ଜିମ୍ବାୱେକୁ ୨୨୦ ରନ୍ରେ ହରାଇଲା ବାଂଲାଦେଶ
ହରାରେ: ଏଠାରେ ଅନୁଷ୍ଠିତ ଏକମାତ୍ର ଟେଷ୍ଟ୍ରେ ଘରୋଇ ଜିମ୍ବାୱେକୁ ୨୨୦ ରନ୍ରେ ପରାସ୍ତ କରିଦେଇଛି ବାଂଲାଦେଶ। ଜିମ୍ବାୱେ ସମ୍ମୁଖରେ ୪୭୭ ରନ୍ର ବିଜୟ ଲକ୍ଷ୍ୟ ରହିଥିଲା। ହେଲେ ରବିବାର ପଞ୍ଚମ ତଥା ଶେଷ ଦିବସରେ ଭ୍ରମଣକାରୀ ଦଳର ମେହିଦି ହାସନ୍ (୪/୬୬) ଓ ତସ୍କିନ୍ ଅହମ୍ମଦ (୪/୮୨)ଙ୍କ ପ୍ରଭାବୀ ବୋଲିଂ ନିକଟରେ ତିଷ୍ଠିନପାରି ଘରୋଇ ଦଳର ଦ୍ବିତୀୟ ପାଳି ୨୫୬ ରନ୍ରେ ଶେଷ ହୋଇଯାଇଥିଲା। ଫଳରେ ୨୨୦ ରନ୍ର ବଡ଼ ବ୍ୟବଧାନ ପରାଜୟ ବରଣ କଲା। ଅଧିନାୟକ ବ୍ରେଣ୍ଡନ ଟେଲର (୯୨) ଓ ଡୋନାଲ୍ଡୋ ତିରିପାନୋ (୫୨)ଙ୍କ ଅର୍ଦ୍ଧଶତକ ପରାଜୟ ଏଡ଼ାଇବାକୁ ଯଥେଷ୍ଟ ହୋଇନଥିଲା। ଶେଷ ବ୍ୟାଟ୍ସମ୍ୟାନ୍ ରିଚାର୍ଡ ଏନ୍ଗାରାଭୋ (୧୦)ଙ୍କୁ ବୋଲ୍ଡ କରି ମେହିଦି ହାସନ୍ ବଂଲାଦେଶର ବିଜୟ ମୁଣ୍ଡି ମାରିଥିଲେ। ସେ ଏହି ମ୍ୟାଚ୍ରେ ମୋଟ ୯ ୱିକେଟ୍ ଅକ୍ତିଆର କରିଥିଲା ବେଳେ ଉଭୟ ସାକିବ୍ ଅଲ୍ ହାସନ୍ ଓ ତସ୍କିନ୍ ଅହମ୍ମଦ ୫-୫ ୱିକେଟ୍ ପାଇଥିଲେ। ପ୍ରଥମ ପାଳିରେ ଅପରାଜିତ ୧୫୦ ରନ୍ କରିଥିବା ମହମୁଦୁଲା ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ।
Sambad is now on WhatsApp
Join and get latest news updates delivered to you via WhatsApp
ପ୍ରଥମ ପାଳି ଭଳି ଘରୋଇ ଦଳ ଦ୍ବିତୀୟ ପାଳିରେ ମଧ୍ୟ ଭଲ ଆରମ୍ଭ ପାଇଥିଲା। ଏକ ସମୟରେ ୧୧୦/୦ ଏବଂ ୧୫୯/୩ରେ ଥିବା ଏହି ଦଳ ପରବର୍ତୀ ୯୭ ରନ୍ ମଧ୍ୟରେ ୭ ୱିକେଟ୍ ହରାଇ ପରାଜୟ ବରଣ କରିଥିଲା। ବ୍ଲେସିଂ ମୁଜାରବାନି (୩୦*) ଓ ଡିଅନ୍ ମୀର୍ସ (୨୬)ଙ୍କ ସ୍ବଳ୍ପ ଅବଦାନ ସତ୍ତ୍ବେ ଦଳ ୯୪.୪ ଓଭରରେ ସମସ୍ତ ୱିକେଟ୍ ହରାଇଥିଲା। ପ୍ରଥମ ପାଳିରେ ବାଂଲାଦେଶ ୪୬୮ ଓ ଦ୍ବିତୀୟ ପାଳିରେ ୨୮୪/୧ରେ ଘୋଷଣା କରିଥିଲା ବେଳେ ଜିମ୍ବାୱେ ପ୍ରଥମ ପାଳି ୨୭୬ରେ ସଫା ହୋଇଯାଇଥିଲା।