ଆଫ୍ଗାନିସ୍ତାନକୁ ୫ ୱିକେଟ୍ରେ ହରାଇଲା ଇଂଲଣ୍ଡ
ପର୍ଥ: ଚଳିତ ଟ୍ବେଣ୍ଟି-୨୦ ବିଶ୍ବକପ୍ ସୁପର-୧୨ ପର୍ଯ୍ୟାୟର ଉଦ୍ଘାଟନୀ ଦିବସରେ ଇଂଲଣ୍ଡ ଓ ଆଫ୍ଗାନିସ୍ତାନ ମଧ୍ୟରେ ଦ୍ବିତୀୟ ମ୍ୟାଚ୍ ଖେଳାଯାଇଥିଲା। ଏଥିରେ ୫ ୱିକେଟ୍ର ବିଜୟ ସହ ଇଂଲଣ୍ଡ ଅଭିଯାନ ଆରମ୍ଭ କରିଛି। ପ୍ରଥମେ ଆଫ୍ଗାନିସ୍ତାନ ପାଳିକୁ ୧୧୨ ରନ୍ରେ ସଫା କରିଦେବା ପରେ ଇଂଲଣ୍ଡ ୧୧ ବଲ୍ ପୂର୍ବରୁ ୧୧୩/୫ କରିନେଇଥିଲା। ଚଳିତ ବିଶ୍ବକପ୍ରେ ପ୍ରଥମ ୫ ୱିକେଟ୍ ସଫଳତା ପାଇଥିବା ସାମ୍ କରନ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ଟସ୍ ଜିତି ପ୍ରଥମେ ବୋଲିଂ କରିଥିବା ଇଂଲଣ୍ଡ ନିୟମିତ ଅନ୍ତରାଳରେ ୱିକେଟ୍ ଦଖଲ କରିଥିଲା। ବିଶେଷକରି ନିଜର ଶେଷ ୨ ଓଭରରେ ୨ଟି ଲେଖାଏଁ ୱକେଟ୍ ଅକ୍ତିଆର କରି କରନ ଆଫ୍ଗାନିସ୍ତାନ ପାଳିକୁ ୧୯.୪ ଓଭରରେ ଶେଷ କରିଦେଇଥିଲେ। ସେ ୩.୪-୦-୧୦-୫ର ଘାତକ ବୋଲିଂ ଚିତ୍ର ପାଇଥିଲେ। ଫଳରେ ଏକ ସମୟରେ ୧୦୯ ରନ୍ରେ ୫ ୱିକେଟ୍ ହରାଇଥିବା ଆଫ୍ଗାନିସ୍ତାନ ଆଉ ମାତ୍ର ୩ ରନ୍ ଯୋଡ଼ି ଅବଶିଷ୍ଟ ୫ ୱିକେଟ୍ ହରାଇଥିଲା। କରନଙ୍କ ବ୍ୟତୀତ ମାର୍କ ଉଡ୍ ଓ ବେନ୍ ଷ୍ଟୋକ୍ସ ୨-୨ ଏବଂ କ୍ରିସ୍ ୱକ୍ସ ଗୋଟିଏ ୱିକେଟ୍ ପାଇଥିଲେ। ଆଫ୍ଗାନିସ୍ତାନ ପକ୍ଷରୁ ଇବ୍ରାହିମ ଜଦ୍ରାନ (୩୨), ଉସ୍ମାନ ଘନି (୩୦), ନାଜିବୁଲା ଜଦ୍ରାନ (୧୩) ଓ ରହମନୁଲ୍ଲା ଗୁର୍ବାଜ (୧୦) ହିଁ ଦୁଇ ଅଙ୍କ ଛୁଇଁଥିଲେ।
ଜବାବରେ ଲିଆମ ଲିଭିଙ୍ଗ୍ଷ୍ଟୋନ (୨୯*), ଆଲେକ୍ସ ହେଲ୍ସ (୧୯), ଜୋସ୍ ବଟଲର (୧୮), ଦାୱଦ୍ ମଲାନ (୧୮) ଓ ମୋଇନ ଅଲ୍ଲୀ (୮*)ଙ୍କ ବଳରେ ଇଂଲଣ୍ଡ ୧୮.୧ ଓଭରରେ ୫ ୱିକେଟ୍ ବିନିମୟରେ ୧୧୩ ରନ୍ର ବିଜୟ ଲକ୍ଷ୍ୟରେ ପହଞ୍ଚି ଯାଇଥିଲା। ଆଫ୍ଗାନ ବୋଲରମାନେ ୯୭ ରନ୍ ମଧ୍ୟରେ ୫ ୱିକେଟ୍ ଝଡ଼ାଇ ଦେଇଥିଲେ ମଧ୍ୟ ଦଳ ପରାଜୟ ଏଡାଇବା ପାଇଁ ଯଥେଷ୍ଟ ହୋଇନଥିଲା।
ସଂକ୍ଷିପ୍ତ ସ୍କୋର୍: ଆଫ୍ଗାନିସ୍ତାନ ୧୯.୪ ଓଭରରେ ୧୧୨ (ଇମ୍ରାହିମ ଜଦ୍ରାନ-୩୨, ଉସ୍ମାନ ଘନି-୩୦, ସାମ୍ କରନ-୫/୧୦, ବେନ୍ ଷ୍ଟୋକ୍ସ-୨/୧୯, ମାର୍କ ଉଡ୍-୨/୨୩)। ଇଂଲଣ୍ଡ ୧୮.୧ ଓଭରରେ ୧୧୩/୫ (ଲିଆମ ଲିଭିଙ୍ଗ୍ଷ୍ଟୋନ-୨୯*, ରସିଦ୍ ଖାନ୍-୧/୧୭, ମହମ୍ମଦ ନବୀ-୧/୧୬, ଫଜଲ ଫାରୁକୀ-୧/୨୪, ମୁଜୀବୁର ରହମାନ-୧/୨୨, ଫରିଦ ଅହମ୍ମଦ ମଲିକ-୧/୨୩।)
କରନଙ୍କ କୀର୍ତ୍ତିମାନ
ଇଂଲଣ୍ଡ ଅଲ୍ରାଉଣ୍ଡର ସାମ୍ କରନ ଆଫ୍ଗାନିସ୍ତାନ ବିପକ୍ଷ ମ୍ୟାଚ୍ରେ ୫ ୱିକେଟ୍ ଦଖଲ କରିବା ଅବସରରେ ଏକ କୀର୍ତ୍ତିମାନ ପ୍ରତିଷ୍ଠା କରିଛନ୍ତି। ସେ ୩.୪ ଓଭରରେ ମାତ୍ର ୧୦ ରନ୍ ବ୍ୟୟ କରିଥିଲା ବେଳେ ଜଣେ ଇଂଲଣ୍ଡ ବୋଲର ଭାବେ ଟ୍ବେଣ୍ଟି-୨୦ ଆନ୍ତର୍ଜାତିକରେ ଶ୍ରେଷ୍ଠ ବୋଲିଂ ଚିତ୍ର ପାଇଥିଲେ। ତାଙ୍କ ପୂର୍ବରୁ ଏହି କୀର୍ତ୍ତିମାନ ସ୍ପିନର ଆଦିଲ ରସିଦ୍ଙ୍କ ନାମରେ ଥିଲା। ରସିଦ୍ ୨୦୨୧ରେ ଦୁବାଇରେ ଖେଳାଯାଇଥିବା ୱେଷ୍ଟ୍ଇଣ୍ଡିଜ୍ ବିପକ୍ଷ ମ୍ୟାଚ୍ରେ ୨.୨ ଓଭରରେ ମାତ୍ର ୨ ରନ୍ ବ୍ୟୟ କରି ୪ ୱିକେଟ୍ ଅକ୍ତିଆର କରିଥିଲେ। ଏହି ଦୁଇଜଣଙ୍କ ପଛକୁ ଦ୍ରୁତ ବୋଲର କ୍ରିସ୍ ଜୋର୍ଡାନ (୪/୬) ଏବଂ ଡେଭିଡ୍ ୱିଲି (୪/୭) ରହିଛନ୍ତି।