ଭୁବନେଶ୍ବର: ରାଜ୍ୟ ଫୁଟ୍‌ବଲ୍‌ରେ ଅର୍ଦ୍ଧଶତାବ୍ଦୀର ଇତିହାସ ରଖିଥିବା ରାଜଧାନୀର ଅଗ୍ରଣୀ ଫୁଟ୍‌ବଲ୍ କ୍ଲବ୍‌ ‘କ୍ଲବ୍‌-୭୩’ ଖୁବ୍‌ଶୀଘ୍ର ନିଜ ପୂର୍ବ ଦୁନିଆକୁ ଫେରିବାକୁ ପ୍ରସ୍ତୁତ ହୋଇଛି। ୨୦୨୫ ମସିହା ନୂଆ ସମ୍ଭାବନା ଆଣିବା ଭଳି ଏହି ସଫଳତମ ଫୁଟ୍‌ବଲ୍ କ୍ଲବ୍‌ ଯୁବ ଓ ବରିଷ୍ଠ ବର୍ଗର ଖେଳାଳିଙ୍କୁ ଏକାଠି କରି ପୁଣି ଥରେ ପଡ଼ିଆକୁ ଓହ୍ଲାଇବାକୁ ଖସଡ଼ା ପ୍ରସ୍ତୁତ କରି ସାରିଛି। ରାଜ୍ୟର କ୍ଷମତା ରାଜନୀତିରେ ପଟ୍ଟ ପରିବର୍ତ୍ତନ ପରେ କ୍ଲବ୍‌-୭୩ ନୂଆ ଜୀବନ ପାଇଥିବାରୁ ଏଭଳି ଆଶା ସଞ୍ଚାର କରିଛନ୍ତି କ୍ଲବ୍‌-୭୩ର କର୍ମକର୍ତା। ‘କଳିଙ୍ଗ ଷ୍ଟାଡିୟମ୍‌ ଆମ ଘର ଭଳି ଥିଲା। କ୍ଲବ୍‌-୭୩ର ଏହା ଥିଲା ଘରୋଇ ଅଭ୍ୟାସ ପଡ଼ିଆ। ୧୯୯୯ ମସିହାର ମହାବାତ୍ୟାରେ ଏଠାରେ ଆମେ ଅନେକ ସେବାମୂଳକ କାର୍ଯ୍ୟ କରିବା ସହ ଗଛ ଲଗାଇବାରେ ବଡ଼ ଯୋଗଦାନ ରଖିଥିଲୁ। ସମୟ ଏମିତି ଆସିଥିଲା କ୍ଲବ୍‌-୭୩ର ୧୦/୧୧ ଖେଳାଳି ଏକକାଳୀନ ରାଜ୍ୟ ସନ୍ତୋଷ ଟ୍ରଫି ଦଳରେ ଖେଳିଥିଲେ। କିନ୍ତୁ କିଛି ନ୍ୟସ୍ତସ୍ବାର୍ଥ ପ୍ରଶାସକଙ୍କ କାରଣରୁ ଆମକୁ କଳିଙ୍ଗ ଷ୍ଟାଡିୟମ୍‌ରୁ ବିଦା କରିଦିଆଯାଇଥିଲା। ୬/୭ ବର୍ଷ ହେବ ଆମେ ଅଭ୍ୟାସ କରିପାରିନୁ କି ରାଜ୍ୟର କୌଣସି ପ୍ରମୁଖ ପ୍ରତିଯୋଗିତାରେ ଖେଳିପାରିନୁ। ନିଜସ୍ବ ପଡ଼ିଆ ନଥିବାରୁ ଏହା ବଡ଼ ପ୍ରତିବଂଧକ ହୋଇଛି। କିନ୍ତୁ ଏବେ ଏକ ନୂଆ ପଡ଼ିଆର ଅନୁମୋଦନ ମିଳିସାରିଛି। ନୂଆ ବର୍ଷରୁ ଆମେ ନୂଆ ଦଳକୁ ନେଇ ଫେରୁଛୁ’ ବୋଲି ଆଶାର ସହ କହିଛନ୍ତି କ୍ଳବ୍-୭୩ର ସାଧାରଣ ସମ୍ପାଦକ ସୁବ୍ରତ ପଟ୍ଟନାୟକ। ରବିବାର କ୍ଲବ୍‌-୭୩ର ପ୍ରତିଯୋଗିତା ‘ସତ୍ୟବ୍ରତ-ତପନ ସ୍ମାରକୀ ରାଜ୍ୟସ୍ତରୀୟ ଫୁଟ୍‌ବଲ୍ ପ୍ରତ‌ିଯୋଗିତା’ର ଖେଳସୂଚୀ ଘୋଷଣା ଅବସରରେ ଏଭଳି ସୂଚନା ଦେଇଛନ୍ତି ଏହି ପୂର୍ବତନ ଫୁଟ୍‌ବଲ୍‌ର।

Advertisment

ଅର୍ଦ୍ଧଶତାବ୍ଦୀ ଧରି ରାଜଧାନୀ ଫୁଟ୍‌ବଲ୍‌ରେ ଅନ୍ୟତମ ଅଗ୍ରଣୀ ଭୂମିକା ତୁଲାଇଥିବା କ୍ଲବ୍‌-୭୩ର ଏ ବର୍ଷର ପ୍ରତିଯୋଗିତା ଡିସେମ୍ବର ୨୬ରୁ ୨୯ ତାରିଖ ପର୍ଯ୍ୟନ୍ତ ଖେଳାଯିବ। ରାଜ୍ୟର ପ୍ରମୁଖ ୮ ଦଳ ଏଥିରେ ଅଂଶଗ୍ରହଣ କରିବେ। କଟକର ଇଣ୍ଡିପେଣ୍ଡେଣ୍ଟ୍‌ କ୍ଲବ୍‌, ସନ୍‌ରାଇଜ୍‌, ଗ୍ୟାଲାଣ୍ଟ୍ କ୍ଲବ୍‌, ଭୁବନେଶ୍ବରର କିଶୋର କ୍ଲବ୍‌, ୟୁନିଟ୍‌-୬ ଆଥଲେଟିକ୍ ଆସୋସିଏସନ୍‌, ସମ୍ବଲପୁରର ମା’ ସମଲେଶ୍ବରୀ ଫୁଟ୍‌ବଲ୍ କ୍ଲବ୍‌, ଫୁଲ୍‌ବାଣୀ ଫୁଟ୍‌ବଲ୍ କ୍ଲବ୍ ସହ ଏକମାତ୍ର ପେସାଦାର ଦଳ ଓଡ଼ିଶା ପୁଲିସ୍‌ ଅଂଶଗ୍ରହଣ କରିବେ। ବିଜେତାକୁ ୧ ଲକ୍ଷ ଟଙ୍କା ଓ ଉପ ବିଜେତାକୁ ୫୦ ହଜାର ଟଙ୍କାର ପୁରସ୍କାର ରାଶି ପ୍ରଦାନ କରାଯିବ। ଦୁଇ ପରାଜିତ ସେମିଫାଇନାଲିଷ୍ଟ୍‌ ୨୫,୦୦୦ ଟଙ୍କା ‌ଲେଖାଏଁ ପାଇବେ। ମ୍ୟାଚ୍‌ର ଶ୍ରେଷ୍ଠ ଖେଳାଳି ସମେତ ପ୍ରତିଯୋଗିତାର ସମସ୍ତ ବ୍ୟକ୍ତିଗତ ବର୍ଗର ଶ୍ରେଷ୍ଠ ଖେଳାଳିଙ୍କୁ ୫ ହଜାର ଟଙ୍କା ଲେଖାଏଁ ପୁରସ୍କାର ପ୍ରଦାନ କରାଯିବ। ପ୍ରତିବ‌ର୍ଷ ଏହି ପ୍ରତିଯୋଗିତା କରାଯିବ ବୋଲି ଗତବର୍ଷ ଏହାର ସଭାପତି ତଥା ପୂର୍ବତନ କ୍ରିକେଟର୍ ଲଳିତେନ୍ଦୁ ବିଦ୍ୟାଧର ମହାପାତ୍ର ଘୋଷଣା କରିଥିବା‌ବେଳେ କଥା ରଖିବାକୁ ଯାଉଛନ୍ତି। ରବିବାରର ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ କ୍ଲବ୍‌ର ଉପ ସଭାପତି ସିଦ୍ଧାର୍ଥ ପାଢ଼ୀ, କାର୍ଯ୍ୟକାରୀ ସମିତି ସଦସ୍ୟ ତଥା ବରିଷ୍ଠ ପ୍ରଶିକ୍ଷକ ବିଜୟ କାନୁନ୍‌ଗୋ, ସହକାରୀ ସମ୍ପାଦକ ଦେବଭକ୍ତ ବେଜ, ସଦସ୍ୟ ସୁଧାକର ପହି ପ୍ରମୁଖ ଉପସ୍ଥିତ ଥିଲେ।