ଭୁବନେଶ୍ବର: କଟକ ଓ ଭୁବନେଶ୍ବରରେ ମିଳିତ ଭାବେ ଚାଲିଥିବା‌ ପୂର୍ବାଞ୍ଚଳ ଅନ୍ତଃବିଶ୍ବବିଦ୍ୟାଳୟ କ୍ରିକେଟ୍‌ (ପୁରୁଷ) ପ୍ରତିଯୋଗିତାରେ କିଟ୍‌ ବିଶ୍ବବିଦ୍ୟାଳୟ ହ୍ୟାଟ୍ରିକ୍‌ ବିଜୟ ହାସଲ କରିଛି। ମଙ୍ଗଳବାର କିଟ୍‌ କ୍ରିକେଟ୍‌ ଷ୍ଟାଡିୟମ୍‌ରେ ଏହି ଦଳ ଅୱଧେଶ ପ୍ରତାପ ବିଶ୍ବବିଦ୍ୟାଳୟ (ରେୱା)କୁ ୩ ରନ୍‌ରେ ପରାସ୍ତ କରି କମାଗତ ତୃତୀୟ ବିଜୟ ହାସଲ କରିଥିଲା। କିଟ୍‌ ୨୫ ଓଭରରେ ୧୫୫/୭ କରିବା ପ‌ର ରେୱା ପାଳିକୁ ୨୪.୫ ଓଭରରେ ୧୫୨ ରନ୍‌ରେ ସଫା କରିଦେଇଥିଲା। ଏହି ଷ୍ଟାଡିୟମ୍‌ରେ ଖେଳାଯାଇଥିବା ଅନ୍ୟ ଏକ ମ୍ୟାଚ୍‌ରେ ଉତ୍ତର ପ୍ରଦେଶର ବୀର ବାହାଦୁର ସିଂହ ପୂର୍ବାଞ୍ଚଳ ବିଶ୍ବବିଦ୍ୟାଳୟ ୧୧୫ ରନ୍‌ରେ ପଣ୍ଡିତ ରବିଶଙ୍କର ଶୁକ୍ଳା ବିଶ୍ବବିଦ୍ୟାଳୟ (ରାୟପୁର)କୁ ପରାସ୍ତ କରିଥିଲା। କଟକର ରେଭେନ୍ସା ଗ୍ରାଉଣ୍ଡରେ ଖେଳାଯାଇଥିବା ଦୁଇଟି ମ୍ୟାଚ୍‌ରେ ବର୍ଦ୍ଧମାନ ବିଶ୍ବବିଦ୍ୟାଳୟ ୩୩ ରନ୍‌ରେ ରେଭେନ୍ସା ବିଶ୍ବବିଦ୍ୟାଳୟକୁ ଏବଂ ବନାରସ ହିନ୍ଦୁ ବିଶ୍ବବିଦ୍ୟାଳୟ (ବାରଣାସୀ) ୩୦ ରନ୍‌ରେ ମହାତ୍ମା ଗାନ୍ଧୀ କାଶୀ ବିଦ୍ୟାପୀଠ (ବାରଣାସୀ)କୁ ପରାସ୍ତ କରିଥିଲା।