ଡେନ୍ମାର୍କ ଓପନ୍: ସିନ୍ଧୁ, ଶ୍ରୀକାନ୍ତ ଓ ସମୀରଙ୍କ ବିଜୟ ଅଭିଯାନ
ଓଡେନ୍ସେ: ଦୁଇ ଥର ଅଲିମ୍ପିକ୍ ପଦକ ବିଜୟିନୀ ପିଭି ସିନ୍ଧୁଙ୍କ ସହ କିଦାମ୍ବି ଶ୍ରୀକାନ୍ତ ଓ ସମୀର ବର୍ମା ଚଳିତ ଡେନ୍ମାର୍କ ଓପନ୍ ବ୍ୟାଡ୍ମିଣ୍ଟନ ପ୍ରତିଯୋଗିତାରେ ବିଜୟରୁ ଅଭିଯାନ ଆରମ୍ଭ କରିଛନ୍ତି। ମଙ୍ଗଳବାର ମହିଳା ଏକକ ମୁକାବିଲାରେ ବିଶ୍ବ ବିଜୟିନୀ ସିନ୍ଧୁ ୨୧-୧୨, ୨୧-୧୦ରେ ତୁର୍କିର ନେସଲିହାନ ୟିଗିଟଙ୍କୁ ପରାସ୍ତ କରିଥିଲେ। ପୁରୁଷ ଏକକ ପ୍ରଥମ ରାଉଣ୍ଡରେ ୨୦୧୭ ବିଜେତା ଶ୍ରୀକାନ୍ତ ୨୧-୧୪, ୨୧-୧୧ରେ ନିଜ ଦେଶର ବି ସାଇ ପ୍ରଣୀତଙ୍କୁ ପରାସ୍ତ କରିଥିଲେ। ସେହିପରି ସମୀର ୨୧-୧୭, ୨୧-୧୪ରେ ୨୧ତମ ମାନ୍ୟତାପ୍ରାପ୍ତ କୁନ୍ଲାଭୁଟ ଭିତିଦସର୍ନଙ୍କୁ ହରାଇଥିଲେ। ପରବର୍ତ୍ତୀ ରାଉଣ୍ଡରେ ଚତୁର୍ଦଶ ମାନ୍ୟତାପ୍ରାପ୍ତ ଶ୍ରୀକାନ୍ତ ବିଶ୍ବର ୧ ନମ୍ବର ଜାପାନ୍ର କେଣ୍ଟୋ ମୋମୋତାଙ୍କୁ ଏବଂ ୨୮ ମାନ୍ୟତାପ୍ରାପ୍ତ ସମୀର ତୃତୀୟ ମାନ୍ୟତାପ୍ରାପ୍ତ ଡେନ୍ମାର୍କର ଆନ୍ଦେର୍ସ ଆଣ୍ଟୋନସେନ୍ଙ୍କୁ ଭେଟିବେ।
Sambad is now on WhatsApp
Join and get latest news updates delivered to you via WhatsApp
ପୁରୁଷ ଯୁଗଳରେ ଭାରତୀୟ ଯୋଡ଼ି ସାତ୍ତ୍ବିକ ସାଇରାଜ ରାଙ୍କିରେଡ୍ଡୀ ଓ ଚିରାଗ ସେଟ୍ଟୀ ଏବଂ ଏମ୍ଆର୍ ଅର୍ଜୁନ ଓ ଧ୍ରୁବ କପିଳ ପ୍ରଥମ ରାଉଣ୍ଡ ବାଧା ଅତିକ୍ରମ କରିଛନ୍ତି। ସାତ୍ତ୍ବିକ ଓ ଚିରାଗ ୨୩-୨୧, ୨୧-୧୫ରେ ଇଂଲଣ୍ଡର କଲମ ହେମିଂ ଓ ଷ୍ଟିଭେନ୍ ଷ୍ଟଲଉଡ୍ଙ୍କୁ ଏବଂ ଅର୍ଜୁନ ଓ ଧ୍ରୁବ ୨୧-୧୯, ୨୧-୧୫ରେ ଇଂଲଣ୍ଡର ଅନ୍ୟ ଏକ ଯୋଡ଼ି ବେନ୍ ଲେନ୍ ଓ ସିନ୍ ଭେଣ୍ଡିଙ୍କୁ ପରାସ୍ତ କରିଥିଲେ। ତେବେ ଅନ୍ୟ ଏକ ଭାରତୀୟ ଯୋଡ଼ି ମନୁ ଅତ୍ରି ଓ ବି ସୁମିତ ରେଡ୍ଡୀଙ୍କ ଅଭିଯାନ ଶେଷ ହୋଇଛି। ପ୍ରଥମ ରାଉଣ୍ଡରେ ଏହି ଯୋଡ଼ି ୧୮-୨୧, ୧୧-୨୧ରେ ମାଲେସିଆର ଜୋ ଜି ଫେଇ ଓ ନୁର ଇଜୁଦ୍ଦିନ୍ଙ୍କଠୁ ହାରିଯାଇଥିଲେ।