ଡବ୍ଲିନ୍: ତ୍ରିରାଷ୍ଟ୍ରୀୟ ଶୃଙ୍ଖଳାର ବୁଧବାର ଶେଷ ଲିଗ୍ ମ୍ୟାଚ୍ରେ ଆୟୋଜକ ଆୟର୍ଲାଣ୍ଡ ୬ ୱିକେଟ୍ରେ ବାଂଲାଦେଶଠୁ ହାରି ଯାଇଛି। ଫଳରେ ଆୟର୍ଲାଣ୍ଡ ବିଜୟ ଶୂନ୍ୟ ରହି ଅଭିଯାନ ଶେଷ କରିଛି। ପୂର୍ବରୁ ଫାଇନାଲ୍ ସ୍ଥାନ ପକ୍କା କରିଥିବା ବାଂଲାଦେଶ-ୱେଷ୍ଟ୍ଇଣ୍ଡିଜ୍ ଟ୍ରଫି ପାଇଁ ଶୁକ୍ରବାର ମୁହାଁମୁହିଁ ହେେବ। ବୁଧବାର ଟସ୍ ଜିତି ବ୍ୟାଟିଂ କରିଥିବା ଆୟର୍ଲାଣ୍ଡ ପଲ୍ ଷ୍ଟିର୍ଲିଂ (୧୩୦, ୧୪୧ ବଲ୍, ୮ ଚୌକା, ୪ ଛକା)ଙ୍କ ଶତକ ଏବଂ ଅଧିନାୟକ ୱିଲିୟମ ପୋର୍ଟରଫିଲ୍ଡ (୯୪, ୧୦୬ ବଲ୍, ୭ ଚୌକା, ୨ ଛକା)ଙ୍କ ଅର୍ଧଶତକ ବଳରେ ୮ ୱିକେଟ୍ ବିନିମୟରେ ୨୯୨ ରନ୍ କରିଥିଲା। ବାଂଲାଦେଶର ଅବୁ ଜୟେଦ ୯-୦-୫୮-୫ର ବୋଲିଂ ସଫଳତା ପାଇଥିଲେ। ୫୯/୨ରେ ସଂଘର୍ଷ କରୁଥିବା ଆୟର୍ଲାଣ୍ଡ ପାଇଁ ଷ୍ଟିର୍ଲିଂ ଓ ପୋର୍ଟରଫିଲ୍ଡ ଯୋଡ଼ି ୧୭୪ ରନ୍ ଭାଗୀଦାରି କରି ବାଂଲାଦେଶ ସମ୍ମୁଖରେ ୨୯୩ ରନ୍ର ବିଜୟ ଲକ୍ଷ୍ୟ ରଖିଥିଲା।
Sambad is now on WhatsApp
Join and get latest news updates delivered to you via WhatsApp
ଜବାବରେ ବାଂଲାଦେଶ ୪ ୱିକେଟ୍ ହରାଇ ୭ ଓଭର ପୂର୍ବରୁ ମ୍ୟାଚ୍ ଜିତି ନେଇଥିଲା। ବାଂଲାଦେଶର ୩ ଜଣ ବ୍ୟାଟ୍ସମ୍ୟାନ୍ ଲିଟନ ଦାସ (୭୬, ୬୭ ବଲ୍, ୯ ଚୌକା, ୧ ଛକା), ତମିମ ଇକ୍ବାଲ୍ (୫୭, ୫୩ ବଲ୍, ୯ ଚୌକା) ଏବଂ ସକିବ ଅଲ୍ ହାସନ (୫୦, ୫୧ ବଲ୍, ୪ ଚୌକା) ଅର୍ଧଶତକ ହାସଲ କରିଥିଲେ। ମୁସ୍ଫିକର ରହିମ ୩୫ ଏବଂ ମହମ୍ମୁଦ୍ଲା ଅପରାଜିତ ୩୫ ରନ୍ ସଂଗ୍ରହ କରି ବାଂଲାଦେଶ ବିଜୟରେ ଅବଦାନ ରଖିଥିଲେ। ବଏଡ୍ ରାଙ୍କିନ୍ ୨ ୱିକେଟ୍ ପାଇଥିଲେ। ବାଂଲାଦେଶର ଏହି ଦଳଗତ ପ୍ରଦର୍ଶନ ଆଗରେ ଷ୍ଟିର୍ଲିଂଙ୍କ ଶତକୀୟ ପାଳି ଫିକା ପଡ଼ିଯାଇଥିଲା। ୫ ୱିକେଟ୍ ସଫଳତା ପାଇଥିବା ଅବୁ ଜୟେଦ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।