ଆଇପିଏଲ-୨୦୨୩: ରୋହିତଙ୍କୁ ହରାଇଲେ ଧୋନି

ମୁମ୍ବାଇ : ବେଷ୍ଟ ବନାମ ବେଷ୍ଟ ମୁକାବିଲାରେ ଚେନ୍ନାଇ ସୁପରକିଙ୍ଗ୍ସ ୭ ୱିକେଟ୍‌ରେ ମୁମ୍ବାଇ ଇଣ୍ଡିଆନ୍ସକୁ ପରାସ୍ତ କରି ତୃତୀୟ ମ୍ୟାଚ୍‌ରୁ ଦ୍ବିତୀୟ ବିଜୟ ପାଇଛି। ୱାଙ୍ଖଡେ ଷ୍ଟାଡିୟମ୍‌ରେ ଶନିବାର ରାତିରେ ଖେଳାଯାଇଥିବା ଏହି ମ୍ୟାଚ୍‌ରେ ଘରୋଇ ଦଳ ୧୫୭/୮ ସ୍କୋର କରିଥିଲା ବେଳେ ଧାର୍ଯ୍ୟ ଲକ୍ଷ୍ୟକୁ ଚେନ୍ନାଇ ୧୧ ବଲ୍‌ ପୂର୍ବରୁ ୭ ୱିକେଟ୍‌ ହାତରେ ଥାଇ ହାସଲ କରିନେଇଥିଲା। ଫଳରେ ୫ ଥର ବିଜେତା ମୁମ୍ବାଇ କ୍ରମାଗତ ଦ୍ବିତୀୟ ମ୍ୟାଚ୍‌ରେ ବି ପରାଜିତ ହୋଇଛି।

ଧୋନି ଟସ୍‌ ଜିତି ବୋଲିଂ ନେଇଥିଲେ। ରୋହିତ ଶର୍ମା ଓ ଈଶାନ କିଶନ ଆରମ୍ଭରୁ ଆକ୍ରମଣାତ୍ମକ ଖେଳିଥିଲେ। ୪ ଓଭରରେ ୩୮ ରନ୍‌ କରିନେଇଥିବା ଏହି ଯୋଡ଼ିକୁ ପୂର୍ବ ମ୍ୟାଚ୍‌ଗୁଡ଼ିକର ମହଙ୍ଗା ବୋଲର ତୁଷାର ଦେଶପାଣ୍ଡେ ଭାଙ୍ଗିଥିଲେ। ଦେଶପାଣ୍ଡେଙ୍କ ସୁଇଂରେ ପରାସ୍ତ ହୋଇ ରୋହିତ ବୋଲ୍ଡ ହେବା ପରେ ଈଶାନ ଓ କାମେରୁନ୍‌ ଗ୍ରିନ୍‌ଙ୍କୁ ରବୀନ୍ଦ୍ର ଜାଦେଜା ଆଉଟ୍‌ କରି ଚେନ୍ନାଇକୁ ପ୍ରାରମ୍ଭିକ ସଫଳତା ଦେଇଥିଲେ। ସୂର୍ଯ୍ୟକୁମାର ଯାଦବ, ତିଳକ ବର୍ମା, ଅର୍ସଦ ଖାନ୍‌ ମଧ୍ୟ ସ୍ପିନ୍‌ ଜାଲରେ ଫସିଯାଇଥିଲେ। ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ଚେନ୍ନାଇ ଯଦିଓ ପ୍ରଥମ ଓଭରରୁ ଡେଭନ କନୱେଙ୍କ ୱିକେଟ୍‌ ହରାଇଥିଲା, କିନ୍ତୁ ଏହା ଦଳୀୟ ପ୍ରଦର୍ଶନ ଉପରେ ବିଶେଷ ପ୍ରଭାବ ପକାଇପାରିନଥିଲା। ଋତୁରାଜ ଗାଏକ୍ବାଡ ରକ୍ଷଣାତ୍ମକ ଖେଳୁଥିଲା ବେଳେ ଆଜିଙ୍କ୍ୟ ରାହାଣେ ଦ୍ରୁତ ଭାବେ ରନ୍‌ ବାହାର କରିଥିଲେ। ଏଥିମଧ୍ୟରେ ଚଳିତ ଆଇପିଏଲ୍‌ର ସବୁଠୁ ଦ୍ରୁତତମ ୧୯ ବଲ୍‌ରୁ ରାହାଣେ ଅର୍ଦ୍ଧଶତକ ଅର୍ଜନ କରିବା ସହ ଦ୍ବିତୀୟ ୱିକେଟ୍‌ରେ ୮୧ ରନ୍‌ର ଦୃଢ ଭାଗୀଦାରି ଗଢ଼ିଥିଲେ। ତେବେ ପୀୟୂଷ ଚାୱଲାଙ୍କୁ ଲଙ୍ଗଅନ୍‌ ଉପରେ ଖେଳିବାକୁ ଯାଉଥିଲା ବେଳେ ରାହାଣେ ବାଉଣ୍ଡରି ପାଖରେ ଧରା ପଡ଼ିଯାଇଥିଲେ। ଗାଏକ୍ବାଡ କିନ୍ତୁ ଗୋଟିଏ ପଟରୁ ଧୈର୍ଯ୍ୟପୂର୍ଣ୍ଣ ବ୍ୟାଟିଂ କରିବା ସହ ଶେଷ ପର୍ଯ୍ୟନ୍ତ ଅପରାଜିତ ରହି ଦଳକୁ ଜିତାଇଥିଲେ।

ଇମ୍ପାକ୍ଟ ପ୍ଲେୟାର ତାଲିକାରେ ଶୁଭ୍ରାଂଶୁ
ଓଡ଼ିଆ ତାରକା ଶୁଭ୍ରାଂଶୁ ସେନାପତିଙ୍କୁ ସିଏସ୍‌କେ ଇମ୍ପାକ୍ଟ ପ୍ଲେୟାର ତାଲିକାରେ ପ୍ରଥମରୁ ସ୍ଥାନ ମିଳିଥିଲା। ଶୁଭ୍ରାଂଶୁଙ୍କ ସହିତ ଆକାଶ ସିଂହ, ରାଜବର୍ଦ୍ଧନ ହଙ୍ଗାର୍ଗେକର, ଶେଖ ରସିଦ, ଅମ୍ବାତି ରାୟୁଡୁ ଏହି ତାଲିକାରେ ରହିଥିଲେ। ପ୍ରଥମ ପାଳିରେ ଚେନ୍ନାଇ ବୋଲିଂ କରିଥିବାରୁ ଦ୍ବିତୀୟ ପାଳିରେ ଶୁଭ୍ରାଂଶୁ କିମ୍ବା ରାୟୁଡୁଙ୍କ ମଧ୍ୟରୁ ଜଣଙ୍କୁ ଏହି ସୁଯୋଗ ମିଳିବାର ଥିଲା। ମ୍ୟାଚ୍‌ର ପ୍ରଥମ ଓଭର ପରେ ଦୀପକ ଚହର ଆହତ ହେବାରୁ ତାଙ୍କ ବଦଳରେ ଶୁଭ୍ରାଂଶୁ ଶେଷ ପର୍ଯ୍ୟନ୍ତ ‌କ୍ଷେତ୍ରରକ୍ଷଣ କରିଥିଲେ। ରାୟୁଡୁଙ୍କୁ କିନ୍ତୁ ଇମ୍ପାକ୍ଟ ଖେଳାଳି ଭାବେ ସ‌ୁଯୋଗ ମିଳିବାରୁ ଶୁଭ୍ରାଂଶୁଙ୍କ ପାଇଁ ଆଇପିଏଲ୍‌ ପଦାର୍ପଣ ‘ଏତେ ପାଖ ଏତେ ଦୂର’ ରହିଛି।