ବଲାଙ୍ଗୀର ଜିଲ୍ଲା ଟାଏକୋଣ୍ଡୋ ପ୍ରତିଯୋଗିତା ଉଦ୍‌ଯାପିତ

ବଲାଙ୍ଗୀର: ସ୍ଥାନୀୟ ରିଜର୍ଭ ପୋଲିସ ଇନ୍‌ଡୋର ହଲରେ ଶନିବାର ବଲାଙ୍ଗିର ଜିଲ୍ଲା ଟାଏକୋଣ୍ଡୋ ସଂଘ ତରଫରୁ ପ୍ରଥମ ଜିଲ୍ଲା ସ୍ତରୀୟ ପୁମସେ ଓ କ୍ୟୁରୋଗୀ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ସକାଳେ ଉଦ୍‌ଘାଟନୀ ଉତ୍ସବରେ ‘ସମ୍ବାଦ’ ଏଜିଏମ୍ ଅରବିନ୍ଦ ଦାସ ଅତିଥି ରୂପେ ଯୋଗ ଦେଇ ପ୍ରତିଯୋଗିତା ଶୁଭାରମ୍ଭ କରିଥିଲେ। ଏଥିରେ ବଲାଙ୍ଗିର ଜିଲ୍ଲାର ବିଭିନ୍ନ କୋଣରୁ ୯୦ ଜଣ ପ୍ରତିଯୋଗୀ ଭାଗ ନେଇଥିଲେ। ସଫଳ ଖେଳାଳିମାନେ ରାଜ୍ୟ ଟାଏକୋଣ୍ଡୋ ପ୍ରତିଯୋଗିତାରେ ଅଂଶଗ୍ରହଣ କରିବେ ବୋଲି ବଲାଙ୍ଗୀର ଜିଲ୍ଲା ଟାଏକୋଣ୍ଡୋ ସଂଘ ସାଧାରଣ ସଂପାଦକ ତଥା ପ୍ରଶିକ୍ଷକ ଅସୀମ କୁମାର ଭୋଇ ସୂଚନା ଦେଇଛନ୍ତି।

ଉଦ୍‌ଯାପନୀ ଉତ୍ସବରେ ରାଜ୍ୟସଭା ସାଂସଦ ନିରଞ୍ଜନ ବିଶି ମୁଖ୍ୟ ଅତିଥି, ସିଆରପିଏଫ୍ କମାଣ୍ଡାଣ୍ଟ ପବନ ତିୱାରି ଓ ମ୍ୟୁନିସିପାଲଟି ଚେୟାରମ୍ୟାନ ଲିକା ସାହୁ ସମ୍ମାନିତ ଅତିଥି ଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। ଭବିଷ୍ୟତରେ ଅନୁଷ୍ଠାନର ଭିତ୍ତିଭୂମି ପାଇଁ ଚେଷ୍ଟା କରାଯିବ ବୋଲି ମୁଖ୍ୟ ଅତିଥି ଶ୍ରୀ ବିଶି ପ୍ରତିଶ୍ରୁତି ଦେଇଥି‌ଲେ। କାର୍ଯ୍ୟକ୍ରମକୁ ମନପ୍ରୀତ କୌର ପରିଚାଳନା କରିଥିବା ବେଳେ ସୁଶାନ୍ତ ମୁଗ୍ରୀ, କରଣ ନନ୍ଦ, ଭୁବନେ ଭୋଇ, ଅମିତ ବାରିକ, ନିତିନ ସ୍ୱାଇଁ, ଜୟକୃଷ୍ଣ ଶବର, ମୁକେଶ ପଧାନ, ନରେନ୍ଦ୍ର ବରାଡ଼ ପ୍ରମୁଖ ସହଯୋଗ କରିଥିଲେ।