ସିଡ୍‌ନି: ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଓ ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ଏବି ଡି’ଭିଲିୟର୍ସଙ୍କ ମଧ୍ୟରୁ କୋହଲିଙ୍କୁ ବାଛିଛନ୍ତି ଅଷ୍ଟ୍ରେଲିଆର ପୂର୍ବତନ ଅନ୍ତର୍ଜାତୀୟ ତାରକା ବ୍ରାଡ୍ ହଜ୍। ଜଣେ ଟ୍ବିଟର ବ୍ୟବହାରକାରୀ ପଚାରିଥିବା ଏକ ପ୍ରଶ୍ନର ଉତ୍ତର ଦେଇ କୋହଲି ତାଙ୍କ ପସନ୍ଦର କ୍ରିକେଟର୍‌ ବୋଲି ହଜ୍ କହିଛନ୍ତି। ନିଜ ଟ୍ବିଟର ପୃଷ୍ଠାରେ ସେ ଲେଖିଛନ୍ତି ଯେ ନିଶ୍ଚିତ ଭାବେ କୋହଲି, ପରିସଂଖ୍ୟାନ ଏହା ହିଁ କହୁଛି। ଏହା ପୂର୍ବରୁ ପାକିସ୍ତାନର ପୂର୍ବତନ କ୍ରିକେଟର୍‌ ଜାଭେଦ ମିଆଁଦାଦ ମଧ୍ୟ କୋହଲିଙ୍କର ଭୂୟଶୀ ପ୍ରଶଂସା କରି ସାରିଛନ୍ତି। ଏପରିକି କୋହଲି ଯାହା ଚାହିଁବେ ଏବଂ ଯେଭଳି ସ୍କୋର୍‌ କରିବାକୁ ଇଚ୍ଛା କରିବେ, ତାହା କରି ପାରିବେ ବୋଲି ମିଆଁଦାଦ କହିଥିଲେ। କୋହଲିଙ୍କ ନମ୍ରତାକୁ ପ୍ରଶଂସା କରିବା ସହ ପ୍ରତିପକ୍ଷ ଖେଳାଳିଙ୍କୁ ସେ ଦେଖାଉଥିବା ସମ୍ମାନ ଅନ୍ୟମାନଙ୍କ ପାଇଁ ପ୍ରେରଣା ବୋଲି ମିଆଁଦାଦ ମତ ରଖିଥିଲେ।