ବିସିସିଆଇର ଜାତୀୟ ଚୟନ କମିଟିରେ ସ୍ଥାନ ପାଇଲେ ଦେବାଶିଷ ମହାନ୍ତି, ଚେତନ ଶର୍ମା କମିଟିର ଅଧ୍ୟକ୍ଷ ନିଯୁକ୍ତ

ଭୁବନେଶ୍ବର : ଓଡ଼ିଆ କ୍ରିକେଟ ଖେଳାଳି ତଥା ଭାରତୀୟ କ୍ରିକେଟଦଳର ପୂର୍ବତନ ମଧ୍ୟମଗତି ବୋଲର ଦେବାଶିଷ ମହାନ୍ତି  ବିସିସିଆଇର ଜାତୀୟ ଚୟନ କମିଟିରେ ସ୍ଥାନ ପାଇଛନ୍ତି । ତାଙ୍କ ସହିତ ଆବେ କୁରୁଭିଲ୍ଲା ମଧ୍ୟ ୫ ଜଣିଆ ସିନିୟର ଚୟନ କମିଟିରେ ସ୍ଥାନ ପାଇଛନ୍ତି । ପୁରୁଖା କ୍ରିକେଟ ଖେଳାଳି ଚେତନ ଶର୍ମାଙ୍କୁ ଚୟନ କମିଟିର ଅଧ୍ୟକ୍ଷ ନିଯୁକ୍ତ କରାଯାଇଛି ।  ୫ ଜଣିଆ ଚୟନ କମିଟିରେ ଏହା ପୂର୍ବରୁ ସୁନୀଲ ଯୋଶୀ ଓ ହରବିନ୍ଦର ସିଂ ସ୍ଥାନ ପାଇଛନ୍ତି । ଏ ନେଇ ଟ୍ୱିଟ୍ କରି ସୂଚନା ଦେଇଛି ବିସିସିଆଇ । ଦେବାଶିଷ ମହାନ୍ତି ଭାରତ ପାଇଁ ୨ଟି ଟେଷ୍ଟ, ୪୫ଟି ଏକ ଦିବସୀୟ ମ୍ୟାଚ ଖେଳିଛନ୍ତି ।  ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ଓଡ଼ିଶା କ୍ରିକେଟ ଦଳର ମୁଖ୍ୟ କୋଚ୍ ଭାବେ କାର୍ଯ୍ୟ କରିଛନ୍ତି ଦେବାଶିଷ ।

ଏହି ପଦ ପାଇଁ ମୋଟ ୧୧ ଜଣ ପୂର୍ବତନ ଖେଳାଳି ଆବେଦନ କରିଥିଲେ । ଏମାନଙ୍କ ମଧ୍ୟରୁ ପଶ୍ଚିମ ଜୋନରୁ ଅଜିତ ଅଗରକର, ଆବେ କୁରୁଭିଲ୍ଲା ଓ ନୟନ ମୋଙ୍ଗିଆ ଆବେଦନ କରିଥିଲେ । ସେହିଭଳି ଉତ୍ତର ଜୋନରୁ ଚେତନ ଶର୍ମା, ମନିନ୍ଦର ସିଂ, ବିଜୟ ଦାହିୟା, ଅଜୟ ରାତ୍ରା ଓ ନିଖିଲ ଚୋପ୍ରା ଆବେଦନ ପତ୍ର ଭରିଥିଲେ । ପୂର୍ବ ଜୋନରୁ ଶିବସୁନ୍ଦର ଦାସ, ଦେବାଶିଷ ମହାନ୍ତି ଓ ରାଣାଦେବ ବୋଷ  କରିଥିଲେ ଆବେଦନ । ଏହି ୧୧ ଜଣଙ୍କ ମଧ୍ୟରୁ ୫ ଜଣଙ୍କ ନାମ ସିଏସି ସିଲେକ୍ସନ କମିଟିକୁ ପଠାଇଥିଲା, ଯେଉଁଥିରେ ଅଗରକର, ଚେତନ ଶର୍ମା, ମନିନ୍ଦର ସିଂ, ନୟନ ମୋଙ୍ଗିଆ ଓ ଦେବାଶିଷ ମହାନ୍ତିଙ୍କ ନାମ ସାମିଲ ଥିଲା ।

ଗତକାଲି ଅନ୍ୟତମ ଓଡ଼ିଆ କ୍ରିକେଟ ଖେଳାଳି ପ୍ରଜ୍ଞାନ ଓଝାଙ୍କୁ ଆଇପିଏଲ ଗଭର୍ଣ୍ଣିଂ କାଉନସିଲରେ ସ୍ଥାନ ମିଳିଥିଲା । ସେ ଭାରତୀୟ କ୍ରିକେଟର୍ସ ଆସୋସିଏସନର ପ୍ରତିନିଧିଭାବେ  ଆଇପିଏଲ ଗଭର୍ଣ୍ଣିଂ କାଉନସିଲରେ ସ୍ଥାନ ପାଇଛନ୍ତି ।

ସମ୍ବନ୍ଧିତ ଖବର