ବିଡବ୍ଲୁଏଫ୍ ବିଶ୍ବ ଚାମ୍ପିଅନ୍ସିପ୍: ଲକ୍ଷ୍ୟଙ୍କୁ ବିଦାକଲେ ପ୍ରଣୟ; ସାଇନା ବି ହାରିଲେ
ଅର୍ଜୁନ-କପିଳା, ଚିରାଗ-ସାତ୍ତ୍ବିକ୍ ବି କ୍ବାର୍ଟର ଫାଇନାଲ୍ରେ
ଟୋକିଓ: ଏଠାରେ ଚାଲିଥିବା ବିଡବ୍ଲୁଏଫ୍ ବିଶ୍ବ ଚାମ୍ପିଅନ୍ସିପ୍ର ପୁରୁଷ ଏକକ ବର୍ଗରେ ଦୁଇ ଭାରତୀୟ ତାରକାଙ୍କ ପ୍ରିକ୍ବାର୍ଟର ଫାଇନାଲ୍ ଲଢ଼େଇରେ ବାଜି ମାରିନେଲେ ଏଚ୍ଏସ୍ ପ୍ରଣୟ। ପ୍ରାୟ ୧ ଘଣ୍ଟା ୧୫ ମିନିଟ୍ ଧରି ଚାଲିଥିବା ଏହି ମୁକାବିଲାରେ ପ୍ରଥମ ଗେମ୍କୁ ହାରିବା ପରେ ଚମତ୍କାର ପ୍ରତ୍ୟାବର୍ତନ କରି ପ୍ରଣୟ ୧୭-୨୧, ୨୧-୧୬ ଓ ୨୧-୧୭ରେ ନିଜ ଦେଶର ତଥା ଗତ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜେତା ଲକ୍ଷ୍ୟ ସେନ୍ଙ୍କୁ ପରାସ୍ତ କରି କ୍ବାର୍ଟର ଫାଇନାଲ୍ରେ ସ୍ଥାନ ପକ୍କା କରିନେଲେ। ଉଭୟ ଲକ୍ଷ୍ୟ ଓ ପ୍ରଣୟଙ୍କ ମଧ୍ୟରେ ଚଳିତ ବର୍ଷର ଏହା ଥିଲା ଚତୁର୍ଥ ମୁକାବିଲା। ଗୁରୁବାର ଏଠାରେ ଜିତିବା ପରେ ପରସ୍ପର ମୁହାଁମୁହିଁର ଫଳାଫଳ ୨-୨ ସ୍ଥିତିରେ ପହଞ୍ଚିଛି। ଏବେ କ୍ବାର୍ଟର ଫାଇନାଲ୍ରେ ପ୍ରଣୟଙ୍କ ମୁକାବିଲା ଚୀନ୍ ତାରକା ଝାଓ ଜୁନ୍ ପେଙ୍ଗ୍ଙ୍କ ସହ ହେବ।
Sambad is now on WhatsApp
Join and get latest news updates delivered to you via WhatsApp
ପ୍ରଣୟଙ୍କ ବ୍ୟତୀତ ଦୁଇ ଭାରତୀୟ ପୁରୁଷ ଯୁଗଳ ଯୋଡ଼ି ଏମ୍ଆର୍ ଅର୍ଜୁନ-ଧ୍ରୁବ କପିଳା ଏବଂ ଚିରାଗ ସେଟ୍ଟୀ-ସାତ୍ତ୍ବିକ୍ସାଇରାଜ ରାଙ୍କିରେଡୀ ମଧ୍ୟ ପ୍ରିକ୍ବାର୍ଟର ଫାଇନାଲ୍ ଜିତି କ୍ବାର୍ଟର ଫାଇନାଲ୍ରେ ପହଞ୍ଚି ଯାଇଛନ୍ତି। ଅର୍ଜୁନ-କପିଳା ଅଣମାନ୍ୟତାପ୍ରାପ୍ତ ଯୋଡ଼ି ଗୁରୁବାର ସିଙ୍ଗାପୁର ଯୋଡ଼ି ଟେରି ହି ଓ ଲୋହ କିନ୍ ହିନ୍ଙ୍କୁ ୧୮-୨୧, ୨୧-୧୫ ଓ ୨୧-୧୬ରେ ଏବଂ ଚିରାଗ-ସାତ୍ତ୍ବିକ୍ ଯୋଡ଼ି ୨୧-୧୨, ୨୧-୧୦ ସିଧାସଳଖ ଗେମ୍ରେ ଡେନ୍ମାର୍କ ଯୋଡ଼ି ଜେପା ବେ-ଲାସେ ମୋଲ୍ଡେଡେଙ୍କୁ ପରାସ୍ତ କରିଛନ୍ତି। କ୍ବାର୍ଟର ଫାଇନାଲ୍ରେ ଅର୍ଜୁନ-କପିଳା ଯୋଡ଼ି ତୃତୀୟ ମାନ୍ୟତାପ୍ରାପ୍ତ ଇଣ୍ଡୋନେସିଆ ଯୋଡ଼ି ମହମ୍ମଦ ଏହସାନ-ହେନ୍ଦ୍ରା ସେତିୱାନ ଏବଂ ଚିରାଗ-ସାତ୍ତ୍ବିକ୍ ଦ୍ବିତୀୟ ମାନ୍ୟତାପ୍ରାପ୍ତ ଜାପାନ ଯୋଡ଼ି ଟାକୁରୋ ହୋକି-ୟୁଗୋ କୋବେୟାସିଙ୍କୁ ଭେଟିବେ। ତେବେ ଅଲିମ୍ପିକ୍ କାଂସ୍ୟ ବିଜୟିନୀ ସାଇନା ନେହ୍ବାଲ ମହିଳା ଏକକ ପ୍ରିକ୍ବାର୍ଟର ଫାଇନାଲ୍ରେ ପ୍ରବଳ ଲଢ଼ିବା ସତ୍ତ୍ବେ ପରାଜୟ ବରଣ କରିଛନ୍ତି। ତାଙ୍କୁ ୨୧-୧୭, ୧୬-୨୧, ୨୧-୧୩ରେ ବୁସାନାନ୍ ଓଙ୍ଗ୍ବାମ୍ରୁଙ୍ଗ୍ଫାନ୍ ପରାସ୍ତ କରି ବିଦାୟ ରାସ୍ତା ଦେଖାଇ ଦେଇଥିଲେ।