ସମାଲୋଚକଙ୍କୁ ମୁହଁତୋଡ ଜବାବ ଦେଲେ ଗିଲ
ନୂଆଦିଲ୍ଲୀ: ଟି -୨୦ ବିଶ୍ୱକପ ୨୦୨୪ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ମଧ୍ୟ ୧୫ ଜଣିଆ ଦଳ ସହିତ ଚାରିଜଣ ରିଜର୍ଭ ଖେଳାଳି ଘୋଷଣା କରିଥିଲା । ଏହି ରିଜର୍ଭ ଖେଳାଳିଙ୍କ ମଧ୍ୟରେ ଶୁଭମନ ଗିଲ, ରିଙ୍କୁ ସିଂ, ଖାଲିଲ ଅହମ୍ମଦ, ଆଭେଶ ଖାନ ରହିଥିଲେ। କିନ୍ତୁ ଗ୍ରୁପ୍ ପର୍ଯ୍ୟାୟ ମ୍ୟାଚ୍ ସମାପ୍ତ ହେବା ପରେ ଶୁଭମନ ଗିଲ ଏବଂ ଆଭେଶ ଦେଶକୁ ଫେରିବାର ଖବର ସାମ୍ନାକୁ ଆସିଥିଲା। ଏହା ସହ କୁହାଯାଇଥିଲା ଯେ ବିଶୃଙ୍ଖଳା ଆଚରଣ ଓ ରୋହିତ ଶର୍ମାଙ୍କ ସହ ସମସ୍ୟା ପାଇଁ ତାଙ୍କୁ ଟୁର୍ଣ୍ଣାମେଣ୍ଟରୁ ବାହାର କରିଦିଆଯାଇଛି | ଏନେଇ କିଛି ସମାଲୋଚକ ମଧ୍ୟ ଗିଲଙ୍କୁ ସମାଲୋଚନା କରିଥିଲେ | ଏହି ସମୟରେ, ଶୁଭମନ ଗିଲ ଏହି ଗୁଜବକୁ ନିଜ ପୋଷ୍ଟ ମାଧ୍ୟମରେ ଉପଯୁକ୍ତ ଉତ୍ତର ଦେଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ଶୁଭମନ ଗିଲ, ରୋହିତ ଶର୍ମା ଏବଂ ତାଙ୍କ ଝିଅ ସମାଇରାଙ୍କ ସହ ଏକ ଇନଷ୍ଟାଗ୍ରାମ ଷ୍ଟୋରି ସେୟାର କରି ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି। ଏହି ଛବିର କ୍ୟାପସନରେ ଗିଲ ଲେଖିଛନ୍ତି – ସେ ଏବଂ ସମାୟରା ରୋହିତ ଶର୍ମାଙ୍କଠାରୁ ଅନୁଶାସନର କଳା ଶିଖୁଛନ୍ତି | ଉଲ୍ଲେଖ ଥାଉ କି କିଛି ଦିନ ପୂର୍ବେ ଖବର ଆସିଥିଲା ଯେ ଅନୁଶାସନହୀନତା ପାଇଁ ତାଙ୍କୁ ଟୁର୍ଣ୍ଣାମେଣ୍ଟରୁ ବାହାର କରିଦିଆଯାଇଛି | ଏହା ମଧ୍ୟ କୁହାଯାଉଥିଲା ଯେ ଗିଲ ଇନଷ୍ଟାଗ୍ରାମରେ ରୋହିତ ଶର୍ମାଙ୍କୁ ଅନଫଲୋ କରିଦେଇଛନ୍ତି। କିନ୍ତୁ ଗିଲଙ୍କ ଇନଷ୍ଟାଗ୍ରାମ ପୋଷ୍ଟ ଏହି ସବୁ ଗୁଜବକୁ ଶେଷ କରିଦେଇଛି। କେତେକ ରିପୋର୍ଟ ଅନୁଯାୟୀ, ଗିଲ ସ୍ବଦେଶ ଫେରି ଆସିବା ପଛରେ କୌଣସି ଅନୁଶାସନହୀନତା କାରଣ ନାହିଁ | ବାସ୍ତବରେ, ରିଜର୍ଭ ଖେଳାଳିଙ୍କ ବିଷୟରେ ଏହା ପୂର୍ବରୁ ଯୋଜନା କରାଯାଇଥିଲା ଯେ ଗ୍ରୁପ୍ ପର୍ଯ୍ୟାୟ ପରେ ଗିଲ୍ ଏବଂ ଆଭେଶ ଘରକୁ ଫେରିବେ, ସେମାନଙ୍କ ସ୍ଥାନରେ ରିଙ୍କୁ ସିଂ ଏବଂ ଖାଲିଲ ଅହମ୍ମଦ ସୁପର ୮ ପାଇଁ ୱେଷ୍ଟଇଣ୍ଡିଜ୍ ଯିବେ।