ସଲାଲା (ଓମାନ୍) : ଚଳିତ କନିଷ୍ଠ ଏସିଆ କପ୍ ହକି ପ୍ରତିଯୋଗିତାର ଫାଇନାଲ୍ରେ ପ୍ରଥମ ଦଳ ଭାବେ ଭାରତ ପ୍ରବେଶ କରିଛି। ଷଷ୍ଠ ଥର ଲାଗି ଭାରତର ଏହା ଫାଇନାଲ୍ ପ୍ରବେଶ। ପୂର୍ବରୁ ଭାରତ ୩ ଥର ବିଜେତା ଏବଂ ୨ ଥର ଉପବିଜେତା ହୋଇଥିଲା। ବୁଧବାର ସେମିଫାଇନାଲ୍ରେ ବବି ସିଂହ ଧାମିଙ୍କ ହ୍ୟାଟ୍ରିକ୍ ବଳରେ ଭାରତ ୯-୧ ଗୋଲ୍ରେ ଦକ୍ଷିଣ କୋରିଆକୁ ପରାସ୍ତ କରିଛି। ମ୍ୟାଚ୍ର ୧୩ତମ ମିନିଟ୍ରେ ଓଡ଼ିଆ ପୁଅ ସୁନିତ ଲାକ୍ରାଙ୍କ ଫିଲ୍ଡ ଗୋଲ୍ରେ ଭାରତ ପ୍ରାରମ୍ଭିକ ଅଗ୍ରଣୀ ନେଇଥିଲା। ଏହା ପରେ ଅର୍ଜିତ ସିଂହ ହୁଣ୍ଡାଲ (୧୯ ମିନିଟ୍) ଗୋଲ୍ ଦେଇ ପ୍ରଥମାର୍ଦ୍ଧରେ ଭାରତକୁ ୨-୦ରେ ଆଗୁଆ ରଖିଥିଲେ।
Sambad is now on WhatsApp
Join and get latest news updates delivered to you via WhatsApp
ତୃତୀୟ କ୍ବାର୍ଟରରେ ଭାରତୀୟ ଖେଳାଳି ଆକ୍ରମଣକୁ ଜୋରଦାର୍ କରି ୪ଟି ଫିଲ୍ଡ ଗୋଲ୍ ଲଦି ଦେଇଥିଲେ। ବବି (୩୧, ୩୯ ମିନିଟ୍), ଅଙ୍ଗଦ ବୀର ସିଂହ (୩୪ ମିନିଟ୍) ଓ ଅଧିନାୟକ ଉତ୍ତମ ସିଂହ (୩୮ ମିନିଟ୍) ଏହି ଗୋଲ୍ ଦେଇଥିଲେ। ଚତୁର୍ଥ କ୍ବାର୍ଟରରେ ବିଷ୍ଣୁକାନ୍ତ ସିଂହ (୫୧ ମିନିଟ୍), ବବି (୫୫ ମିନିଟ୍) ଓ ଶାରଦା ନନ୍ଦ ତିୱାରୀ (୫୭ ମିନିଟ୍) ଗୋଟିଏ ଲେଖାଏଁ ଗୋଲ୍ ଦେଇଥିଲେ। ୪୬ତମ ମିନିଟ୍ରେ କୋରିଆର କିଓନିଓଲ ୱାଙ୍ଗ ଗୋଟିଏ ଗୋଲ୍ ଶୁଝିଥିଲେ।