ନୂଆଦିଲ୍ଲୀ: ଭାରତୀୟ କ୍ରିକେଟ ଟିମ୍‌ର ପୂର୍ବତନ ଖେଳାଳି ମହେନ୍ଦ୍ର ସିଂ ଧୋନିଙ୍କର ଦୁନିଆରେ ଲକ୍ଷ ଲକ୍ଷ ପ୍ରଶଂସକ ‌ରହିଛନ୍ତି। ଧୋନିଙ୍କର ଟିକେ ଝଲକ୍‌ ପାଇଁ ପ୍ରଶଂସକମାନେ ପାଗଳ ହୋଇଯାଆନ୍ତି।

Advertisment

ନିକଟ ଅତୀତରେ ତାଙ୍କର ଏକ ଭିଡିଓ ଭାଇରାଲ ହୋଇଛି। ଭିଡିଓରେ ଧୋନି ନିଜ ସିଟ୍‌ରେ ଶୋଇଥିବା ବେଳେ ବିମାନର ଜଣେ ଏୟାର ହଷ୍ଟେସ୍ ଗୁପ୍ତରେ ତାଙ୍କ ସହ ନିଜର ଭିଡିଓ ବନାଇଛନ୍ତି। ଏୟାର ହଷ୍ଟେସ୍ ଜଣକ ଏହି ଭିଡିଓକୁ ସୋସିଆଲ୍‌ ମିଡିଆରେ ପୋଷ୍ଟ୍‌ କରିବା ପରେ ସେ ଜଣେ ଯାତ୍ରୀଙ୍କ ଗୋପନୀୟତା ଉଲ୍ଲଂଘନ କରିଛନ୍ତି ବେ‌ାଲି ଅଭିଯୋଗ ଆଣି ଅନେକ ବ୍ୟବହାରକାରୀ ତାଙ୍କୁ ସମାଲୋଚନା କରିଛନ୍ତି।

୨୨ ସେକେଣ୍ଡର ଏହି ଭିଡିଓରେ ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନି ଶୋଇଛନ୍ତି। ତ‌ାଙ୍କୁ ଭିିଡିଓ ବିଷୟ‌ରେ କିଛି ବି ଜଣାନାହିଁ। ସେ ବିମାନର ୱିଣ୍ଡୋ ସିଟ୍‌ରେ ବସିଥିବା ବେଳେ ଏୟାର ହଷ୍ଟେସ ଜଣକ ଗୁପ୍ତରେ ଏକ ଭିଡିଓ କରିଛନ୍ତି। କ୍ୟାବିନ୍‌ କ୍ରୁଙ୍କ ୟୁନିଫର୍ମକୁ ଦେଖିଲେ ଲାଗୁଛି ଏହା 'ଇଣ୍ଡିଗୋ' ବିମାନର ହୋଇପାରେ ବୋଲି ଅନୁମାନ ଲଗାଯାଉଛି। ଏହି ଭିଡିଓ ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ସେୟାର କରାଯାଉଛି।

ଉଲ୍ଲେଖଯୋଗ୍ୟ, ଗତ ଜୁନ୍‌ ମାସରେ ଏମଏସ ଧୋନିଙ୍କୁ ନେଇ ଏକ ଭିଡିଓ ସୋସିଆଲ ମିଡିଆରେ ପୋଷ୍ଟ ହୋଇଥିଲା। ଯେଉଁଥିରେ ଦେଖିବାକୁ ମିଳିଥିଲା, ଧୋନି ତାଙ୍କ ସ୍ତ୍ରୀଙ୍କ ସହିତ ବସି ବିମାନରେ ଯାତ୍ରା କରୁଛନ୍ତି। ଏହି ସମୟରେ ଧୋନିଙ୍କର ଜଣେ ଫ୍ୟାନ ଆସି ପହଞ୍ଚି ଯାଉଛନ୍ତି। ଏହି ଫ୍ୟାନ ଜଣକ ଆଉ କେହି ନୁହନ୍ତି, ସେ ହେଉଛନ୍ତି ଧୋନି ଯେଉଁ ବିମାନରେ ଯାତ୍ରା କରୁଥିଲେ ତାହାର ଏୟାର ହଷ୍ଟେସ । ଏହି ଏୟାର ହଷ୍ଟେସ ଜଣକ ଚକଲେଟ ଭର୍ତ୍ତି ଥିବା ଏକ ଟ୍ରେ ଆଣି ଧୋନିଙ୍କ ଆଡକୁ ବଢ଼ାଇ ଦେଉଛନ୍ତି।

ଟ୍ରେରେ ଚକଲେଟ ଦେଖି ଧୋନି ଖୁସି ହୋଇଯାଉଛନ୍ତି। ସେହି ଟ୍ରେରୁ ଧୋନି ଗୋଟିଏ ଚକଲେଟ ଉଠାଇବା ସହିତ  ଏୟାର ହଷ୍ଟେସଙ୍କୁ ଦେଖି ହସି ଦେଉଛନ୍ତି । ଏହି ସମୟରେ ଧୋନି ନିଜ ଟ୍ୟାବରେ କ୍ୟାଣ୍ଡି କ୍ରସ ଖେଳୁଥିବା ବି ଦେଖିବାକୁ ମିଳୁଛି ।