ଏଫଆଇଏଚ୍ ୫ଏସ୍ ହକି: ଭାରତ ବିଜେତା
ଲୌସାନେ: ଭାରତୀୟ ପୁରୁଷ ହକି ଦଳ ପ୍ରଥମ ଥର ଲାଗି ଆୟୋଜିତ ଏଫ୍ଆଇଏଚ୍ ୫ ଏସ୍ ହକି ପ୍ରତିଯୋଗିତାରେ ବିଜେତା ହେବାର ଗୌରବ ଅର୍ଜନ କରିଛି। ସ୍ବିଜରଲାଣ୍ଡର ଲୌସାନରେ ଆୟୋଜିତ ଏହି ଦୁଇଦିନିଆ ପ୍ରତିଯୋଗିତାର ଫାଇନାଲ୍ରେ ଭାରତ ୬-୪ ଗୋଲ୍ରେ ପୋଲାଣ୍ଡକୁ ହରାଇ ଟ୍ରଫି କରାୟତ୍ତ କରିଛି। ଭାରତ ପକ୍ଷରୁ ବବି ସିଂହ ଧାମି (୧୦, ୧୮ ମିନିଟ୍) ଓ ମହମ୍ମଦ ରାହିଲ (୧୨, ୧୬ ମିନିଟ୍) ଦୁଇଟି ଲେଖାଏଁ ଏବଂ ସଞ୍ଜୟ (୭ ମିନିଟ୍) ଓ ଗୁରିନ୍ଦର ସିଂହ (୮ ମିନିଟ୍) ଗୋଟିଏ ଲେଖାଏଁ ଗୋଲ୍ ଦେଇଥିଲେ। ପୋଲାଣ୍ଡର ମାତ୍ୟୁସ ନୋୱାକୋସ୍କି (୧ ମିନିଟ୍), ପାୱଲକ ରୋବର୍ଟ (୪ ମିନିଟ୍), ରୁତକୋସ୍କି ୱଜସିଚ (୪ ମିନିଟ୍) ଓ କୁରୋସ୍କି ଜାସେକ (୧୭ ମିନିଟ୍) ଗୋଟିଏ ଲେଖାଏଁ ଗୋଲ୍ ଦେଇଥିଲେ। ରାଉଣ୍ଡ ରବିନ୍ ଷ୍ଟେଜ୍ରେ ଭାରତ ପ୍ରଥମ ଦିନରେ ସ୍ବିଜରଲାଣ୍ଡକୁ ହରାଇଥିଲା ବେଳେ ପାକିସ୍ତାନ ସହ ଅମୀମାଂସିତ ରଖିଥିଲା। ଦ୍ବିତୀୟ ଦିନରେ ମାଲେସିଆକୁ ୭-୩ ଓ ପୋଲାଣ୍ଡକୁ ୬-୨ରେ ହରାଇ ଫାଇନାଲ୍ରେ ପହଞ୍ଚିଥିଲା।
Sambad is now on WhatsApp
Join and get latest news updates delivered to you via WhatsApp
ଅନ୍ୟ ପକ୍ଷରେ ଭାରତୀୟ ମହିଳା ହକି ଦଳ ଫାଇନାଲ୍ ଖେଳିବାରେ ବଞ୍ଚିତ ହୋଇଥିଲା। ପ୍ରତିଯୋଗିତାର ପ୍ରଥମ ଦୁଇ ମ୍ୟାଚ୍ ହାରିଥିବା ଭାରତ ରବିବାର ଆୟୋଜକ ସ୍ବିଜରଲାଣ୍ଡକୁ ୪-୩ରେ ହରାଇଥିଲା ବେଳେ ଦକ୍ଷିଣ ଆଫ୍ରିକା ସହ ୪-୪ ଅମୀମାଂସିତ ରଖିଥିଲା। ଫଳରେ ସ୍ବିଜରଲାଣ୍ଡ ବିପକ୍ଷରେ ମମ୍ତାଜ ଖାନ (୧୦, ୧୪, ୧୭ ମିନିଟ୍) ହ୍ୟାଟ୍ରିକ୍ ସହ ଋତିଜା ପିସାଲ (୩ ମିନିଟ୍)ଙ୍କ ଗୋଲ୍ ଦେଇଥିଲେ। ଦକ୍ଷିଣ ଆଫ୍ରିକା ବିପକ୍ଷ ଶେଷ ଲିଗ୍ ମ୍ୟାଚ୍ରେ ଭାରତର ମମତାଜ (୭, ୯ ମିନିଟ୍) ଦୁଇଟି, ଋତଜା (୮ ମିନିଟ୍) ଓ ଓଡ଼ିଆ ଝିଅ ମାରିଆନା କୁଜୁର (୧୨ ମିନିଟ୍) ଗୋଟିଏ ଲେଖାଏଁ ଗୋଲ୍ ଦେଇଥିଲେ।