ୱିମ୍ବଲଡନ୍ ଟେନିସ ପ୍ରତିଯୋଗିତା: ସେରେନା, କୋଣ୍ଟାଭିଟ୍, ମୁଗୁରୁଜା ବିଦା
ତୃତୀୟ ରାଉଣ୍ଡରେ ଜୋକୋଭିକ
ଲଣ୍ଡନ: ୭ ଥରର ବିଜୟିନୀ ସେରେନା ୱିଲିୟମ୍ସ, ଦ୍ବିତୀୟ ମାନ୍ୟତାପ୍ରାପ୍ତ ଆନେଟ କୋଣ୍ଟାଭିଟ୍, ୨ ଗ୍ରାଣ୍ଡ ସ୍ଲାମ ବିଜୟିନୀ ଗାର୍ବିନେ ମୁଗୁରୁଜା ଏବଂ ୟୁଏସ୍ ଓପନ୍ ବିଜୟିନୀ ଇମା ରାଡ଼ୁକାନୁ ଚଳିତ ୱିମ୍ବଲଡନ୍ ଟେନିସ ପ୍ରତିଯୋଗିତାରୁ ବିଦାୟ ନେଇଛନ୍ତି। ମଙ୍ଗଳବାର ମଧ୍ୟରାତ୍ରରେ ସେଣ୍ଟର କୋର୍ଟରେ ଖେଳାଯାଇଥିବା ପ୍ରଥମ ରାଉଣ୍ଡ ମୁକାବିଲାରେ ୪୦ ବର୍ଷୀୟା ଆମେରିକା ମହିଳା ସେରେନା ୫-୭, ୬-୧, ୬-୭ (୭) ସେଟ୍ରେ ପଦାର୍ପଣକାରୀ ହାର୍ମୋନି ଟାନଙ୍କଠୁ ହାରିଯାଇଥିଲେ। ଫଳରେ ୨୩ ଗ୍ରାଣ୍ଡ ସ୍ଲାମ୍ ବିଜୟିନୀ ସେରେନା ଲାଗାତାର ଦ୍ବିତୀୟ ଥର ଏହି ପ୍ରତିଯୋଗିତାର ପ୍ରଥମ ରାଉଣ୍ଡରୁ ବିଦାୟ ନେଇଥିଲେ। ବୁଧବାର ମହିଳା ଏକକ ଦ୍ବିତୀୟ ରାଉଣ୍ଡ ମୁକାବିଲାରେ ଇସ୍ତୋନିଆର ୨୬ ବର୍ଷୀୟା କୋଣ୍ଟାଭିଟ୍ ୪-୬, ୦-୬ ସେଟ୍ରେ ଜର୍ମାନୀର ଜୁଲି ନିମେଇରଙ୍କଠୁ, ୨୦୧୭ର ବିଜୟିନୀ ସ୍ପେନ୍ର ମୁଗୁୁରୁଜା ୪-୬, ୪-୬ ସେଟ୍ରେ ବେଲ୍ଜିୟମର ଗ୍ରିଟ୍ ମିନେନ୍ଙ୍କଠୁ ଏବଂ ଇଂଲଣ୍ଡର ରାଡ଼ୁକାନୁ ୩-୬, ୩-୬ ସେଟ୍ରେ ଫ୍ରନ୍ସର କାରୋଲିନ୍ ଗାର୍ସିଆଙ୍କଠୁ ପରାସ୍ତ ହୋଇଥିଲେ। ତେବେ ଷଷ୍ଠ ମାନ୍ୟତାପ୍ରାପ୍ତ କାରୋଲିନା ପ୍ଲିସକୋଭା, ଅଷ୍ଟମ ମାନ୍ୟତାପ୍ରାପ୍ତ ଜେସିକା ପେଗୁଲା ଓ ଦ୍ବାଦଶ ମାନ୍ୟତାପ୍ରାପ୍ତ ଜେଲିନା ଓସ୍ତାପେଙ୍କୋ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ଚେକ୍ ଗଣରାଜ୍ୟର ପ୍ଲିସକୋଭା ୭-୬, ୭-୫ ସେଟ୍ରେ ତେରେଜା ମାର୍ଟିନୋକୋଭାଙ୍କୁ, ଅମେରିକାର ପେଗୁଲା ୬-୩, ୭-୬ ସେଟ୍ରେ କ୍ରୋଏସିଆର ଡୋନା ଭେକିକ୍ଙ୍କୁ ଏବଂ ଲାଟିଭିଆର ଓସ୍ତାପେଙ୍କୋ ୬-୨, ୬-୨ ସେଟ୍ରେ ବେଲ୍ଜିୟମର ୟେନିନା ୱିମେୟରଙ୍କୁ ହରାଇଥିଲେ।
Sambad is now on WhatsApp
Join and get latest news updates delivered to you via WhatsApp
ତୃତୀୟ ରାଉଣ୍ଡରେ ଜୋକୋଭିକ
ବିଶ୍ବର ଏକ ନମ୍ବର ନୋଭାକ ଜୋକୋଭିକଙ୍କ ସହ କାମେରନ ନୋରି ଓ ବେଲ୍ଜିୟମର ଡେଭିଡ ଗଫିନ ପୁରୁଷ ଏକକ ବର୍ଗରେ ଦ୍ବିତୀୟ ରାଉଣ୍ଡ ବାଧା ଅତିକ୍ରମ କରିଛନ୍ତି। ବୁଧବାର ସର୍ବିଆ ତାରକା ଜୋକୋଭିକ ସିଧାସଳଖ ୬-୧, ୬-୪, ୬-୨ ସେଟ୍ରେ ଅଷ୍ଟ୍ରେଲିଆର ଥାନାସି କୋକିନାକିସଙ୍କୁ, ନବମ ମାନ୍ୟତାପ୍ରାପ୍ତ ନୋରି ୬-୩, ୩-୬, ୫-୭, ୬-୦, ୬-୨ ସେଟ୍ରେ ସ୍ପେନ୍ର ଜୌମେ ମୁନାରଙ୍କୁ ଏବଂ ଗଫିନ ୬-୧, ୬-୨, ୬-୪ ସେଟ୍ରେ ୩୧ ମାନ୍ୟତାପ୍ରାପ୍ତ ସେବାସ୍ତିଆନ୍ ବାଇଜ୍ଙ୍କୁ ହରାଇଥିଲେ। ତେବେ ତୃତୀୟ ମାନ୍ୟତାପ୍ରାପ୍ତ କାସ୍ପର ରୁଡ୍ଙ୍କ ଅଭିଯାନ ଦ୍ବିତୀୟ ରାଉଣ୍ଡରେ ଶେଷ ହୋଇଛି। ସେ ୬-୩, ୨-୬, ୫-୭, ୪-୬ରେ ଫ୍ରାନ୍ସର ୟୁଗୋ ହମ୍ବର୍ଟଙ୍କଠୁ ହାରି ବିଦାୟ ନେଇଥିଲେ।