ରାଉରକେଲା: ଶନିବାର ହକି ଇଣ୍ଡିଆ ଲିଗ୍‌ର ଦୁଇଟି ମ୍ୟାଚ୍‌ ଖେଳାଯାଇଥିଲା। ପ୍ରଥମରେ ଦିଲ୍ଲୀ ଏସ୍‌ଜି ପାଇପର୍ସକୁ ଏକତରଫାଭାବେ ୪-୧ ଗୋଲ୍‌ରେ ପରାସ୍ତକରି ଶ୍ରାଚୀ ରା’ବେଙ୍ଗଲ ଟାଇଗର୍ସ ବିଜୟଧାରା ଅବ୍ୟାହତ ରଖିଛି। ଦଳ ପକ୍ଷରୁ ଯୁଗରାଜ ସିଂହ ଦୁଇଟି (୧୭ ଓ ୩୮ ମିନିଟ୍) ଗୋଲ୍ ଦେଇଥିବାବେଳେ ସୁଖଜିତ ସିଂହ(୧ ମିନିଟ୍) ଓ ଅଭିଷେକ(୪୭ ମିନିଟ୍) ଗୋଟିଏ ଲେଖାଏଁ ଗୋଲ୍‌ ଦେଇଥିଲେ। ସେଥିରୁ ଦିଲ୍ଲୀ ଏସ୍‌ଜି ପାଇପର୍ସ ନିଜ ତାରକା ଖେଳାଳି ଗେରାଥ୍‌ ଫୋରଲଙ୍ଗ୍‌(୫୩ ମିନିଟ୍)ଙ୍କ ମାଧ୍ୟମରେ ମାତ୍ର ଗୋଟିଏ ଗୋଲ୍ ଶୁଝିବାକୁ ସକ୍ଷମ ହୋଇଥିଲା। ସେହିଭଳି ଦ୍ବିତୀୟ ମ୍ୟାଚ୍‌ରେ ଟିମ୍‌ ଗୋନାସିକା ୩-୧ ଗୋଲ୍‌ରେ ହାଇଦ୍ରାବାଦ ତୁଫାନ୍ସକୁ ପରାସ୍ତ କରି ପ୍ରଥମ ବିଜୟ ହାସଲ କରିଛି। ଦଳ ପକ୍ଷରୁ ସୁନୀଳ ଭିତଳାଚାର୍ଯ୍ୟ ସମର୍ପିତ(୨ ମିନିଟ୍), ଭିକ୍ଟର ଚାର୍ଲେଟ୍‌(୩୩ ମିନିଟ୍) ଓ ନୀଲମ ସଞ୍ଜୀପ ଖେସ୍‌(୬୦ ମିନିଟ୍) ଗୋଟିଏ ଲେଖାଏ ଗୋଲ୍‌ ଦେଇଥିଲେ। ତୁଫାନ୍ସ ପକ୍ଷରୁ ଏକମାତ୍ର ଗୋଲ୍‌ ଟିମ୍‌ ବ୍ରାଣ୍ଡ୍‌(୧୨) ଦେଇଥିଲେ।