ପ୍ରଥମ ଟି-୨୦: ଫର୍ଗୁସନ୍ଙ୍କୁ ୫ ୱିକେଟ୍, ୱେଷ୍ଟଇଣ୍ଡିଜ୍କୁ ୫ ୱିକେଟ୍ରେ ହରାଇଲା ନ୍ୟୁଜିଲାଣ୍ଡ
ଅକ୍ଲାଣ୍ଡ୍ : ନ୍ୟୁଜିଲାଣ୍ଡ ଗସ୍ତରେ ୱେଷ୍ଟଇଣ୍ଡିଜ୍ ଦଳ ପରାଜୟରୁ ଅଭିଯାନ ଆରମ୍ଭ କରିଛି। ଶୁକ୍ରବାର ଖେଳିଥିବା ବର୍ଷା ବାଧାପ୍ରାପ୍ତ ପ୍ରଥମ ଟି-୨୦ ମ୍ୟାଚ୍ରେ ଏହି ଭ୍ରମଣକାରୀ ଦଳ ୫ ୱିକେଟ୍ରେ ହାରିଯାଇଛି। ବିଶେଷକରି ଲୋକି ଫର୍ଗୁସନ୍ଙ୍କ ୫ ୱିକେଟ୍ ବଳରେ ନ୍ୟୁଜିଲାଣ୍ଡ ୧୫.୨ ଓଭରରେ ବିଜୟ ହାସଲ କରିଥିଲା। ଏଥି ସହିତ ଘରୋଇ ଦଳ ୩ ମ୍ୟାଚ୍ ବିଶିଷ୍ଟ ଶୃଙ୍ଖଳାରେ ୧-୦ରେ ଆଗୁଆ ରହିଛି। ୪-୦-୨୧-୫ ବୋଲିଂ ଚିତ୍ର ପାଇଥିବା ଫର୍ଗୁସନ୍ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ।
Sambad is now on WhatsApp
Join and get latest news updates delivered to you via WhatsApp
ଟସ୍ ଜିତି ନ୍ୟୁଜିଲାଣ୍ଡ୍ ପ୍ରଥମେ ବ୍ୟାଟିଂ ପାଇଁ ୱେଷ୍ଟଇଣ୍ଡିଜ୍କୁ ଆମନ୍ତ୍ରଣ କରିଥିଲା। ଆନ୍ଦ୍ରେ ଫ୍ଲେଚର (୩୪ ରନ୍, ୩ ଚୌକା, ୩ ଛକା) ଓ ବ୍ରେଣ୍ଡନ କିଙ୍ଗ୍ (୧୩) ବିସ୍ଫୋରକ ଆରମ୍ଭ କରିଥିଲେ। ଦୁହେଁ ୧୯ ବଲ୍ରୁ ୫୮ ରନ୍ ଆଦାୟ କରି ବଡ଼ ସ୍କୋର୍ ସମ୍ଭାବନା ସୃଷ୍ଟି କରିଥିଲେ। ହେଲେ ପରର୍ବତୀ ୯ ବଲ୍ ମଧ୍ୟରେ ୪ ଏବଂ ୧୧ ବଲ୍ ମଧ୍ୟରେ ୫ ୱିକେଟ୍ ହରାଇ ଘୋର ସଂକଟରେ ପଡ଼ିଯାଇଥିଲା। ଯାହା ଫଳରେ ବିନା ୱିକେଟ୍ରେ ୫୮ ରନ୍ କରିଥିବା ଇଣ୍ଡିଜ୍ ସେହି ସ୍କୋର୍ରେ ଚାରିଟି ୱିକେଟ୍ ହରାଇଥିଲା ବେଳେ ୫୯ ରନ୍ ବେଳକୁ ପଞ୍ଚମ ୱିକେଟ୍ ବି ହରାଇ ଦେଇଥିଲା। ଫର୍ଗୁସନ୍ ଓ ଅଭିଜ୍ଞ ଟିମ୍ ସାଉଦି ହିଁ ଇଣ୍ଡିଜ୍ ଦଳର ପତନ ଘଟିଥିବା ୭ଟିଯାକ ୱିକେଟ୍ ବାଣ୍ଟି ନେଇଥିଲେ। ଫର୍ଗୁସନ୍ ତାଙ୍କ ୪ ଓଭର କୋଟା ମଧ୍ୟରେ ପ୍ଲେଚର, ସିମ୍ରନ୍ ହେଟ୍ମେର୍ (୦), ନିକୋଲାସ ପୂରଣ (୧), ଫାବିଏନ୍ ଆଲେନ୍ (୩୦ ରନ୍, ୪ ଚୌକା, ୧ ଛକା) ଓ କିମୋ ପଲ୍ (୦)ଙ୍କୁ ଶିକାର କରି ପ୍ରଥମ ମ୍ୟାଚ୍ରୁ ହିଁ ୫ ୱିକେଟ୍ ସଫଳତା ହାତେଇଥିଲେ। ଅନ୍ୟପକ୍ଷରେ ସାଉଦି ୩ ଓଭର ବୋଲିଂ କରି ୨୧ ରନ୍ ବ୍ୟୟ କରିଥିଲା ବେଳେ କିଙ୍ଗ୍ ଓ ରୋଭ୍ମାନ୍ ପାୱେଲ (୦)ଙ୍କ ୱିକେଟ୍ ଦଖଲ କରିଥିଲେ। ସପ୍ତମ ଓଭର ବେଳକୁ ବର୍ଷା ବାଧା ସୃଷ୍ଟି କରିବାରୁ ଇଣ୍ଡିଜ୍ ପାଳିକୁ ୧୬ ଓଭରରେ ସୀମିତ ରଖାଯାଇଥିଲା। ତେବେ ଅଧିନାୟକ କିରଣ ପୋଲାର୍ଡ (୭୫ ରନ୍, ୩୭ ବଲ୍, ୪ ଚୌକା, ୮ ଛକା)ଙ୍କ ବିସ୍ଫୋରକ ଅପରାଜିତ ପାଳି ବଳରେ ଦଳ ୧୮୦/୭ର ସମ୍ମାନଜନକ ସ୍କୋର୍ କରିଥିଲା। ପୋଲାର୍ଡ ଓ ଆଲେନ୍ ଷଷ୍ଠ ୱିକେଟ୍ରେ ୮୪ ରନ୍ ଯୋଡ଼ିଥିଲେ।
ଜବାବରେ ୧୬ ଓଭରରେ ନ୍ୟୁଜିଲାଣ୍ଡ୍ ନିକଟରେ ପରିବର୍ତିତ ଲକ୍ଷ୍ୟ ୧୭୬ ରଖାଯାଇଥିଲା। ଅନୁରୂପ ଭାବେ ଘରୋଇ ଦଳ ମଧ୍ୟ ୬୩ ରନ୍ ବେଳକୁ ୪ ୱିକେଟ୍ ହରାଇଥିଲା। ତେବେ ପଞ୍ଚମ ୱିକେଟ୍ରେ ଫିଲିପ କନ୍ୱେ (୪୧) ଓ ଜେମ୍ସ ନୀସାମ (୪୮*) ୭୭ ରନ୍ ଯୋଡ଼ିବା ପରେ ମିଚେଲ ସାଣ୍ଟନର୍ଙ୍କ ଅପରାଜିତ ୩୧ ରନ୍ ଯୋଗୁଁ ୧୫.୨ ଓଭରରେ ଦଳ ୧୭୯/୫ କରିନେଇଥିଲା। ଓସାନେ ଥୋମାାସ୍ (୨/୨୩) ଇଣ୍ଡିଜ୍ ଦଳ ପକ୍ଷରୁ ସଫଳ ବୋଲର ରହିଥିଲେ।