ପଡ଼ିଆରେ ରନ୍ ନକଲେ ସମାଲୋଚନା ହେବ; ରାହୁଲଙ୍କ ଖରାପ ଫର୍ମକୁ ନେଇ ସୌରଭ ଗାଙ୍ଗୁଲିଙ୍କ ପ୍ରତିକ୍ରିୟା

ନୂଆଦିଲ୍ଲୀ: ଭାରତୀୟ ବ୍ୟାଟ୍ସମ୍ୟାନ କେଏଲ ରାହୁଲଙ୍କ ଖରାପ ଫର୍ମ ଜାରି ରହିଛି । ଦିଲ୍ଲୀ ଟେଷ୍ଟରେ ବି ସେ ପୁଣି ଥରେ କମ ରନରେ ଆଉଟ୍ ହୋଇଥିଲେ । ଫଳରେ ଦଳରେ ତାଙ୍କର ସ୍ଥାନକୁ ନେଇ ପ୍ରଶ୍ନ ଉଠିବା ଆରମ୍ଭ ହୋଇଛି । ତାଙ୍କର ଖରାପ ଫର୍ମକୁ ନେଇ କ୍ରିକେଟ ପ୍ରେମୀଙ୍କ ସମେତ ଅନେକ ବରିଷ୍ଠ ଖେଳାଳି ତାଙ୍କୁ ସମାଲୋଚନା କରୁଥିବା ଦେଖାଯାଇଛି।

ଭାରତୀୟ କ୍ରିକେଟ ଟିମର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି କହିଛନ୍ତି ଯେ, "ଯେତେବେଳେ ଆପଣ ଭାରତରେ ଭଲ ରନ୍ ସ୍କୋର କରନ୍ତି ନାହିଁ, ତେବେ ଆପଣଙ୍କୁ ସମାଲୋଚନା କରାଯାଏ। କେଏଲ ରାହୁଲ ଏକା ନୁହଁନ୍ତି। ଅତୀତରେ ମଧ୍ୟ ଅନେକ ଖେଳାଳି ଏହି ପରିସ୍ଥିତିର ସମ୍ମୁଖୀନ ହୋଇଥିଲେ।"

ଭାରତ ପାଇଁ ୧୧୩ଟେଷ୍ଟ ଏବଂ ୩୧୧ଟି ଓଡିଆଇ ଖେଳିଥିବା ଗାଙ୍ଗୁଲି କହିଛନ୍ତି, “ଖେଳାଳିଙ୍କ ଉପରେ ବହୁତ ଚାପ ରହିଛି ଏବଂ ସେମାନଙ୍କ ଉପରେ ବହୁତ ଧ୍ୟାନ ଦିଆଯାଏ। ଦଳ ପରିଚାଳନା ଟିମ୍ ଭାବନ୍ତି ଯେ ସେ ଦଳ ପାଇଁ ଏକ ଗୁରୁତ୍ୱପୂର୍ଣ୍ଣ ଖେଳାଳି। ହେଲେ ଶେଷରେ କୋଚ୍ ଏବଂ ଅଧିନାୟକ ଯାହା ଭାବନ୍ତି ତାହା ଗୁରୁତ୍ୱପୂର୍ଣ୍ଣ। ଏହା ସ୍ପଷ୍ଟ ଯେ ରାହୁଲଙ୍କ ପରି ଜଣେ ଦକ୍ଷ ଖେଳାଳିଙ୍କଠାରୁ ଲୋକମାନେ ଅଧିକ ଆଶା କରନ୍ତି। ସେ ୯ବର୍ଷରେ ମାତ୍ର ୫ଟି ଟେଷ୍ଟ ଶତକ ହାସଲ କରିଛନ୍ତି। ସେ ଭଲ ପ୍ରଦର୍ଶନ କରିଛନ୍ତି ସତ, କିନ୍ତୁ ନିଶ୍ଚିତ ଭାବରେ କ୍ରିକେଟ ପ୍ରେମୀ ଭାରତ ପାଇଁ ଖେଳୁଥିବା ଜଣେ ଟପ୍-ଅର୍ଡର ବ୍ୟାଟ୍ସମ୍ୟାନଙ୍କଠାରୁ ଅଧିକ ଆଶା କରୁଛନ୍ତି। କାରଣ ଅନ୍ୟମାନଙ୍କ ଦ୍ୱାରା ସ୍ଥିର କରାଯାଇଥିବା ମାନଦଣ୍ଡ ବହୁତ ଅଧିକ।"