ଉତ୍ତର ପ୍ରଦେଶର କାନପୁରରେ ଚାଲିଥିବା ହକି ଇଣ୍ଡିଆର ୫-ଏ ସାଇଡ୍ ହକି ସେମିରେ ଦୁଇ ଓଡ଼ିଶା ଦଳ
ଭୁବନେଶ୍ବର : ଓଡ଼ିଶା ପୁରୁଷ ଓ ମହିଳା ଦଳ ଉତ୍ତର ପ୍ରଦେଶର କାନପୁରରେ ଚାଲିଥିବା ହକି ଇଣ୍ଡିଆର ୫-ଏ ସାଇଡ୍ ବରିଷ୍ଠ ଜାତୀୟ ପ୍ରତିଯୋଗିତାର ଚତୁର୍ଥ ସଂସ୍କରଣରେ ସେମିଫାଇନାଲ୍ ସ୍ଥାନ ସୁରକ୍ଷିତ କରିନେଇଛନ୍ତି। ବୁଧବାର କ୍ବାର୍ଟର ଫାଇନାଲ୍ରେ ଓଡ଼ିଶା ପୁରୁଷ ଦଳ ୩-୨ ଗୋଲ୍ରେ ହରିଆନାକୁ ପରାସ୍ତ କରିଥିଲା ବେଳେ ମହିଳା ଦଳ ମହାରାଷ୍ଟ୍ରକୁ ୩-୨ ପେନାଲ୍ଟି ସୁଟ୍ଆଉଟ୍ରେ ପରାସ୍ତ କରିଥିଲା। ୨୭ ତାରିଖ ସେମିଫାଇନାଲ୍ରେ ପୁରୁଷ ଦଳର ମୁକାବିଲା କର୍ଣ୍ଣାଟକ ସହ ଏବଂ ମହିଳା ଦଳର ମୁକାବିଲା ହରିଆନା ସହ ହେବ।
Sambad is now on WhatsApp
Join and get latest news updates delivered to you via WhatsApp
ପୁରୁଷ କ୍ବାର୍ଟର ଫାଇନାଲ୍ ଉତ୍କଣ୍ଠାପୂର୍ଣ୍ଣ ରହିଥିଲା। ପ୍ରଥମାର୍ଧରେ ହିଁ ଉଭୟ ଦଳ ୨ ଲେଖାଏଁ ଗୋଲ୍ କରିଥିଲେ। ତେବେ ଦ୍ବିତୀୟାର୍ଧରେ ଓଡ଼ିଶା ଗୋଟିଏ ଗୋଲ୍ କରି ବିଜୟ ହାସଲ କରିଥିଲା। ଓଡ଼ିଶା ପକ୍ଷରୁ ମନୋଜ କିଣ୍ଡୋ (୭ ଓ ୧୬ ମିନିଟ୍) ଦୁଇଟି ଏବଂ ସିରିଲ୍ ଲୁଗୁନ (୨ ମିନିଟ୍) ଗୋଟିଏ ଗୋଲ୍ କରିଥିଲା ବେଳେ ହରିଆନା ପକ୍ଷରୁ ମନ୍ପ୍ରୀତ୍ (୪ ମିନିଟ୍) ଓ ଜଗୱନ୍ତ ସିଂହ (୮ ମିନିଟ୍) ଗୋଲ୍ ସ୍କୋରର୍ ରହିଥିଲେ।
ମହିଳା କ୍ବାର୍ଟର ଫାଇନାଲ୍ରେ ଓଡ଼ିଶା ଓ ମହାରାଷ୍ଟ୍ର ମୁକାବିଲା ଆରମ୍ଭରୁ ଶେଷ ପର୍ଯ୍ୟନ୍ତ ଉତ୍କଣ୍ଠାପୂର୍ଣ୍ଣ ରହିଥିଲା। ଯାହା ଫଳରେ ନିର୍ଧାରିତ ସମୟ ୧-୧ ଗୋଲ୍ରେ ଅମୀମାଂସିତ ରହିଥିଲା। ମ୍ୟାଚ୍ର ପଞ୍ଚମ ମିନିଟ୍ରେ ପ୍ରୀତି ଦୁବେଙ୍କ ଗୋଲ୍ ବଳରେ ମହାରାଷ୍ଟ୍ର ଅଗ୍ରଣୀ ପାଇଥିଲା। ହେଲେ ୧୪ ମିନିଟ୍ରେ ଓଡ଼ିଶା ପକ୍ଷରୁ ପ୍ରେମିତା ବାର୍ଲା ଗୋଲ୍ଟି ଶୁଝି ଦେବାରୁ ନିର୍ଧାରିତ ସମୟ ୧-୧ରେ ଶେଷ ହୋଇଥିଲା। ଫଳରେ ମ୍ୟାଚ୍ ସୁଟ୍ଆଉଟ୍କୁ ଟାଣି ହୋଇଯାଇଥିଲା। ସୁଟ୍ ଆଉଟ୍ ମଧ୍ୟ ରୋଚକପୂର୍ଣ୍ଣ ରହିଥିଲା। ୪ ଲେଖାଏଁ ସଟ୍ ଶେଷରେ ଉଭୟ ଦଳର ସ୍ଥିତି ୨-୨ ରହିଥିଲା। ମହାରାଷ୍ଟ୍ର ପକ୍ଷରୁ ପ୍ରୀତି ଦୁବେ ପଞ୍ଚମ ତଥା ଶେଷ ସଟ୍କୁ ଗୋଲ୍ କରିବାରେ ବିଫଳ ହୋଇଥିଲା ବେଳେ ଜାହ୍ନବୀ ପ୍ରଧାନଙ୍କ ଗୋଲ୍ ହିଁ ଓଡ଼ିଶାକୁ ବିଜୟ ଭେଟି ଦେଇଥିଲା। ଫଳରେ ଓଡ଼ିଶା ୩-୨ ସୁଟ୍ଆଉଟ୍ ଗୋଲ୍ରେ ବିଜୟୀ ହୋଇଥିଲା।