦେଶକ ମହମ୍ମଦ ହାଫିଜ ଓ ଏବେକାର ଟ୍ବେଣ୍ଟି-୨୦ ଅଧିନାୟକ ସାହିନ ଶାହ ଆଫ୍ରିଦି ବ୍ୟାଟିଂକ୍ରମରେ ଏଭଳି ପରିବର୍ତ୍ତନ କରିଥିଲେ। ଯାହା ପାକିସ୍ତାନ ପାଇଁ ବୁମେରାଂ ସାବ୍ୟସ୍ତ ହୋଇଥିଲା।