ଆଇପିଏଲ : ବଟଲରଙ୍କ ବିସ୍ଫୋରକ ଶତକ, ମୁମ୍ବାଇ ଆଗରେ ୧୯୪ରନର  ବିଜୟ ଲକ୍ଷ୍ୟ

ମୁମ୍ବାଇ : ସ୍ଥାନୀୟ ଡିଓ୍ବାଇ ପାଟିଲ କ୍ରିକେଟ ଷ୍ଟାଡିୟମଠାରେ ଚାଲିଥିବା ଆଇପିଏଲ-୨୦୨୨ର ୯ମ ମ୍ୟାଚରେ ମୁମ୍ବାଇ ଆଗରେ ୧୯୪ ରନର ବିଜୟ ଲକ୍ଷ୍ୟ ରଖିଛି ରାଜସ୍ଥାନ ରୟାଲ୍ସ ।

ଏହି ମ୍ୟାଚରେ ମୁମ୍ବାଇ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ରାଜସ୍ଥାନ ନିର୍ଦ୍ଧାରିତ ୨୦ ଓଭରରେ ୮ ଓ୍ବିକେଟ ହରାଇ ୧୯୩ ରନ କରିଥିଲା । ତେବେ ଆଜିର ମ୍ୟାଚରେ ଜସ ବଟଲରଙ୍କ ଧମାକା ଦେଖିବାକୁ ମିଳିଥିଲା । ସେ ମାତ୍ର ୬୮ଟି ବଲରୁ ୫ ଛକା ୧୧ ଚୌକା ସହ ୧୦୦ ରନ କରି ରାଜସ୍ଥାନ ପାଇଁ ଏକ ବଡ ସ୍କୋର କରିବାକୁ ସହାୟତା କରିଥିଲେ । ଏହା ଚଳିତ ଆଇପିଏଲର ପ୍ରଥମ ଶତକ ।

ଅନ୍ୟପକ୍ଷରେ ସିମରନ ହେଟମେୟର ୩୫ ଓ ସଂଜୁ ସାମସନ ୩୦ ରନ କରିଥିଲେ । ତେବେ ଏହି ୩ ବ୍ୟାଟ୍ସମ୍ୟାନଙ୍କ ବ୍ୟତୀତ ଅନ୍ୟ କୌଣସି ବ୍ୟାଟ୍ସମ୍ୟାନ ଭଲ ସ୍କୋର କରିପାରିନଥିଲେ । ଏହି କାରଣରୁ ଦଳୀୟ ସ୍କୋର ୨୦୦ରନରୁ ପଛରେ ରହିଯାଇଥିଲା । ମୁମ୍ବାଇ ପକ୍ଷରୁ ଯଶପ୍ରୀତ ବୁମରା ୩ଟି ଓ ଟାଇମାଲ ମିଲ୍ସ ୩ଟି ଓ୍ବିକେଟ ନେଇଥିଲେ ।

ଶନିବାର ଆଇପିଏଲରେ ୨ଟି ମ୍ୟାଚ ଖେଳାଯାଉଛି । ଆଜିର ୨ୟ ମ୍ୟାଚରେ ଗୁଜୁରାଟ ଟାଇଟାନ୍ସ ଦିଲ୍ଲୀ କ୍ୟାପିଟାଲ୍ସକୁ ଖେଳିବ । ଶୁକ୍ରବାର ଖେଳାଯାଇଥିବା ମ୍ୟାଚରେ କୋଲକାତା ପଂଜାବକୁ ୬ ଓ୍ବିକେଟରେ ହରାଇଥିଲା ।