ଆଇପିଏଲ୍: ପଂଜାବ୍ କିଙ୍ଗ୍ସକୁ ୧୭ ରନ୍ରେ ପରାସ୍ତ କଲା ଦିଲ୍ଲୀ କ୍ୟାପିଟାଲ୍ସ
ମୁମ୍ବାଇ: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)-୨୦୨୨ର ୬୪ତମ ମ୍ୟାଚ୍ରେ ପଂଜାବ କିଙ୍ଗ୍ସକୁ ୧୭ ରନ୍ରେ ପରାସ୍ତ କରିଛି ଦିଲ୍ଲୀ । ଦ୍ବିତୀୟ ପାଳିରେ ପଂଜାବ ୧୬୦ ରନ୍ର ଲକ୍ଷ୍ୟକୁ ପିଛା କରି ୨୦ ଓଭରରେ ୯ ୱିକେଟ ହରାଇ ୧୪୨ ରନ୍ କରି ପରାସ୍ତ ହୋଇଛି । ପଂଜାବ ପକ୍ଷରୁ ଜିତେଶ ଶର୍ମା ସର୍ବାଧିକ ୪୪ ରନ୍ କରିଥିବା ବେଳେ ଜନି ବେୟାରଷ୍ଟୋ ୨୮ ଓ ଶିଖର ଧାୱନ ୧୯ ରନ୍ କରିଥିଲେ । ଅନ୍ୟ ପଟେ ଦିଲ୍ଲୀ ପକ୍ଷରୁ ଘାତକ ବୋଲିଂ ଦେଖିବାକୁ ମିଳିଥିଲା । ଶାର୍ଦ୍ଦୁଲ ଠାକୁର ୪ ୱିକେଟ ନେଇଥିବା ବେଳେ ଅକ୍ଷର ପଟେଲ, କୁଲଦୀପ ଯାଦବ ୨-୨ ୱିକେଟ ଓ ନର୍ଟେଜ୍ ଗୋଟେ ୱିକେଟ ନେଇ ଦିଲ୍ଲୀକୁ ବିଜୟ ଦେଇଥିଲେ । ଏହି ବିଜୟ ସହ ଦିଲ୍ଲୀ ୧୪ ପଏଣ୍ଟ ସଂଗ୍ରହ କରି ଟେବୁଲ ତାଲିକାର ୪ର୍ଥ ସ୍ଥାନରେ ରହିଛି ।
Sambad is now on WhatsApp
Join and get latest news updates delivered to you via WhatsApp
ଟସ୍ ଜିଣି ପଂଜାବ୍ର ଅଧିନାୟକ ମୟଙ୍କ ଅଗ୍ରଓ୍ଵାଲ ପ୍ରଥମେ ବୋଲିଂ ନିଷ୍ପତ୍ତି ନେଇଥିଲେ। ପଂଜାବ ତରଫରୁ ଆମନ୍ତ୍ରଣ ମିଳିବା ପରେ ଦିଲ୍ଲୀ ବ୍ୟାଟିଂ କରିଥିଲା। ଋଷଭ ପନ୍ତଙ୍କ ନେତୃତ୍ୱରେ ଦିଲ୍ଲୀ ନିର୍ଦ୍ଧାରିତ ୨୦ ଓଭରରେ ୭ ଓ୍ଵିକେଟ୍ ହରାଇ ୧୫୯ ରନ୍ କରିଥିଲା। ଫଳରେ ପଂଜାବକୁ ୧୬୦ ରନ୍ର ବିଜୟ ଲକ୍ଷ୍ୟ ମିଳିଥିଲା।
ବିସ୍ଫୋରକ ବ୍ୟାଟର ଡେଭିଡ ଓ୍ଵାର୍ଣ୍ଣର ଓ ସରଫରାଜ ଖାନ୍ ଦିଲ୍ଲୀ କ୍ୟାପିଟାଲ୍ସର ପାଳି ଆରମ୍ଭ କରିଥିଲେ। ମାତ୍ର ଦିଲ୍ଲୀର ବ୍ୟାଟିଂ ବିପର୍ଯ୍ୟୟ ପ୍ରଥମ ବଲ୍ରୁ ହିଁ ଦେଖାଯାଇଥିଲା। ଓ୍ଵାର୍ଣ୍ଣର ମାତ୍ର ଗୋଟିଏ ବଲ୍ ସାମ୍ନା କରି ଆଉଟ୍ ହୋଇ ପାଭିଲିଅନ୍କୁ ଫେରିଯାଇଥିଲେ। କିନ୍ତୁ ସରଫରାଜ ଓ ମିଚେଲ ମାର୍ଶ ୨ୟ ଓ୍ଵିକେଟ୍ ପାଇଁ ୫୧ ରନ୍ ଯୋଡ଼ିଥିଲେ। ସରଫରାଜ ୧୬ ବଲ୍ ଖେଳି ୩୨ ରନ୍ କରିଥିଲେ। ସେ ୫ ଚୌକା ଓ ଗୋଟିଏ ଛକା ମାରିଥିଲେ।
ଦିଲ୍ଲୀ ପାଇଁ ମିଚେଲ ମାର୍ଶ ସର୍ବାଧିକ ୬୩ ରନ୍ ସଂଗ୍ରହ କରିଥିଲେ। ସେ ୪୮ ବଲ୍ର ସାମ୍ନା କରି ୪ ଚୌକା ଓ ୩ ଛକା ମାରିଥିଲେ। ଲଲିତ ଯାଦବ ୨୪ ରନ୍, ଅକ୍ଷର ପଟେଲ ଅପରାଜିତ ୧୭ ରନ୍, ଋଷଭ ପନ୍ତ ୭ ରନ୍ କରିଥିଲେ। ପଂଜାବ ପକ୍ଷରୁ ଲିଆମ୍ ଲିଭିଂଷ୍ଟୋନ୍ ଓ ଅର୍ଶଦୀପ ସିଂହ ୩-୩ ଓ୍ଵିକେଟ୍ ନେଇଥିଲେ। କାଗିସୋ ରାବଡ଼ାଙ୍କୁ ଗୋଟିଏ ଓ୍ଵିକେଟ୍ ମିଳିଥିଲା।