ଜାପାନକୁ ହରାଇ ମହିଳା ଏସିଆନ୍ ଚାମ୍ପିଅନ୍ସ ଟ୍ରଫିର ଫାଇନାଲରେ ଭାରତ

ନୂଆଦିଲ୍ଲୀ: ଜାପାନକୁ ୨-୦ରେ ପରାସ୍ତ କରି ମହିଳା ଏସିଆନ୍ ଚାମ୍ପିଅନ୍ସ ଟ୍ରଫିର ଫାଇନାଲରେ ପ୍ରବେଶ କରିଛି ଭାରତ । ଶେଷ କ୍ୱାର୍ଟରରେ ଦୁଇଟି ଗୋଲ୍ ଦେଇ ଜାପାନକୁ ୨-୦ ଗୋଲରେ ପରାସ୍ତ କରିଥିଲା ଭାରତ। ଫାଇନାଲରେ ଭାରତର ମୁକାବିଲା ଚୀନ ସହ ହେବ ।

ପ୍ରଥମ ତିନି କ୍ୱାର୍ଟର ଗୋଲବିହୀନ ହେବା ପରେ ନବନୀତ କୌର ୪୮ ତମ ମିନିଟରେ ପେନାଲ୍ଟି ଷ୍ଟ୍ରୋକରେ ଭାରତର ଖାତା ଖୋଲିଥିଲେ, ସେହିପରି ୫୬ତମ ମିନିଟରେ ଲାଲରେମସିଆମି ସୁନେଲିତା ଟପ୍ପୋଙ୍କ ଶ୍ରେଷ୍ଠ ପାସ୍ ରେ ଦ୍ବିତୀୟ ଗୋଲ୍ ଦେଇଥିଲେ। ଅନ୍ୟ ସେମିଫାଇନାଲରେ ପ୍ୟାରିସ୍ ଅଲିମ୍ପିକ୍ସର ରୌପ୍ୟ ପଦକ ବିଜେତା ଚୀନ୍ ୩-୧ ଗୋଲରେ ମାଲେସିଆକୁ ପରାସ୍ତ କରିଥିଲା।

ଏହି ମ୍ୟାଚର ୪୮ ତମ ମିନିଟ ପର୍ଯ୍ୟନ୍ତ ଭାରତ ଗୋଲ ଦେଇପାରିନଥିଲା । ମ୍ୟାଚରେ ଭାରତ ୧୬ଟି ପେନାଲ୍ଟି କର୍ଣ୍ଣର ହାସଲ କରିଥିଲେ ମଧ୍ୟ ସେଥିରୁ ଗୋଟିଏ ବି ଗୋଲ୍ କରିପାରିନଥିଲା । ଏଣୁ ଏହି ମ୍ୟାଚରେ ଭାରତ ଜିତିଥିଲେ ବି ଏହା ଭାରତ ପାଇଁ ବଡ଼ ଚିନ୍ତାର କାରଣ ପାଲଟିଛି । ରବିବାର ହେବାକୁ ଥିବା ଫଇନାଲ ପୂର୍ବରୁ ଭାରତକୁ ଏ କ୍ଷେତ୍ରରେ ନିଜର ପ୍ରଦର୍ଶନରେ ଉନ୍ନତି ଆଣିବାକୁ ହେବ ।