ମାଞ୍ଚେଷ୍ଟର୍‌ରେ ବୁମ୍‌ରାଙ୍କୁ ଖେଳାଇବାକୁ ବାଧ୍ୟ!

ଲଣ୍ଡନ୍‌: ପାଞ୍ଚ ମ୍ୟାଚ୍‌ ବିଶିଷ୍ଟ ତେନ୍ଦୁଲକର-ଆଣ୍ଡରସନ୍‌ ଶୃଙ୍ଖଳାରେ ଭାରତ ୧-୨ରେ ପଛୁଆ ରହିଛି। ଆସନ୍ତା ସପ୍ତାହ ବୁଧବାରଠାରୁ ମାଞ୍ଚେଷ୍ଟର୍‌ରେ ଖେଳାଯିବାକୁ ଥିବା ଚତୁର୍ଥ ଟେଷ୍ଟ୍‌ ପାଇଁ ଭାରତୀୟ ଦଳ ମଧ୍ୟ ଗୁରୁବାରଠାରୁ ଅଭ୍ୟାସ ପର୍ବ ଆରମ୍ଭ କରି ଦେଇଛି। କେବଳ ଯଶପ୍ରୀତ୍ ବୁମ୍‌ରା, ମହମ୍ମଦ ସିରାଜ, ଆକାଶ ଦୀପ ଓ ଋଷଭ ପନ୍ତ୍‌ ଅଭ୍ୟାସ ନ କରି ଜିମ୍‌ରେ ସମୟ କାଟିଛନ୍ତି। ପ୍ରତିଥର ଭଳି ଏଥର ମଧ୍ୟ ବୁମ୍‌ରାଙ୍କ କାର୍ଯ୍ୟଭାର ପରିଚାଳନା ବି ଚର୍ଚ୍ଚାକୁ ଆସିଛି। ପୂର୍ବରୁ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଓ ଅଧିନାୟକ ଶୁବମନ ଗିଲ୍‌ କହି ସାରିଛନ୍ତି ଏହି ଗସ୍ତରେ ବୁମ୍‌ରା ୩ଟି ଟେଷ୍ଟ୍ ଖେଳିବେ। ସେହି ଦୃଷ୍ଟିରୁ ପରବର୍ତ୍ତୀ ଶେଷ ୨ଟିରୁ ବୁମ୍‌ରା ଗୋଟିଏ ଖେଳିବେ। ଭାରତ ଏବେ ଶୃଙ୍ଖଳାରେ ପଛରେ ପଡ଼ିଥିବାରୁ ବୁମ୍‌ରାଙ୍କୁ ଖେଳାଇବା ଭାରତ ପାଇଁ ବାଧ୍ୟବାଧକତା ପରିସ୍ଥିତି ସୃଷ୍ଟି ହୋଇଛି। ମ‌ାଞ୍ଚେଷ୍ଟର୍ ଟେଷ୍ଟ୍‌ ଆଉ ୪ ଦିନ ଥିବାରୁ ବୁମ୍‌ରା ବି ଲର୍ଡସ କ୍ଲାନ୍ତିରୁ ବାହାରି ସତେଜ ହୋଇଯାଇଥିବେ। ଭାରତୀୟ ବୋଲିଂର ବୁଲେଟ୍‌ ଭାବେ ବିବେଚିତ ହେଉଥିବାରୁ ବୁମ୍‌ରାଙ୍କୁ ବି କୌଣସି ମତେ ଏହି ଟେଷ୍ଟ୍‌ ଖେଳିବାର ଆବଶ୍ୟକତା ରହିଛି। ‘‘ଆମେ ଜାଣିଛୁ ବୁମ୍‌ରା ଶେଷ ଦୁଇଟିରୁ ଗୋଟିଏ ଟେଷ୍ଟ୍‌ ଖେଳିବେ। ଶୃଙ୍ଖଳା ଜୀବନ୍ତ ଥିବାରୁ ତାଙ୍କୁ ଖେଳାଇବାକୁ ପଡ଼ିବ’’ ବୋଲି କହିଛନ୍ତି ଭାରତୀୟ ଦଳ ସହକାରୀ ପ୍ରଶିକ୍ଷକ ରୢାନ୍‌ ଟେନ୍‌ ଡସେଟ୍‌। ଆମେ ସମସ୍ତ ଦିଗକୁ ବି ଦେଖୁଛୁ, ଚତୁର୍ଥ ଟେଷ୍ଟ୍‌ ପାଇଁ କିଛି ଦିନ ବିରାମ ରହିଛି। ମ୍ୟାଚ୍ ଜିତିବାକୁ ଆମ ନିକଟରେ ଶ୍ରେଷ୍ଠ ସୁଯୋଗ ବି ରହିଛି। ବୋଲି ସେ ମଧ୍ୟ ପ୍ରକାଶ କରିଥିଲେ।

ଭାରତୀୟ ଦଳ ପାଇଁ ଅନ୍ୟତମ ଚିନ୍ତାର କାରଣ ହେଉଛି ରିଜର୍ଭ ଦ୍ରୁତ  ବୋଲର ଅର୍ଶଦୀପ ସିଂହ ଗୁରୁବାର ଅଭ୍ୟାସ ସମୟରେ ନିଜ ହାତରେ ଆଘାତ ପାଇଛନ୍ତି। ତାଙ୍କ ବାମହାତ ଗୁରୁତର ରହିଥିବା ଅନୁମାନ କରାଯାଉଛି। ପ୍ରସିଦ୍ଧ କୃଷ୍ଣ ପ୍ରଥମ ଦୁଇ ଟେଷ୍ଟ୍‌ରେ ରଙ୍ଗହୀନ ଥିବାରୁ ବୁମରାଙ୍କ ବିକଳ୍ପ ଅର୍ଶଦୀପ ଥିଲେ। ଏବେ ବୁମ୍‌ରାଙ୍କ ଉପରେ ଭାରତ ନିର୍ଭର କରିବାକୁ ବାଧ୍ୟ ହେବ। ଆହତ ସମସ୍ୟା ଭିତରେ ରହିଥିଲେ ମଧ୍ୟ ଇଂଲଣ୍ଡ ଅଧିନାୟକ ବେନ୍ ଷ୍ଟୋକ୍ସ ବୋଲିଂ କରିବା ସହ ଇଂଲଣ୍ଡକୁ ଜିତାଇ ପାରୁଛନ୍ତି। ଭାରତୀୟ ଦଳ ସହକାରୀ ପ୍ରଶିକ୍ଷକ ରୢାନ୍ ଟେନ୍ ଡସେଟ୍‌ କିନ୍ତୁ କହିଛନ୍ତି, ଆମକୁ ଆମ ସାମର୍ଥ୍ୟ ଯୋଜନାରେ ଖେଳିବାକୁ  ପଡ଼ିବ, ଅନ୍ୟର ନୁହେଁ। ବୁମ୍‌ରା ଛୋଟ ଛୋଟ ସ୍ପେଲ୍ ବୋଲିଂ କରିବାକୁ ପସନ୍ଦ କରନ୍ତି। ସିରାଜ ଓ ‌ଷ୍ଟୋକ୍ସଙ୍କ ଭଳି ବୋଲର ସପ୍ତମ, ଅଷ୍ଟମ କି ନବମ ଓଭରରେ ବି ଭଲ ପ୍ରଦର୍ଶନ କରିପାରନ୍ତି, ଯାହା ଅନ୍ୟ କେହି କରିପାରି ନଥାନ୍ତି ବୋଲି ମଧ୍ୟ ସେ କହିଥିଲେ। ଲର୍ଡସ ଟେଷ୍ଟ୍ ଅବସରରେ ଆହତ ହୋଇଥିବା ୱିକେଟ୍‌ରକ୍ଷକ ବ୍ୟାଟର୍ ଋଷଭ ପନ୍ତ୍‌ ମଧ୍ୟ ଖେଳିବେ ବୋଲି ସେ ସୂଚନା ଦେଇଛନ୍ତି। କିନ୍ତୁ ସେ କିପିଂ କରିପାରିବେ କି ନା ଦେଖିବାକୁ ପଡ଼ିବ, ଏଭଳି କ୍ଷେତ୍ରରେ ଧ୍ରୁବ ଜୁରେଲ ବି ଖେଳିପାରନ୍ତି ବୋଲି ସେ କହିଥିଲେ। ପୂର୍ବତନ ମୁଖ୍ୟ ପ୍ରଶିକ୍ଷକ ରବି ଶାସ୍ତ୍ରୀ କିନ୍ତୁ କହିଛନ୍ତି ‘ପନ୍ତ୍ ଯଦି କିପିଂ କରିପାରିବେ ନାହିଁ ତେବେ ଖେଳିବା ଉଚିତ ନୁହେଁ’।