୧୦୦ତମ ମ୍ୟାଚ୍‌ରେ ବିଜୟ ସହ ପ୍ରିକ୍ବାର୍ଟରରେ ଜୋକୋଭିକ୍‌

ମେଲବର୍ଣ୍ଣ: ଅଷ୍ଟ୍ରେଲିଆନ୍ ଓପନ୍‌ରେ ୧୦୦ତମ ମ୍ୟାଚ୍‌ ‌ଖେଳିବା ସହ ସର୍ବିଆ ତାରକା ନୋଭାକ୍‌ ଜୋକୋଭିକ୍‌ ଶୁକ୍ରବାର ତୃତୀୟ ରାଉଣ୍ଡ ଅତିକ୍ରମ କରି ୨୫ତମ ଗ୍ରାଣ୍ଡସ୍ଲାମ୍‌ ଦିଗରେ ଅଗ୍ରସର ହୋଇଛନ୍ତି। ତୃତୀୟ ରାଉଣ୍ଡରେ ଜୋକୋଭିକ୍‌ ୬-୩, ୬-୩, ୭-୬ରେ ଆର୍ଜେଣ୍ଟିନାର ‌ତୋମାସ ଇଚେଭେରିଙ୍କୁ ହରାଇ ପ୍ରିକ୍ବାର୍ଟର ଫାଇନାଲ୍‌ରେ ପ୍ରବେଶ କରିଛନ୍ତି। ସେହିପରି ୫ନମ୍ବର ମାନ୍ୟତାପ୍ରାପ୍ତ ଆନ୍ଦ୍ରେ ରୁବଲେଭ ୬-୨, ୭-୬, ୬-୪ରେ ସେବାଷ୍ଟିଆନ୍‌ କୋର୍ଡାଙ୍କୁ, ଷ୍ଟିଫାନସ୍‌ ସିସିପାସ୍‌ ୬-୩, ୬-୦, ୬-୪ରେ ଲୁକା ଭାନ୍‌ ଆସ୍‌ଚିଙ୍କୁ, ଜାନିକ୍‌ ସିନ୍ନର ୬-୦, ୬-୧, ୬-୩ରେ ସେବାଷ୍ଟିଆନ୍‌ ବାଇଜ୍‌ଙ୍କୁ ପରାସ୍ତ କରି ପ୍ରିକ୍ବାର୍ଟରଫାଇନାଲ୍‌ରେ ପହଞ୍ଚିଛନ୍ତି। ମହିଳା ଏକକରେ ଆରିନା ସାବାଲେଙ୍କା, ବାର୍ବରା କ୍ରେଜିକୋଭା, କୋକୋ ଗଫ୍‌ ପ୍ରିକ୍ବାର୍ଟରଫାଇନାଲ୍‌କୁ ଉନ୍ନୀତ ହୋଇଛନ୍ତି। ତୃତୀୟ ରାଉଣ୍ଡରେ ସାବାଲେଙ୍କା ୬-୦, ୬-୦ରେ ଲେସିଆ ସୁରେଙ୍କୋଙ୍କୁ, କ୍ରେଜିକୋଭା ୪-୬, ୭-୫, ୬-୩ରେ ଷ୍ଟର୍ମ ହଣ୍ଟରଙ୍କୁ, ଗଫ୍‌ ୬-୦, ୬-୨ରେ ଆଲିସିଆ ପାର୍କ୍ସଙ୍କୁ ହରାଇଥିଲେ।

ତୃତୀୟ ରାଉଣ୍ଡରେ ‌ବୋପାନ୍ନା-ଏବଦେନ୍‌
ଭାରତୀୟ ଖେଳାଳି ରୋହନ ବୋପାନ୍ନା ଓ ତାଙ୍କ ଆମେରିକୀୟ ସାଥୀ ମାଥ୍ୟୁ ଏବଦେନ ଅଷ୍ଟ୍ରେଲିଆନ୍ ଓପନ୍‌ ପୁରୁଷ ଯୁଗଳର ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ଶୁକ୍ରବାର ଦ୍ବିତୀୟ ରାଉଣ୍ଡରେ ଏହି ଯୋଡ଼ି ୬-୨, ୬-୪ରେ ଆମେରିକୀୟ ଯୋଡ଼ି ଜନ୍‌ ମିଲମ୍ୟାନ୍‌ ଓ ଏଡୱାର୍ଡ ୱିଣ୍ଟରଙ୍କୁ ପରାସ୍ତ କରିଥିଲେ। ସେହିପରି ଅନ୍ୟତମ ଭାରତୀୟ ଏନ୍‌ ଶ୍ରୀରାମ ବାଲାଜୀ ଓ ତାଙ୍କ ରୋମାନିଆ ସାଥୀ ଭିକ୍ଟର କର୍ଣ୍ଣିଆ ପ୍ରଥମ ରାଉଣ୍ଡରେ ଇଟାଲିର ମାତେଓ ଆର୍ଲାଡି ଓ ଆନ୍ଦ୍ରିଆ ପେଲେଗ୍ରିନୋଙ୍କୁ ୬-୩, ୬-୪ରେ ହରାଇ ଦ୍ବିତୀୟ ରାଉଣ୍ଡରେ ପହଞ୍ଚିଛନ୍ତି।