ଦକ୍ଷିଣ ଆଫ୍ରିକା-ଏ ପୁଣି ହାରିଲା, ଦ୍ବିତୀୟ ଦିନିକିଆ ଜିତିଲା ଭାରତ-ଏ
ତିରୁବନନ୍ତପୁରମ୍: ଭ୍ରମଣକାରୀ ଦକ୍ଷିଣ ଆଫ୍ରିକା-ଏ ଦଳ ଭାରତ ଗସ୍ତରେ ପରାଜୟ ଧାରା ଜାରି ରଖିଛି। ଭାରତ-ଏ ଦଳ ନିକଟରୁ ପ୍ରଥମ ଅଣଆନୁଷ୍ଠାନିକ ଦିନିକିଆ ମ୍ୟାଚ୍କୁ ୬୯ ରନ୍ରେ ହାରିଯାଇଥିବା ଦକ୍ଷିଣ ଆଫ୍ରିକା ଶନିବାର ଦ୍ବିତୀୟ ଦିନିକିଆକୁ ମଧ୍ୟ ହାରିଯାଇଛି। ଏହି ମ୍ୟାଚ୍ରେ ଭ୍ରମଣକାରୀ ଦଳକୁ ୬ ବଲ୍ ପୂର୍ବରୁ ୨ ୱିକେଟ୍ରେ ପରାସ୍ତ କରି ଘରୋଇ ଦଳ ୫ ମ୍ୟାଚ୍ ବିଶିଷ୍ଟ ଶୃଙ୍ଖଳାରେ ୨-୦ର ଅଗ୍ରଣୀ ପାଇଯାଇଛି।
Sambad is now on WhatsApp
Join and get latest news updates delivered to you via WhatsApp
୫୦ ଓଭର ବିଶିଷ୍ଟ ଏହି ମ୍ୟାଚ୍ ବର୍ଷା ଯୋଗୁଁ ୨୧ ଓଭରକୁ କମାଇ ଦିଆଯାଇଥିଲା। ଏଥିରେ ଟସ୍ ଜିତି ଭାରତ ପ୍ରଥମେ କ୍ଷେତ୍ରରକ୍ଷଣ ନିଷ୍ପତ୍ତି ନେଇଥିଲା। ତଥାପି ଜର୍ଜ ଲିଣ୍ଡେ (୫୨ ରନ୍, ୨୫ ବଲ୍, ୧ ଚୌକା, ୫ ଛକା)ଙ୍କ ବିସ୍ଫୋରକ ବ୍ୟାଟିଂ ସାଙ୍ଗକୁ ଅଧିନାୟକ ଟେମ୍ବା ବଭୂମା (୪୦), ଖାୟା ଜୋଣ୍ଡୋ (୨୪), ଏବଂ ୱିକେଟ୍ରକ୍ଷକ ହେନ୍ରିକ୍ କ୍ଲାସେନ୍ (୩୧)ଙ୍କ ମୂଲ୍ୟବାନ ଯୋଗଦାନ ବଳରେ ଦକ୍ଷିଣ ଆଫ୍ରିକା ୫ ୱିକେଟ୍ ବିନିମୟରେ ୧୬୨ ରନ୍ କରିନେଇଥିଲା। ଭାରତ ପକ୍ଷରୁ ଅକ୍ଷର ପଟେଲ, କ୍ରୁନାଲ ପାଣ୍ଡ୍ୟା, ଦୀପକ ଚହର, ଖଲିଲ ଅହମ୍ମଦ ଓ ୟୁଜ୍ବେନ୍ଦ୍ର ଚହଲ୍ ଗୋଟିଏ ଲେଖାଏଁ ୱିକେଟ୍ ନେଇଥିଲେ। ଜବାବରେ ୱିକେଟ୍ ରକ୍ଷକ ଈଶାନ କିଷନ୍ (୫୫ ରନ୍, ୨୪ ବଲ୍, ୫ ଚୌକା, ୪ ଛକା))ଙ୍କ ଧୁଆଁଧାର ଅର୍ଧଶତକ ସତ୍ତ୍ବେ ଏକ ସମୟରେ ୭ ବଲ୍ ଏବଂ ୫ ରନ୍ ଭିତରେ ୩ ୱିକେଟ୍ ହରାଇ ଦଳ ସଂକଟରେ ପଡ଼ିଯାଇଥିଲା। ଅକ୍ଷର ପଟେଲ (୧୦), ଦୀପକ ଚହର (୦) ଓ ସାର୍ଦୁଲ ଠାକୁର (୨) ଭାରତକୁ କିଛିଟା ଅଡୁଆରେ ପକାଇ ଦେଇଥିଲେ। ହେଲେ ଅଲ୍ରାଉଣ୍ଡର କ୍ରୁନାଲ ପାଣ୍ଡ୍ୟା (୨୩ ରନ୍, ୧୫ ବଲ୍, ୧ ଲେଖାଏଁ ଚୌକା ଓ ଛକା) ଚହଲ୍ (୧*)ଙ୍କୁ ସାଥୀ କରି ୨୦ତମ ଓଭରର ଶେଷ ବଲ୍ରେ ବିଜୟ ମୁଣ୍ଡି ମାରିଥିଲେ। ଭାରତ ୮ ୱିକେଟ୍ରେ ଧାର୍ଯ୍ୟ ଲକ୍ଷ୍ୟ ୧୬୩ ରନ୍ କରିନେଇଥିଲା ବେଳେ ଈଶାନ କିଷନ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ। ଦକ୍ଷିଣ ଆଫ୍ରିକା ପକ୍ଷରୁ ସଫଳ ବୋଲର ଭାବେ ଜୁନିଅର ଡାଲା ୨ ୱିକେଟ୍ ପାଇଥିଲେ।