ରାଜକୋଟ ଟି-୨୦: ରୋହିତ ଶର୍ମାଙ୍କ ବିସ୍ଫୋରକ ବ୍ୟାଟିଂ, ବାଂଲାଦେଶକୁ ୮ ଓ୍ଵିକେଟ୍ରେ ପରାସ୍ତ କଲା ଭାରତ
ରାଜକୋଟ: ଅଧିନାୟକ ରୋହିତ ଶର୍ମାଙ୍କ ବିସ୍ଫୋରକ ବ୍ୟାଟିଂ ବଳରେ ଭାରତ ଗୁରୁବାର ବାଂଲାଦେଶକୁ ୮ ଓ୍ଵିକେଟ୍ରେ ପରାସ୍ତ କରିଛି। ନିଜର ୧୦୦ତମ ଟି-୨୦ ଅନ୍ତର୍ଜାତୀୟ ମ୍ୟାଚ୍ରେ ରୋହିତ ୪୩ଟି ବଲ ଖେଳି ୮୫ ରନ୍ କରିଛନ୍ତି। ଏଥିରେ ୬ଟି ଚୌକା ଓ ୬ଟି ଛକା ସାମିଲ ଅଛି। ଦ୍ୱିତୀୟ ଇନିଂସରେ ୧୫୪ ରନ୍ ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଭାରତ ୧୫.୪ ଓଭରରେ ୨ଟି ଓ୍ଵିକେଟ୍ ହରାଇ ୧୫୪ ରନ୍ କରିଛି। ଦ୍ୱିତୀୟ ଟି-୨୦କୁ ଜିତିବା ସହିତ ଶୃଙ୍ଖଳା ୧-୧ରେ ଜାରି ରହିଛି। ଅନ୍ତିମ ତଥା ତୃତୀୟ ଟି-୨୦ ନାଗପୁରରେ ନଭେମ୍ବର ୧୦ରେ ଖେଳାଯିବ। ଟିମ୍ ଇଣ୍ଡିଆ ପାଇଁ ଶିଖର ଧାଓ୍ଵନ ୩୧ ରନ୍, ଲୋକେଶ ରାହୁଲ ଅପରାଜିତ ୮ ରନ୍ ଓ ଶ୍ରେୟସ ଆୟର ଅପରାଜିତ ୨୪ ରନ୍ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ପ୍ରଥମ ଇନିଂସରେ ଭାରତକୁ ବାଂଲାଦେଶ ୧୫୪ ରନ୍ ବିଜୟ ଲକ୍ଷ୍ୟ ଦେଇଥିଲା। ଦ୍ୱିତୀୟ ଟି-୨୦ ମ୍ୟାଚ୍ରେ ଗୁରୁବାର ବିରାଟ କୋହଲିଙ୍କ ଅନୁପସ୍ଥିତିରେ ରୋହିତ ଶର୍ମାଙ୍କ ନେତୃତ୍ୱରେ ପଡ଼ିଆକୁ ଓହ୍ଲାଇଥିବା ଭାରତ ଟସ୍ ଜିଣି ପ୍ରଥମେ ବୋଲିଂ ନିଷ୍ପତ୍ତି ନେବା ପରେ ବାଂଲାଦେଶ ବ୍ୟାଟିଂ କରିଥିଲା। ଟିମ୍ ନିର୍ଦ୍ଧାରିତ ୨୦ ଓଭରରେ ୬ ଓ୍ଵିକେଟ୍ ହରାଇ ୧୫୩ ରନ୍ କରିଥିଲା।
ଆରମ୍ଭରୁ ବାଂଲାଦେଶ ଭଲ ବ୍ୟାଟିଂ କରିଥିଲା। ଓପନର ଲିଟନ ଦାସ ଓ ମହମ୍ମଦ ନଇମ୍ ପ୍ରଥମ ଓ୍ଵିକେଟ୍ରେ ୬୦ ରନ୍ ଯୋଡ଼ିଥିଲେ। ଲିଟନ୍ ଦାସ ୨୯ ରନ୍ରେ ରନ୍ଆଉଟ୍ ହୋଇଥିଲେ। ମହମ୍ମଦ ନଇମ୍ ଟିମ୍ ପାଇଁ ସର୍ବାଧିକ ୩୬ ରନ୍, ସୌମ୍ୟ ସରକାର ଓ ମହମ୍ମଦୁଲ୍ଲା ୩୦-୩୦ ରନ୍ କରିଥିଲେ। ଅନ୍ୟ ବ୍ୟାଟସ୍ମ୍ୟାନଙ୍କ ପ୍ରଦର୍ଶନ ନୈରାଶ୍ୟଜନକ ଥିଲା। ଭାରତ ପାଇଁ ୟୁଜବେନ୍ଦ୍ର ଚହଲ ସର୍ବାଧିକ ୨ଟି ଓ୍ଵିକେଟ ନେଇଥିବା ବେଳେ ଦିପକ ଚହର, ଖଲିଲ ଅହମ୍ମଦ ଓ ଓ୍ଵାସିଂଟନ ସୁନ୍ଦର ଗୋଟିଏ ଲେଖାଏଁ ଓ୍ଵିକେଟ୍ ନେଇଥିଲେ।