ସେଣ୍ଟ୍ ଲୁସିଆ: ମିଚେଲ ମାର୍ସଙ୍କ ଚମତ୍କାର ଅଲ୍ରାଉଣ୍ଡ ପ୍ରଦର୍ଶନ ବଳରେ ଭ୍ରମଣକାରୀ ଅଷ୍ଟ୍ରେଲିଆ ଦଳ ୱେଷ୍ଟଇଣ୍ଡିଜ୍ ବିପକ୍ଷ ଚତୁର୍ଥ ଟି-୨୦ ମ୍ୟାଚ୍ ଜିତିନେଇଛି। ଟସ୍ ଜିତି ପ୍ରଥମେ ବ୍ୟାଟିଂ ନେଇଥିବା ଅଷ୍ଟ୍ରେଲିଆ ପକ୍ଷରୁ ମାର୍ସ (୭୫ ରନ୍, ୪୪ ବଲ୍, ୪ ଚୌକା, ୬ ଛକା) ବିସ୍ଫୋରକ ଅର୍ଦ୍ଧଶତକ ଜମାଇବା ପରେ ୪-୦-୨୪-୩ର ବୋଲିଂ ଚିତ୍ର ପାଇଥିଲେ। ଫଳରେ ଭ୍ରମଣକାରୀ ଦଳ ୪ ରନ୍ରେ ଘରୋଇ ଇଣ୍ଡିଜ୍କୁ ପରାସ୍ତ କରିଦେଇଛି। ମାର୍ସଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ମିଳିଥିଲା। ଚଳିତ ଗସ୍ତରେ ହାଟ୍ରିକ୍ ପରାଜୟ ସହ ଟି-୨୦ ଶୃଙ୍ଖଳା ହାତଛଡ଼ା କରିସାରିଥିବା ଅଷ୍ଟ୍ରେଲିଆର ଏହା ପ୍ରଥମ ବିଜୟ ହୋଇଥିଲା ବେଳେ ଘରୋଇ ଦଳ ପ୍ରଥମ ପରାଜୟ ବରଣ କରିଛି।
Sambad is now on WhatsApp
Join and get latest news updates delivered to you via WhatsApp
ମାର୍ସଙ୍କ ୭୫ ସାଙ୍ଗକୁ ଅଧିନାୟକ ଆରୋନ୍ ଫିଞ୍ଚ୍ଙ୍କ ୫୫ (୩୭ ବଲ୍, ୫ ଚୌକା, ୩ ଛକା)ଙ୍କ ଅର୍ଦ୍ଧଶତକ ଓ ନିମ୍ନକ୍ରମରେ ଡାନିଏଲ୍ କ୍ରିଷ୍ଟିଆନ୍ଙ୍କ ୨୨ (୧୪ ବଲ୍, ୨ ଚୌକା, ୧ ଛକା) ରନ୍ ସହାୟତାରେ ଅଷ୍ଟ୍ରେଲିଆ ୧୮୯/୬ କରିଥିଲା। ଫିଞ୍ଚ୍ ଓ ମାର୍ସ ଦ୍ବିତୀୟ ୱିକେଟ୍ରେ ୧୧୪ ରନ୍ ଯୋଡ଼ିବା ଉଲ୍ଲେଖନୀୟ ଥିଲା। ୱେଷ୍ଟଇଣ୍ଡିଜ୍ ପକ୍ଷରୁ ୪-୦-୨୭-୩ ବୋଲିଂ ଚିତ୍ର ପାଇଥିବା ହେଡେନ୍ ୱାଲ୍ସ ସଫଳ ବୋଲର ରହିଥିଲେ।
ଜବାବରେ ଓପ୍ନର ଲେଣ୍ଡଲ ସିମନ୍ସ (୭୨ ରନ୍, ୪୮ ବଲ୍, ୧୦ ଚୌକା, ୨ ଛକା) ଓ ଇଭିନ୍ ଲିୱିସ୍ (୩୧ ରନ୍, ୧୪ ବଲ୍, ୪ ଚୌକା, ୨ ଛକା) ପ୍ରଥମ ୱିକେଟ୍ରେ ୪.୪ ଓଭରରେ ୬୨ ରନ୍ ଯୋଡ଼ି ୱେଷ୍ଟଇଣ୍ଡିଜ୍ ପାଇଁ ଦୃଢ଼ ମୂଳଦୁଆ ପକାଇଥିଲେ।
ହେଲେ ପ୍ରଥମେ ପୂର୍ବ ମ୍ୟାଚ୍ର ଶ୍ରେଷ୍ଠ ଖେଳାଳି କ୍ରିସ୍ ଗେଲ୍ (୧) ଏବଂ ପରେ ୱିକେଟ୍ରକ୍ଷକ ନିକୋଲାସ୍ ପୂରନ (୧୬) ଓ ସିମନ୍ସଙ୍କୁ ଗୋଟିଏ ଓଭରରେ ଲଗାତାର ବଲ୍ରେ ଆଉଟ୍ କରି ମାର୍ସ ଅଷ୍ଟ୍ରେଲିଆକୁ ପ୍ରତ୍ୟାବର୍ତନ କରାଇଥିଲେ। ଏହାପରେ ଲିୱିସ୍ ଓ ଆନ୍ଦ୍ରେ ଫ୍ଲେଚର (୬)ଙ୍କୁ ଆଦାମ ଜାମ୍ପା ପାଭିଲିୟନ୍ ପଠାଇ ଇଣ୍ଡିଜ୍ର ବିପର୍ଯ୍ୟୟ ଘଟାଇଥିଲେ। ତଥାପି ଆନ୍ଦ୍ରେ ରସେଲେ (୨୪*, ୧୩ ବଲ୍, ୩ ଛକା) ଓ ଫାବିଏନ୍ ଆଲେନ୍ (୨୯, ୧୪ ବଲ୍, ୨ ଚୌକା, ୩ ଛକା) ଖୁବ୍ ଲଢ଼ିଥିଲେ ମଧ୍ୟ ଘରୋଇ ଦଳ ବିଜୟଠୁ ୫ ରନ୍ ଦୂରରେ ଅଟକି ଯାଇଥିଲା। ଶେଷ ଓଭରରେ ବିଜୟ ପାଇଁ ୧୧ ରନ୍ ଦରକାର କରୁଥିଲା ବେଳେ ୱେଷ୍ଟଇଣ୍ଡିଜ୍ ୬ ରନ୍ କରିପାରିଥିଲା। ତେବେ ହାଟ୍ରିକ୍ ବିଜୟ ସହ ଆଗୁଆ ଶୃଙ୍ଖଳା ଜିତିସାରିଥିବା ଘରୋଇ ଦଳ ପଞ୍ଚମ ତଥା ଶେଷ ମ୍ୟାଚ୍ ପୂର୍ବରୁ ୩-୧ରେ ଆଗୁଆ ରହିଛି।