ଚତୁଷ୍କୋଣୀୟ ଶୃଙ୍ଖଳା, ଭାରତକୁ ପୁଣି ଯୁଗଳ ବିଜୟ
ତିରୁବନ୍ତପୁରମ୍: କେରଳରେ ଆୟୋଜିତ ଚତୁଃକୋଣୀୟ ୧୯ ବର୍ଷରୁ କମ୍ କ୍ରିକେଟ୍ ଶୃଙ୍ଖଳାରେ ଭାରତକୁ ପୁଣି ଥରେ ଯୁଗଳ ବିଜୟ ମିଳିଛି। ମଙ୍ଗଳବାର ପ୍ରଥମ ଦିବସରେ ଦୁଇ ଭାରତୀୟ ଦଳ (ଏ ଓ ବି) ବିଜୟରୁ ଅଭିଯାନ ଆରମ୍ଭ କରିଥିଲା ବେଳେ ଗୁରୁବାର ଉଭୟ ଘରୋଇ ଦଳ ପୁଣି ନିଜ ନିଜର ଦ୍ବିତୀୟ ବିଜୟ ହାସଲ କରିଛନ୍ତି। ଗୁରୁବାର ଭାରତ-ଏ ଦଳ ୯୨ ରନ୍ରେ ଆଫ୍ଗାନିସ୍ତାନକୁ ପରାସ୍ତ କରିଥିଲା ବେଳେ ଦକ୍ଷିଣ ଆଫ୍ରିକା ବିପକ୍ଷରେ ଭାରତ-ବି’ ୧ ରନ୍ର ଉତ୍କଣ୍ଠାପୂର୍ଣ୍ଣ ବିଜୟ ପାଇଛି। ଉଭୟ ଭାରତୀୟ ଦଳ ମଧ୍ୟ ୨ ଲେଖାଏଁ ମ୍ୟାଚ୍ରୁ ଅପରାଜେୟ ସହ ସମାନ ୮ ପଏଣ୍ଟ୍ ଲେଖାଏଁ ପାଇଁ ତାଲିକାର ପ୍ରଥମ ଦୁଇ ସ୍ଥାନରେ ରହି ଫାଇନାଲ୍ ଖେଳିବା ନିଶ୍ଚିତ କରିଥିଲା ବେଳେ ଦୁଇ ଅତିଥି ଦଳ ବିଜୟ ଶୂନ୍ୟ ରହି ପଏଣ୍ଟ୍ ଖାତା ଖୋଲିପାରିନାହାନ୍ତି।ଗୁରୁବାର ତିରୁବନ୍ତପୁରମ୍ ମ୍ୟାଚ୍ରେ ଟସ୍ ହାରି ବ୍ୟାଟିଂ ପାଇଥିବା ଭାରତ-ଏ ସିଦ୍ଦେଶ ଭୀର୍ (୮୧ ରନ୍, ୮୨ ବଲ୍, ୯ ଚୌକା, ୩ ଛକା)ଙ୍କ ଅର୍ଧଶତକ ସାଙ୍ଗକୁ ସାଶ୍ବତ ରାୱତ୍ (୪୫), ପ୍ରିୟାଙ୍କ ଆର୍ଯ୍ୟ (୪୪) ଓ ଧ୍ରୁବ ଜୋରେଲ୍ (୨୯)ଙ୍କ ବଳରେ ୪୭.୪ ଓଭରରେ ୨୫୨ ରନ୍ କରି ସମସ୍ତ ୱିକେଟ୍ ହରାଇଥିଲା। ଆଫ୍ଗାନିସ୍ତାନ ପକ୍ଷରୁ ସଫଳ ବୋଲର ଭାବେ ସଫିକଉଲା ଗଫାରି ୪ ଓ ଆରିଫ୍ ଖାନ୍ ୨ ୱିକେଟ୍ ପାଇଥିଲେ। ଜବାବରେ ଆରିଫ୍ ଖାନ୍ (୩୩), ସଫିକ୍ଉଲା ଗଫାରି (୨୮), ଅଧିନାୟକ ଫରହାନ୍ ଜାକିଲ୍ (୨୮), ଜାମ୍ସିଦ୍ ଖାନ୍ (୨୧), ଆବିଦ୍ ମହମ୍ମଦି (୧୫) ଓ ଇସ୍ଲାମ ଜଜାଇ (୧୪)ଙ୍କ ଦୁଇ ଅଙ୍କ ବିଶିଷ୍ଟ ସ୍କୋର୍ ସତ୍ତ୍ବେ ଭ୍ରମଣକାରୀ ଦଳ ୪୮.୪ ଓଭରରେ ୧୬୦ ରନ୍ କରି ସମସ୍ତ ୱିକେଟ୍ ହରାଇଥିଲା। ଭାରତ ପକ୍ଷରୁ ସଫଳ ବୋଲର ଭାବେ ଯୁବରାଜ ଚୌଧୁରୀ ୩ ଓ ସିଦ୍ଦେଶ ଭୀର ୨ ୱିକେଟ୍ ଅକ୍ତିଆର କରିଥିଲେ। ଅଲ୍ରାଉଣ୍ଡ୍ ପ୍ରଦର୍ଶନ ପାଇଁ ଭୀର୍ଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
ଶେଷ ଓଭରର ଉତ୍କଣ୍ଠା: ଦକ୍ଷିଣ ଆଫ୍ରିକା ୧ ରନ୍ରେ ହାରିଲା
ସେହିପରି ଥୁମ୍ବା ମ୍ୟାଚ୍ରେ ଟସ୍ ଜିତି ଭାରତ-ବି ପ୍ରଥମେ ବ୍ୟାଟିଂ କରିଥିଲା। ଦୁର୍ଗେଶ କନ୍ପିଲେୱାର (୪୨), ସମୀର ରିଜ୍ଭି (୪୦), ତିଲକ୍ ବର୍ମା (୩୩) ଓ ରୟ ବର୍ମନ୍ (୨୮)ଙ୍କ ଦମ୍ଦାର ପାଳି ବଳରେ ଘରୋଇ ଦଳ ୪୯.୧ ଓଭରରେ ସମସ୍ତ ୱିକେଟ୍ ହରାଇବା ପୂର୍ବରୁ ୧୯୮ ରନ୍ କରିନେଇଥିଲା। ଦକ୍ଷିଣ ଆଫ୍ରିକା ପକ୍ଷରୁ ପ୍ଲାଜି ୩, ଜାର୍ଦିନେ ଓ ପର୍ସନ୍ସ ୨ ଲେଖାଏଁ ୱିକେଟ୍ ଦଖଲ କରିଥିଲେ। ଜବାବରେ ତେର୍ବ୍ଲାଞ୍ଚେ (୭୩) ଓ ଆନ୍ଦିଲେ ମୋଙ୍ଗାକେନ୍ (୬୪)ଙ୍କ ଲଢୁଆ ଅର୍ଧଶତକ ବଳରେ ଦକ୍ଷିଣ ଆଫ୍ରିକା ୪୯ତମ ଓଭର ଶେଷ ବେଳକୁ ସମାନ ୧୯୭ ସ୍କୋର୍ କରି ବିଜୟଠୁ ମାତ୍ର ଗୋଟିଏ ରନ୍ ଦୂରରେ ରହିଥିଲା। ହାତରେ ସେତେବେଳକୁ ଆଉ ୪ ୱିକେଟ୍ ଥିଲା। ହେଲେ ଶେଷ ଓଭର ବୋଲିଂ କରିଥିବା ସୁଶାନ୍ତ ମିଶ୍ର ମ୍ୟାଚ୍ରେ ନାଟକୀୟ ପରିବର୍ତନ ଆଣିଥିଲେ। ସେହି ଓଭରରେ ସେ ଆଦୌ ରନ୍ ବ୍ୟୟ କରିନଥିଲା ବେଳେ ୩ ଜଣ ବ୍ୟାଟ୍ସମ୍ୟାନ୍ ରନ୍ ଆଉଟ୍ ହୋଇଯାଇଥିଲେ। ଫଳରେ ଗୋଟିଏ ରନ୍ କରି ନିଶ୍ଚିତ ବିଜୟ ଅପେକ୍ଷାରେ ଥିବା ଦକ୍ଷିଣ ଆଫ୍ରିକା ହାତରୁ ସୁଶାନ୍ତ ହିଁ ମ୍ୟାଚ୍ ଛଡ଼ାଇ ନେଇଥିଲେ। ଶେଷରେ ଦକ୍ଷିଣ ଆଫ୍ରିକା ୧୯୭ ରନ୍ରେ ୯ ୱିକେଟ୍ ହରାଇ ଏକ ରନ୍ର ପରାଜୟ ବରଣ କଲା। ତଥାପି ମୋଙ୍ଗାକେନ୍ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ହାତେଇନେଲେ।