କାତୁନାୟକେ (ଶ୍ରୀଲଙ୍କା): ଶ୍ରୀଲଙ୍କା ଓ ଭାରତ ମଧ୍ୟରେ ଚାଲିଥିବା ଆଇସିସି ମହିଳା କ୍ରିକେଟ୍ ଚାମ୍ପିଅନ୍ସିପ୍ର ଶେଷ ଦିନିକିଆ ମ୍ୟାଚ୍ରେ ଭାରତ ହାରିଯାଇଛି। ଏହି ତିନି ମ୍ୟାଚ୍ ଶୃଙ୍ଖଳାର ପ୍ରଥମକୁ ୯ ଓ୍ଵିକେଟ୍ରେ ଏବଂ ଦ୍ୱିତୀୟକୁ ୬ ରନ୍ରେ ଜିତି ୨-୦ର ଅଗ୍ରଣୀ ପାଇଥିବା ଭାରତ ରବିବାର ତୃତୀୟ ତଥା ଶେଷ ମ୍ୟାଚ୍ରେ ଶ୍ରୀଲଙ୍କାଠୁ ୩ ଓ୍ଵିକେଟ୍ରେ ପରାସ୍ତ ହୋଇଛି। ଏଥି ସହିତ ଚାମ୍ପିଅନ୍ସପି୍ ପଏଣ୍ଟ୍ ତାଲିକାରେ ଭାରତ (୮) ପଞ୍ଚମ ସ୍ଥାନରେ ରହିଛି। ଭାରତ ମୋଟ ୯ ମ୍ୟାଚ୍ରୁ ୪ ବିଜୟ ହାସଲ କରିଥିଲା ବେଳେ ୫ ପରାଜୟ ବରଣ କରିଛି। ଭାରତ ପଛକୁ େଓ୍ଵଷ୍ଟଇଣ୍ଡିଜ୍ (୬), ଦକ୍ଷିଣ ଆଫ୍ରିକା (୪) ଓ ଶ୍ରୀଲଙ୍କା (୨) ରହିଛନ୍ତି।
Sambad is now on WhatsApp
Join and get latest news updates delivered to you via WhatsApp
କାତୁନାୟକେ ଷ୍ଟାଡିୟମ୍ରେ ରବିବାର ଟସ୍ ଜିତି ଶ୍ରୀଲଙ୍କା ପ୍ରଥମେ ଭାରତକୁ ବ୍ୟାଟିଂ ପାଇଁ ଆହ୍ଵାନ କରିଥିଲା। ଅଧିନାୟିକା ମିତାଲି ରାଜ୍ଙ୍କ ଚମତ୍କାର ଶତକ ସାଙ୍ଗକୁ ସ୍ମୃତି ମାନ୍ଧାନାଙ୍କ ଅର୍ଧଶତକ ବଳରେ ଭାରତ ମଧ୍ୟ ୫ ଓ୍ଵିକେଟ୍ ବିନିମୟରେ ୨୫୩ ରନ୍ କରି ଦୃଢ଼ ସ୍ଥିତି ପାଇଥିଲା। ୧୨୫ ରନ୍ ମଧ୍ୟ ମିତାଲିଙ୍କ ଜୀବନର ଶ୍ରେଷ୍ଠ ଦିନିକିଆ ସ୍କୋର୍ ଥିଲା। ଦଳୀୟ ସ୍କୋର୍ ୦ ବେଳେ ଭାରତ ପ୍ରଥମ ଓ୍ଵିକେଟ୍ ହରାଇଥିଲା। ତେବେ ସ୍ମୃତି ଓ ମିତାଲି ଦ୍ୱିତୀୟ ଓ୍ଵିକେଟ୍ରେ ୧୦୨ ରନ୍ ଯୋଡ଼ିଥିଲେ। ସ୍ମୃତି ୬୨ ବଲ୍ରୁ ୬ ଚୌକା ଜରିଆରେ ୫୧ ଏବଂ ମିତାଲି ୧୪୩ ବଲ୍ରୁ ୧୪ ଚୌକା ଓ ୧ ଛକା ବଳରେ ୧୨୫ ରନ୍ କରିଥିଲେ। ହର୍ମନ୍ପ୍ରୀତ୍ କୌର (୧୭) ଓ ଦୀପ୍ତି ଶର୍ମା (୩୮) ମୂଲ୍ୟବାନ ଅବଦାନ ରଖିବାରୁ ଭାରତ ୨୫୦ ରନ୍ ଟପି ଯାଇଥିଲା। ଜବାବରେ ମିତାଲିଙ୍କ ଶତକକୁ ଫିକା କରି ଦେଇଥିଲେ ପ୍ରତିପକ୍ଷ ସିଂହଳୀ ଅଧିନାୟିକା ଜୟଙ୍ଗାନୀ। ସେ ୧୩୩ ବଲ୍ରୁ ୧୩ ଚୌକା ଓ ୪ ଛକା ଜରିଆରେ ୧୧୫ ରନ୍ କରିବା ସାଙ୍ଗକୁ ହାସିନି ପେରେରା (୪୫)ଙ୍କ ସହ ପ୍ରଥମ ଓ୍ଵିକେଟ୍ରେ ୧୦୧ ରନ୍ ଯୋଡ଼ି ଭାରତକୁ ମୁହଁତୋଡ଼ ଜବାବ ଦେଇଥିଲେ। ଏହି ଦୁଇଜଣଙ୍କ ବ୍ୟତୀତ ସଂଜୀବନୀ (୨୨), ଡି ସିଲ୍ଭା (୧୫), ଓ୍ଵିରାକୋଡ଼ି (୧୪*) ଓ ଦିଲ୍ବାରୀ (୧୨*) ଉପଯୋଗୀ ପାଳି ଖେଳି ଗୋଟିଏ ବଲ୍ ପୂର୍ବରୁ ହାତରେ ୩ ଓ୍ଵିକେଟ୍ ଥାଇ ଶ୍ରୀଲଙ୍କାକୁ ସାନ୍ତ୍ୱନାମୂଳକ ବିଜୟ ଭେଟି ଦେଇଥିଲେ। ଭାରତ ପକ୍ଷରୁ ଝୁଲଣ ଗୋସ୍ୱାମୀ, ମାନସୀ ଜୋଷୀ ୨ ଲେଖାଏଁ ଏବଂ ପୂନମ୍ ଯାଦବ ଓ ହେମଲତା ଗୋଟିଏ ଲେଖାଏଁ ଓ୍ଵିକେଟ୍ ନେଇଥିଲେ ମଧ୍ୟ ଦଳକୁ ବିଜୟୀ କରାଇ ପାରିନଥିଲେ। ଉଭୟ ଦଳ ମଧ୍ୟରେ ଆସନ୍ତା ବୁଧବାରଠାରୁ ୫ ମ୍ୟାଚ୍ ବିଶିଷ୍ଠ ଟେ୍ଵଣ୍ଟି-୨୦ ଶୃଙ୍ଖଳା ଆରମ୍ଭ ହେବ।