ଶୁଭ୍ରାଂଶୁ ସେନାପତିଙ୍କୁ ରିଲିଜ କଲା ଚେନ୍ନାଇ ସୁପରକିଙ୍ଗସ

ଚେନ୍ନାଇ: ଆଇପିଏଲ ୨୦୨୪କୁ ନେଇ ଚେନ୍ନାଇ ସୁପରକିଙ୍ଗସ ପକ୍ଷରୁ ଖେଳାଳିଙ୍କ ରିଲିଜ ଓ ରିଟେନ ତାଲିକା ପ୍ରକାଶ ପାଇଛି | ଦଳ ପକ୍ଷରୁ ପ୍ରକାଶିତ ତାଲିକାରେ ପ୍ରଶଂସକଙ୍କ ପାଇଁ ସବୁଠୁ ବଡ ଖୁସି ଖବର ହେଉଛି ଯେ ଏଥର ବି ମହେନ୍ଦ୍ର ସିଂ ଧୋନିଙ୍କୁ ରଖାଯାଇଛି | ଅର୍ଥାତ ସେ ଟୁର୍ନାମେଣ୍ଟର ପରବର୍ତ୍ତୀ ସିଜନରେ ଦଳର ଦାୟିତ୍ୱ ନେବେ | ଏହା ବ୍ୟତୀତ ଚେନ୍ନାଇ କିଛି କଠୋର ନିଷ୍ପତ୍ତି ନେଇଛି ଏବଂ ଷ୍ଟାର ଅଲରାଉଣ୍ଡର ବେନ ଷ୍ଟୋକ୍ସଙ୍କୁ ରିଲିଜ କରିଛି। ଚେନ୍ନାଇରୁ ମୋଟ ୮ଜଣ ଖେଳାଳିଙ୍କୁ ରିଲିଜ କରାଯାଇଛି। ଏହି ତାଲିକାରେ ବେନ୍ ଷ୍ଟୋକ୍ସ, ଅମ୍ବାତି ରାୟଡୁଙ୍କ ସହ ଓଡ଼ିଆ କ୍ରିକେଟର ଶୁଭ୍ରାଂଶୁ ସେନାପତି ପ୍ରମୁଖ ରହିଛନ୍ତି |

ବଡ କଥା ଯେ ଷ୍ଟୋକ୍ସଙ୍କୁ ଚେନ୍ନାଇ ୨୦୨୩ ମିନି ନିଲାମରେ ୧୬.୨୫ କୋଟି ଟଙ୍କା ମୂଲ୍ୟରେ କିଣିଥିଲା, ଏହା ପରେ ଇଂଲଣ୍ଡ ଅଲରାଉଣ୍ଡର ଚେନ୍ନାଇ ପାଇଁ ୨ଟି ମ୍ୟାଚ୍ ଖେଳିଥିଲେ | ଏହି ତାଲିକାରେ ମହେନ୍ଦ୍ର ସିଂ ଧୋନି, ରବୀନ୍ଦ୍ର ଜାଡେଜା, କନୱେ, ରୁତୁରାଜ ଗାଇକୱାଡ, ମୋଇନ ଅଲି, ଶିବମ ଦୁବେ, ରାଜବର୍ଦ୍ଧନ ହେଂଗରେକର, ମିଚେଲ ସାଣ୍ଟନର୍, ଦୀପକ ଚହର, ତୁଷାର ଦେଶପାଣ୍ଡେ, ମାଥିଶା ପୃଥରିନା, ସିମରଜିତ୍ ସିଂ, ପ୍ରଶାନ୍ତ ସୋଲଙ୍କି, ମହିଷ୍ ତୀଖଣା, ଆଜିଙ୍କ୍ୟ ରାହାଣେ, ଶେଖ ରସିଦ, ନିଶାନ୍ତ ସିନ୍ଧୁ, ଅଜୟ ମଣ୍ଡଳ ପ୍ରମୁଖଙ୍କୁ ରିଟେନ କରାଯାଇଛି | ସେହିପରି ବେନ୍ ଷ୍ଟୋକ୍ସ, ଡ୍ୱେନ୍ ପ୍ରିଟୋରିୟସ୍, କାଇଲ୍ ଜେମିସନ୍, ଆକାଶ ସିଂ, ଅମ୍ବାତି ରାୟୁଡୁ ,ସିସଣ୍ଡା ମାଗାଲା, ଭଗତ ବର୍ମା, ଶୁଭ୍ରାଂଶୁ ସେନାପତି ପ୍ରମୁଖଙ୍କୁ ରିଲିଜ କରାଯାଇଛି |