ଦ୍ବିତୀୟ ବିଜୟ ସହ ଇଂଲଣ୍ଡ ସେମିଫାଇନାଲ୍ ନିକଟତର, ୮ ୱିକେଟ୍ରେ ହାରିଲା ବାଂଲାଦେଶ
ଆବୁଧାବି: ଚଳିତ ଟି-୨୦ ବିଶ୍ବକପ୍ରେ ଇଂଲଣ୍ଡ ଦ୍ବିତୀୟ ବିଜୟ ହାସଲ କରିଛି। ସୁପର-୧୨ ପର୍ଯ୍ୟାୟର ଗ୍ରୁପ୍-୧ରେ ସ୍ଥାନ ପାଇଥିବା ଏହି ଦଳ ନିଜର ପ୍ରଥମ ମ୍ୟାଚ୍ରେ ୱେଷ୍ଟଇଣ୍ଡିଜ୍କୁ ୬ ୱିକେଟ୍ରେ ପରାସ୍ତ କରିଥିଲା। ଏହାପରେ ବୁଧବାର ଦ୍ବିତୀୟ ମ୍ୟାଚ୍ରେ ଉଭୟ ବ୍ୟାଟ୍ ଓ ବଲ୍ରେ ଚମତ୍କାର ପ୍ରଦର୍ଶନ କରି ୮ ୱିକେଟ୍ରେ ବାଂଲାଦେଶକୁ ପରାସ୍ତ କରିଦେଇଛି। ଲଗାତାର ଦୁଇଟି ବିଜୟ ସହ ଇଂଲଣ୍ଡ ମଧ୍ୟ ସେମିଫାଇନାଲ୍ ନିକଟତର ହୋଇଛି। ଗ୍ରୁପ୍ରେ ୫ ମ୍ୟାଚ୍ ଖେଳିବାକୁ ଥିଲା ବେଳେ ଆଉ ଗୋଟିଏ ମ୍ୟାଚ୍ ଜିତିନେଲେ ଇଂଲଣ୍ଡର ସେମିଫାଇନାଲ୍ ସ୍ଥାନ ପକ୍କା ହୋଇଯିବ।
Sambad is now on WhatsApp
Join and get latest news updates delivered to you via WhatsApp
ବୁଧବାର ଟସ୍ ଜିତି ପ୍ରଥମେ ବ୍ୟାଟିଂ ନେଇଥିବା ବାଂଲାଦେଶ ୧୨୪/୯ କରିଥିଲା। ମୁସଫିକର ରହିମ (୨୯ ରନ୍) ଦଳର ସର୍ବୋଚ୍ଚ ସ୍କୋରର୍ ଥିଲେ। ଇଂଲଣ୍ଡର ତାଇେମଲ ମିଲ୍ସ ୩ ୱିକେଟ୍ ନେଇଥିଲେ। ଜବାବରେ ଇଂଲଣ୍ଡ ୧୪.୧ ଓଭରରେ ୨ ୱିକେଟ୍ ହରାଇ ମ୍ୟାଚ୍ ଜିତି ନେଇଥିଲା। ଜାସନ ରୟ (୬୧) ଓ ଜୋସ ବଟଲର (୧୮) ଆଉଟ୍ ହୋଇଥିଲା ବେଳେ ଦାୱିଦ ମଲାନ (୨୮*) ଓ ଜନି ବେୟାରଷ୍ଟୋ (୮*) ଅପରାଜିତ ରହି ଦଳକୁ ବିଜୟ ପ୍ରଦାନ କରିଥିଲେ। ଏଥିସହ ଇଂଲଣ୍ଡ ୨ରୁ ୨ ମ୍ୟାଚ୍ ଜିତି ୪ ପଏଣ୍ଟ ସହ ଟେବୁଲର ଶୀର୍ଷ ସ୍ଥାନ ଦଖଲ କରିଥିଲା ବେଳେ ବାଂଲାଦେଶ ୨ରୁ ୨ ହାରି ପଞ୍ଚମରେ ରହିଛି। ବିସ୍ଫୋରକ ଅର୍ଦ୍ଧଶତକୀୟ ପାଳି ପାଇଁ ଜାସନ ରୟ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।